Bobi Wine yahungishirije abana be muri Amerika

Robert Kyagulanyi uzwi nka Bobi wine uri mu bakandida bari guhatanira gutegeka Uganda, yatangaje ko yahisemo guhungishiriza abana be muri Leta Zunze Ubumwe za Amerika nyuma yo kuvumbura ko ubutegetsi bwa Perezida Museveni bushaka kuzabashimuta bukamusaba guhagarika ibikorwa byo kwiyamamaza.

Aba bana bahagurutse ku Kibuga cy’indege Mpuzamahanga cya Entebbe baherekejwe na nyina wabo mu ijoro ryo ku wa 6 Mutarama 2021.

Ni icyemezo cyanenzwe na benshi batangira kugaragaza ko Robert Kyagulanyi atari akwiye kuba ahungisha abane be mu gihe hari amagana y’urubyiruko ari kumugwa inyuma.

Mu gitondo cyo kuri uyu wa 7 Mutarama asobanura ku bijyanye n’iki cyemezo, Robert Kyagulanyi yavuze ko yagifashe nyuma yo kubona ko ubuzima bw’abana be buri mu kaga kandi hari n’umugambi wo kubashimuta ngo bamubuze kwiyamamaza.

Ati “mwagiye mubona ibintu nk’ibi mu mezi ashize, njye n’abantu ba hafi ndetse n’umuryango wanjye twagiye dushyirwa mu byago bikomeye n’ubutegetsi. Muribuka mu minsi yashize igisasu cyatewe mu cyumba cy’umuhungu wanjye. Bashakaga kumwica.”

Yakomeje agira ati “Nabwiwe ko bashakaga gushimuta umwana wanjye umwe cyangwa babiri, bakabashyira imbunda ku mutwe kugira ngo mvuge ibintu ntemera, mu minsi ishize imodoka yagiye ikurikirana umugore n’abana banjye aho bagiye hose, ndetse byatumye mbahindurira amashuri.”

Robert Kyagulanyi yavuze ko abana be bazasubira muri Uganda nyuma y’amatora, yemeza ko we n’umugore we, Barbara Itungo Kyagulanyi bo bakiri muri Uganda kandi bazakomeza guhangana n’ubutegetsi bwa Perezida Museveni.

Kuva ku itariki ya 9 z’ukwezi kwa 11 mu 2020 kugeza ku itariki ya 12 Mutarama uyu mwaka, abakandida 11 bari mu bikorwa byo kwiyamamariza kuba Perezida wa Uganda.

Ni amatora ateganyijwe kuba ku itariki ya 14 z’uku kwezi kwa Mbere 2021.


Bobi Wine yahungishirije abana be muri Amerika kugira ngo ahangane na Museveni ntacyo yikanga

KARASIRA AIMABLE YARIRIMBIYE INDIRIMBO DEO MUSHAYIDI WAKATIWE GUFUNGWA BURUNDU, AVUZE IBINTU BIKOMEYE UDAKWIYE GUCIKWA:





Tanga igitekerezo kuri iyi nkuru



Igitekerezo