Umukuru w’Umudugudu wa Mububa, Akagari ka Tunda, Umurenge wa Kamabuye mu Karere ka Bugesera, witwa Migambi Emmanuel, yakebwe ururimi aranakubitwa akekwaho gusambana n’umugore w’umuturage witwa Maniraguha Vianney.

Amakuru agera ku IGIHE avuga ko uyu mugabo Migambi ubu arembeye mu bitaro by’Akarere ka Bugesera i Nyamata, ahagenewe indembe ndetse akaba atabasha no kuvuga kubera ko yabyimbye umusaya w’iburyo.

Bivugwa ko uyu muyobozi n’umugore basambanaga bafatiwe mu Murenge wa Ngeruka ariko ari abo mu Murenge wa Kamabuye.

Ubuyobozi bw’Akarere ka Bugesera buvuga ko umugore wafashwe asambana umugabo we yari yamenye amakuru y’uko yari afite gahunda yo kujya gusambana n’umukuru w’Umudugudu, ku buryo ari byo byatumye amukurikira kugeza ubwo amufatiye mu cyuho.

Meya w’Akarere ka Bugesera Mutabazi Richard yabwiye IGIHE ati “ Nibyo byarabaye twahawe amakuru y’uko hari uwafatiwe mu cyuho cy’ubusambanyi hanyuma arwana n’abo yasambanyirizaga umugore birangira baciye ururimi.”

Yahamije ko uyu mugabo yakaswe ururimi ndetse iperereza ryatangiye kugira ngo hamenyekane niba nta bandi babigizemo uruhare kuko bitumvikana uburyo umuntu umwe yamukata ururimi.

Yaboneyeho gushishikariza abaturage kuba inyangamugayo no kwirinda amakimbirane n’ibyatuma imiryango ibana nabi.

Kugeza ubu umugore wafashwe asambana n’umugabo we ukekwaho guca ururimi uwamusambanyirizaga umugore bafungiye kuri sitasiyo ya RIB ya Ruhuha, mu gihe Umukuru w’Umudugudu we arembeye mu bitaro.

---

---