Bill Gates yaburiye Africa ko Coronavirus nihagera izica abarenga Miliyoni 10

Umunyamerika Bill Gates washinze ikigo cya Microsoft unaherutse kwisubiza umwanya w’umuherwe wa mbere ku Isi awukuyeho umunyamerika Jeff Bezos, we washinze urubuga rwa Amazon, avuga ko virus yiswe Novel Coronavirus nigera ku mugabane wa Africa izica abantu barenga miliyoni 10 ngo bitewe nuko nihagera bizagora inzego z’ubuzima zaho kuyikumira.

Bill Gates waherukaga kuyobora uru rutonde rw’abaherwe ku Isi mu 2017 akarukurwaho na Jeff Bezos mu 2018, yavugiye ibi mu nama yahuje abahanga bibumbiye mucyo bita ‘American Scientific Society’ yabereye Seattle muri Washington kuri uyu wa Mbere taliki 17, Gashyantare, 2020.

Mu Cyumweru gishize, hari amakuru yavuze ko umurwayi wa Mbere wa CoronaVirus muri Africa yagaragaye i Cairo mu Misiri.

Bill Gates yagize ati “Iki ni ikibazo gikomeye kuko twabonye ko icyorezo aho cyaba giturutse hose kigora inzego z’ubuzima kukirwanya kandi kizagora izo muri Africa cyane ndetse gishobora kuzahitana abarenga miliyoni 10 nikigera ku ntera yo hejuru muri uriya mugabane.”

Yavuze ko n’ubwo kiri kugarika ingogo mu Bushinwa, ngo kizarushaho kuba kibi cyane nikigera muri Africa.

Hari ubwoba ko coronavirus ishobora kuzava mu bihugu by’Abarabu, igana muri Africa yo munsi y’ubutayu bwa Sahara kandi ngo nihagera izakora ishyano kurusha ahandi hose yageze.

Ikigo cya Bill kiswe The Bill&Melinda Gates Foundation giherutse gutanga miliyoni $100 yo gufasha mu guhangana na corona virus.

Imibare yatangajwe ku Cyumweru taliki 16, Gashyantare, 2020 yavugaga ko corona virus imaze kwica abantu 1, 770 kandi kandi ngo hari abandi bagera ku 2,048 bamaze kuyandura.

Abenshi muri bariya baba mu Bushinwa.

Mu Bushinwa haravugwa abandi bantu 500 banduye iriya ndwara.

Hari ibindi bihugu bifite abaturage bafashwe na kiriya cyorezo, ibyo bikaba ari Hong Kong, u Buyapani, Philippines, Taiwan n’u Bufaransa.

N’ubwo abategetsi bo mu Bushinwa bavuga ko kwiyongera kw’abandura iriya virus kuri kugabanyuka, abahanga mu buzima no mu bukungu bavuga ko byaba ari uguhubuka hagize uvuga ko iriya virus iri hafi guhagarara.


Gates araburira Africa ko Coronavirus iramutse ihageze yazayambura abaturage barenga miliyoni 10

Umusore yarongoye mu mukondo w’umugore we kubera kutamenya aho igitsina kiba:





Tanga igitekerezo kuri iyi nkuru



Igitekerezo