Kompanyi yo muri Leta Zunze Ubumwe za Amerika ikora indege zo mu bwoko bwa Boeing yemeye ko igiye gushumbusha indishyi y’akababaro ingana na 144.500 ku muntu umwe umwe imiryango yaburiye ababo mu mpanuka ikomeye y’indege ya Boeing 737 Max yaguyemo abantu 157 .

Ababuranira imiryango y’aburiye ababo muri iyo mpanuka bavuga ko iyo ndishyi ntacyo ivuze, bakabona ko ari uburyo bwa Boeing bwo kwimenyekanisha.

Myinshi muri iyo miryango isanzwe yarikomye bikomeye iyi kompanyi Boeing mu bucamanza.

Nomaan Husain, umwe mu bacamanza mu ntara ya Texas muri Amerika, uburanira imiryango 15 avuga ati: "Amadorari 144.000 ntaho byahurira n’indishyi y’akababaro ku miryango yabuze ababo".

"Icyo si ikintu gishobora guhoza imiryango. Iyo miryango irashaka inyishyu y’ukuri".

Uburyo bwo kwibagiza?

Kuva mu kwezi kwa Gatatu, indege za 737 Max zarahagaritswe, mu gihe abashinzwe iperereza barimo bakigenzura neza ibijyanye n’umutekano w’ingendo zayo.

Byabaye nyuma y’impanuka ebyiri zikomeye imwe yo muri Indonesia na Ethiopia zahitanye abarenga 340.

Mu baguye mu mpanuka ya Ethiopian Airways harimo umunyarwanda umwe.

Mu kwezi kwa Karindwi, Boeing yemereye imiryango yabuze n’abaturanyi bayo miliyoni 100 z’amadorari.

Nibwo nyuma iyo kompanyi yatangaje ko igice kimwe cyahawe iyo miryango, ikindi nacyo kigakoreshwa mu byo kurera n’iterambere mu miryango yabuze ababo.

Robert A Clifford, umuyobozi mukuru ku birebana n’impanuka ya Ethiopian Airlines, avuga ko kubona Boeing nta bisobanuro yatanze igitangaza icyo cyemezo, byerekana ko Boeing yashakaga kuzimagiza ibijyanye n’ibibazo by’umutekano w’iyo ndege.

Buri muryango uzashumbushwa hafi ibihumbi 144,500 by’amadorari umwe umwe

Abantu 157 batikiriye mu mpanuka ya Ethiopian Airways imiryango yabo ijya mu gahinda gakomeye

@Umubavu.com

---

---