Burundi: Batoye Perezida w’Inteko, ishyaka CNL ryanze gutora

Abagize Inteko Ishinga Amategeko baherutse gutorwa mu Burundi bemeje Depite, Daniel Gelase Ndabirabe watowe mu Ntara ya Kayanza nka Perezida w’iyi Nteko gusa itora ntiryitabiriwe n’abo mu ishyaka ritavuga rumwe n’ubutegetsi rya CNL.

Bwana Ndabirabe yatowe ku majwi 90 ku 123, Visi-Perezida wa Mbere w’Inteko ni Depite, Sabine Ntakarutimana naho Abel Gashatsi wo mu ishyaka UPRONA akaba yatorewe kuba Visi-Perezida wa Kabiri w’iyi Nteko y’u Burundi.

Abadepite bose 32 b’ishyaka rya CNL ritavuga rumwe n’iriri ku butegetsi, ntibigeze binjira muri ibyo bikorwa byo gushyiraho Biro y’Inteko Ishinga Amategeko.

Bakavuga ko amategeko agenga aya matora yabaye, yateguwe hagamijwe gukumira iryo shyaka rya CNL.

Depite Daniel Gelase Ndabirabe watorewe kuyobora Inteko Ishinga Amategeko y’u Burundi, azwi nk’umwe mu bategetsi bakomeye b’ishyaka CNDD-FDD riri ku butegetsi aho kugeza mu 2016 yari umuvugizi waryo.

Nyuma y’aho Bwana Ndabirabe yagenwe kuba Umunyamabanga Nshingwabikorwa ushinzwe ubuzima bw’ishyaka no gukurikirana ibikorwa byaryo.

Ishyaka CNL rivuga ko Abadepite bo mu ishyaka CNDD-FDD riri ku butegetsi, ari na ryo rifite Abadepite benshi, ryakoze ibyo ryishakiye mu ntumbero yo gukumira Abadepite ba CNL muri ibyo Biro.

Agathon Rwasa uyoboye iri shyaka rya CNL wanatowe mu ntara ya Ngozi, atangaza ko ingingo za 19 na 20 z’amategeko ngengarugo y’Inteko Ishinga Amategeko "yahonyowe kugira ngo bakumire abantu kanaka".

Hagati aho, Bwana Rwasa amenyesha ko ibyo bitazababuza gukomeza ibikorwa by’Inteko Ishinga Amategeko batorewe.


Agathon Rwasa (ubanza iburyo) ari kumwe n’Abadepite ba CNL, aganira n’abanyamakuru

Avugana n’abanyamakuru, Bwana Rwasa yagize ati "Ibikorwa by’Inteko Ishinga Amategeko, si ibikorwa bya Biro gusa, bikorerwa mu myanya no mu bikorwa bitandukanye".

"Mu gihe badashatse ko tuba muri Biro, ni ibintu bisanzwe, ntibidukurako kuba Abadepite, ibikorwa by’Inteko Ishinga Amategeko tuzabikomeza".

Mu Nteko Ishinga Amategeko iheruka , Agathon Rwasa yari Visi-Perezida wa Mbere. Ishyaka rye byatangajwe ko ryegukanye umwanya wa Kabiri mu matora aherutse yo ku wa 20 z’ukwa Gatanu, aho ryegukanye imyanya 32 mu Nteko.

Ishyaka Uprona ryegukanye umwanya wa Visi-Perezida wa Kabiri w’Inteko Ishinga Amategeko y’u Burundi, rifite Abadepite babiri gusa, mu gihe CNDD-FDD iri ku butegetsi ifite 86.

Iyi Nteko rusange yari iya mbere, yatangiye ku wa Kabiri ya 04 z’uku kwezi kwa munani, iyobowe na Venant Sinzinakyo, umudepite ukuriye abandi mu myaka nk’uko itegeko ribivuga, akaba yaratowe mu ntara ya Gitega.


Daniel Gelase Ndabirabe yatorewe kuyobora Inteko Ishinga Amategeko y’u Burundi Abadepite ba CNL basohotse


Abadepite ba CNL barangajwe imbere na Agathon Rwasa

Abigira ba nkunze u Rwanda, Dosiye ya CYUMA Hassan nyiri ISHEMA TV ufunze utaraburana n’ibindi byinshi Ingabire Victoire yabigarutseho muri iki kiganiro utapfa gusanga ahandi:





Tanga igitekerezo kuri iyi nkuru



Igitekerezo