Burera: Ngo bacibwa amafaranga kuko ibirayi byabo byeze bitibwe

Bamwe mu bahinzi b’ibirayi bo mu kagari ka Kidakama mu murenge wa Gahunga babwiye TV/Radio1 ko babangamiwe n’abiyita abarinzi baza kwishyuza amafaranga yo kuba barabarindiye ibirayi bikiri mu murima nyamara ngo nta bwumvikane bagiranye.

Abo barinzi ngo bahengera umuhinzi ugiye gusarura bakamuca amafaranga ari hagati y’ibihumbi bine (4000) n’ibihumbi umunani (8000) by’amafaranga y’u Rwanda, ngo kubera ko ibirayi bye birinze byera bitibwe, uyabuze ntiyemererwe gusarura.

Ku ruhande rw’iri tsinda ry’abarinzi bavuga ko bageze kuri 15 bo bemeza ko bashyizweho n’abaturage ubwabo kandi ari nabo babihembera ku bushake, bagashimangira kandi ko ibi byakozwe bihagarikiwe n’ubuyobozi bw’akagari ka Kidakama, n’ubwo ubuyobozi bw’ako kagari bwo bubihakana.

Ubuyobozi bw’umurenge wa Gahunga buvuga ko iki kibazo butari bukizi, ariko kandi ngo mu gihe hari umuturage wagitangira ikirego kikaba cyakurikiranwa.

MWAMBUTSA Amani Wilson umunyamabanga nshingwabikorwa w’uwo murenge yabwiye TV/Radio1 ko igikorwa nk’icyo gishobora no gufatwa nk’ubwambuzi atari akizi, akizeza abo bahinzi ko bigiye gukurikiranwa, abaciwe ayo mafaranga bakaba banayasubizwa.





Tanga igitekerezo kuri iyi nkuru



Igitekerezo