Bizeye ko uyu mugore umaze imyaka 4 yarashimuswe muri Mali agiye kurekurwa

Sophie Pétronin, w’imyaka 75, yashimutiwe muri Mali mu kwezi kwa 12/2016, nyuma y’imyaka hafi ine bibaye ubu azwi kw’isi nka "The French Hostage".

Ubu, hari amakuru ko kumurekura byegereje, kimwe n’uwahoze ari umunyapolitiki muri Mali, bigakorwa nko guhererekanya aho leta nayo izarekura abarwanyi bita aba-jihadistes bagera ku 100.

Madamu Sophie wakoraga mu bikorwa byo gufasha, yari yarigeze kurokoka gushimutwa yiyoberanyije.

Hagati aho, Soumaïla Cissé wahoze ari umukuru w’abatavugarumwe na leta ndetse wiyamamarije kuba perezida wa Mali, nawe yashimuswe mu kwezi kwa gatatu uyu mwaka.

Itsinda ry’abarwanyi bo muri Mali ryitwa JNIM, rikorana na al-Qaeda, bikekwa ko ari ryo ryabashimuse.

Ni iki tuzi ubu?

Hashize amezi abategetsi bagerageza ko aba bantu barekurwa ariko bafite ubwoba ko bishobora no gupfa ku munota wa nyuma.

Mu kwezi kwa munani, Ibrahim Boubacar Keïta wari Perezida wa Mali yahiritswe ku butegetsi n’agatsiko k’abarikare, nta byinshi bizwi aho ibiganiro byakomereje n’uriya mutwe w’abarwanyi.

Sébastien Chadaud, umuhungu wa Madamu Sophie, ati: "Haracyari kare cyane kwishima. Mu myaka ine ishize ibihe nk’ibi twabibayemo."

Bwana Sébastien ku wa kabiri yerekeje i Bamako mu murwa mukuru wa Mali nk’uko umwe mu bo mu muryango we yabibwiye Radio RTL yo mu Bufaransa.

Amakuru ava muri Mali avuga ko aba-jihadistes 100 bafashwe n’igisirikare baherutse kurekurwa mu minsi ishize, nka kimwe mu byumvikanyweho ku kugurana imfungwa.

Abo barwanyi baherutse kubonwa mu majyaruguru ya Mali mu mujyi wa Tessalit, kandi amakuru yaho avuga ko Sophie Pétronin na Soumaïla Cissé ari aho nabo bafungiwe.

JNIM ivuga ko abantu bayo 206 bari bafunzwe na leta ubu barekuwe nk’uko bitangazwa n’urubuga rw’amakuru Nouvel Horizon.

Sophie Pétronin ni inde?

Azwi nk’Umufaransa wa nyuma uheruka gushimutwa n’aba-jihadistes, ibya Sophie Pétronin byariho bisa n’ibyibagirana nubwo umuryango we wakomeje guhirimbanira ko arekurwa.

Yashimuswe bucya ari Noheli mu 2016 mu mujyi wa Gao uri mu majyaruguru, yari azwi cyane muri ako gace nk’umugore ufasha impfubyi n’abana bugarijwe n’imirire mibi.

Yari akuriye umushinga w’Abasuwisi wo gufasha witwa Association D’Aide i Gao kuva mu 2004 ndetse akaba yari inzobere mu ndwara y’inzoka zo munda izwi nka guinea-worm iterwa n’amazi yanduye mu majyaruguru ya Mali.

Ubwo abarwanyi b’aba-Tuareg bashyigikiwe n’abahezanguni biyitirira idini ya Isilamu bafataga umujyi wa Gao mu 2010, abadipolomate barindwi bo muri Algeria barashimuswe, Sophie yaracitse mu gihe ari we washikishwaga cyane.

Yaciye mu muryango w’inyuma w’inzu bari bateye, ndetse abasha kuvanwa muri Mali agezwa muri Algeria yiyoberanyije mu myambaro miremire.

Mu kwezi kwa gatanu 2021 yabwiye ikinyamakuru Le Dauphiné Libéré ati: "Twambutse ubutayu mu ijoro rimwe gusa mu gihe ubundi bifata iminsi ibiri. Narebaga umuvuduko twariho wari 130Km/h."


Umuhungu wa Sophie Pétronin avuga ko hakiri kare kwishimira irekurwa rya nyina, kereka byemejwe ko byabayeho

Yavuye muri Mali yiyoberanyije ariko vuba yahise ahagaruka, hashize imyaka ine noneho yafashwe ku manywa y’ihangu baramutwara, mu gitero bivugwa ko cyakozwe na JNIM.

Yabonetse muri videwo ebyiri z’abashimuswe, hari ubwo umuhungu we yagiye kubonana n’umuntu waho wari umuhuza wavugaga ko abamushimuse bashaka ingurane ngo bamurekure.

Muri video yabonetse mu 2018 aho byabonekaga ko ananiwe kandi yananutse cyane, yasabye ubufasha bwa Perezida Emmanuel Macron.

Igihe yashimutwaga yari arwaye Cancer ndetse na Malaria.

Soumaïla Cissé we ni muntu ki?

Bwana Cissé yashimuswe arimo yiyamamariza umwanya w’ubudepite. Ni umugabo wigeze kuba minisitiri muri guverinoma n’umuntu ukuriye abatavugarumwe n’ubutegetsi.


Soumaïla Cissé (iburyo) yashimuswe mu kwezi kwa Gatatu

Ni we wari uhatanye bikomeye na Ibrahim Boubacar Keïta mu matora ya 2013 na 2018 - inshuro zombi yaratsinzwe. Bwana Cissé yamaganye ibyavuye mu matora ya 2018 avuga ko yibwe amajwi.

Perezida Keïta yahiritswe mu kwezi kwa munani, imwe mu mpamvu z’ababikoze irimo kumushinja ko yananiwe guhashya imitwe y’abahezanguni mu majyaruguru ya Mali, ndetse ko gushimutwa kwa Bwana Cissé ari kimwe mu bimenyetso bikomeye by’icyo kibazo.

Ni iki kiri inyuma y’imitwe yiyitirira Isilamu muri Mali?

Kugumuka kugamije kwigenga kw’amajyaruguru ya Mali kwatangiye mu 2011 gutewe n’imitwe y’aba-jihadistes yafashe ibice bimwe by’amajyaruguru.

Mu 2013, ingabo za leta zifashijwe n’iz’Ubufaransa zabashije kwisubiza ako gace, ariko imitwe myinshi y’aba-jihadistes yakomeje ibikorwa birimo ibitero no gushimuta abantu.

Leta ya Mali ntiyigeze ibasha kongera kugenzura mu buryo busesuye amajyaruguru y’igihugu.

U Bufaransa bukomeje gufasha ingabo za Mali no mu kandi karere ka Sahel mu kurwanya iyo mitwe itandukanye.


Umuryango wa Sophie Pétronin n’abaharanira ko arekurwa bakomeje kugorwa no kwibutsa isi ko yashimuswe

Umupfumu amennye amabanga y’ukuntu ngo ashika abantu n’uko ari gufasha Abapasiteri, urabyiyumvira byose uko byakabaye muri iyi Video:





Tanga igitekerezo kuri iyi nkuru



Igitekerezo