CNARED irasaba Leta y’u Burundi gufungura imiryango nayo ikaza mu matora

Ihuriro ry’abanyapolitiki n’amashyaka atavuga rumwe n’ubutegetsi bw’u Burundi CNARED rikorera mu Burayi rivuga ko rigomba kujya kwiyamamaza mu matora y’umukuru w’igihugu ya 2020 niba Leta ifunguye imiryango ya Demokarasi.

Iri huriro ryakoze inama y’iminsi ibiri yarangiye ejo ku cyumweru, umunyamabanga wa CNARED-Giriteka, Anicet Niyonkuru, yabwiye BBC ko baganiriye uko ibintu bimeze mu Burundi bakabona nta kinini kirahinduka ariko bakemeza ko nta kundi bagomba kujyayo mu matora.

Bwana Niyonkuru agira ati: "Abatavuga rumwe na Leta baracyahohoterwa, impunzi nyinshi ziracyari mu buhundiro kandi tukabona ko amatora bamaze kuyategura nta kizayabuza kuba, tukagira tuti abanywanyi bacu ntibakwiye gutora uwo badashaka".

Uruhande rw’u Burundi ruheruka gutangaza ko amatora y’umukuru w’igihugu ari gutegurwa mu mahoro na Demokarasi.

Bwana Niyonkuru avuga ko bifuza kubwira abanyagihugu gutora umuntu ugamije ihinduka ry’ibintu mu Burundi biciye mu matora.

Ati "Turagira tuti nubwo ibintu bitaragenda neza, nubwo tubona ntacyahindutse kinini, ubu twerekanye ishyaka ryo kujya mu matora".

"Bakareka tugahiganwa badutsinze tugatsindwa dutsinze bakemera ko batsinzwe, ariko bakemera iyo ngendo ya demokarasi".

"Ubu twamaze kugira tuti nta kundi tugomba kuza, dusigaye ko iyo nzira nayo leta iyuguruye".

Bwana Niyonkuru avuga ko mu gihe leta itabemerera kujyayo batakwiyahura kuko n’ubundi ngo bari mu buhungiro.

Ati "Ubu rero ari amahanga, ari leta, ari n’abanyagihugu bose bamenye ko iryo shyaka ryo kuza mu matora twaryerekanye, ni byanga bazamenye ko ari leta y’u Burundi izaba yatubujije".

Leta ivuga ko ibintu bimeze neza

Mu kwezi gushize itsinda ry’iperereza ry’ishami rya ONU rishinzwe uburenganzira bwa muntu ryatangaja ko ryabonye mu Burundi ibikorwa by’urugomo, iyicarubozo, ubwicanyi gushimutwa n’ibindi byibasira cyane cyane abatavuga rumwe n’ishyaka riri ku butegetsi CNDD-FDD.

Ambasaderi Rénovat Tabu uhagarariye u Burundi muri iryo shami rya ONU i Geneve, yavuze ko ibyavuzwe n’iri tsinda bigamije gusebya igihugu, ndetse ko ibyo iri tsinda ryagezeho ari ibinyoma.

Bwana Tabu yavuze ko amatora ya 2020 ari gutegurwa mu mahoro na demokarasi hagendewe ku bisabwa na komisiyo ishinzwe amatora.

Mu kwezi kwa Gatandatu uyu mwaka, Ambasaderi Albert Shingiro uhagarariye u Burundi muri ONU yabwiye inama ishinzwe umutekano ku isi ko "mu Burundi ibya Politiki n’umutekano bihagaze neza kandi ko amatora y’umukuru w’igihugu ari gutegurwa akazakorwa neza.


CNARED irasaba Leta y’u Burundi gufungura imiryango nayo ikaza mu matora ya 2020

@Umubavu.com





Tanga igitekerezo kuri iyi nkuru



Igitekerezo