Biden yanikiye cyane Sanders mu bademokarate bahatanira gutegeka USA

Umudemokarate, Joe Biden yaraye ashimangiye umwanya we nk’ukomeje kuba imbere ku kuba yaba umukandida w’ishyaka ry’abademokarate akazahatana na Perezida Donald Trump mu matora ya Perezida wa Amerika ateganyijwe mu kwezi k’Ugushyingo uyu mwaka.

Bwana Biden wahoze ari Visi-Perezida wa Amerika yatsinze muri Leta ya Michigan, ari yo ntsinzi nini muri ayo matora y’ibanze y’ejo ku wa Kabiri tariki ya 10 Werurwe 2020.

Akaba yakomeje kurushaho kwanikira uwo bahatanye, Senateri Bernie Sanders.

Izindi Leta eshanu Washington, Missouri, Mississippi, Idaho na North Dakota (Dakota y’amajyaruguru) zatoye ejo ku wa Kabiri.

Bwana Biden yananikiye Bwana Sanders muri Leta za Missouri, Mississipi na Idaho.

Ntibizwi niba Bwana Sanders azakomeza guhatana kugeza mu kwezi kwa Karindwi ubwo inama nkuru y’ishyaka izaba ihitamo uzaba umukandida w’ishyaka ry’abademokarate.

Andi matora akomeye mu ishyaka ry’abademokarate azaba mu cyumweru kiri imbere ubwo hazaba hatorwa abarihagarariye 577.

Kugira ngo umukandida ahagararire ishyaka mu matora, agomba gushyigikirwa n’abahagarariye ishyaka 1,991.

Mbere y’amatora y’ibanze y’ejo ku wa Kabiri, Bwana Biden yari amaze kugira abantu 648 bamushyigikiye naho Bwana Sanders afite 563.

Uwo wahoze ari Visi-Perezida wa Amerika yari inyuma ubwo Leta za mbere zatoraga, ariko aza kwigaranzura abo bahatanye nyuma y’amatora yo ku wa Kabiri udasanzwe, Super Tuesday na nyuma yo gushyigikirwa n’abahoze na bo bari mu bahatanira guhagararira ishyaka ry’abademokarate.

Biden yatanze ubuhe butumwa?

Ubwo yashimiraga abamushyigikiye ari mu mujyi wa Philadelphia ejo ku wa Kabiri nimugoroba, Bwana Biden w’imyaka 77 y’amavuko yavuze ko abademokarate, barimo n’abashyigikiye Bernie Sanders, bashobora gutsinda Donald Trump.

Ati "Uku kwiyamamaza kurenze kugaruka mu kibuga. Ni ukugaruka mu kibuga gucungura iki gihugu".

Bwana Biden yongeyeho ati "Iri joro [ry’ejo ku wa Kabiri] twateye intambwe twegera kugarurira agaciro n’icyubahiro White House [ibiro bya Perezida wa Amerika]".

"Tugomba kongera kuyobora Isi. Gahunda ya Donald Trump yo gushyira Amerika imbere y’ikintu icyo ari cyo cyose yatumye Amerika iba yonyine [yigunga]".

Senateri Sanders w’imyaka 78 y’amavuko ashyigikiwe n’urubyiruko rwinshi, ariko kugeza ubu ntabwo arashobora kurubyazamo amajwi yo kumushyigikira.

Perezida Trump yabivuzeho iki?

Ejo ku wa Kabiri, itsinda rishinzwe ibikorwa byo kwamamaza Bwana Trump ryasohoye itangazo rivuga abo bakandida bombi bahatanira guhagararira ishyaka ry’abademokarate "ntaho bataniye".

Iryo tangazo rigira riti "Umukandida-Perezida w’abademokarate, hatitawe ku izina rizaba riri ku rupapuro rw’itora, azaba agendera kuri gahunda yo gusaranganya umutungo [Socialist/Socialism]".

Risoza rigira riti "Perezida Trump ari mu rugendo ntahagarikwa rwerekeza ku kongera gutorwa".

Joe Biden amwenyura ari kumwe n’umugore we Jill, ubwo yari mu kiganiro n’abanyamakuru mu mujyi wa Philadelphia muri Leta ya Pennsylvania ku munsi w’ejo ku wa Kabiri

Depite Frank Habineza ati “Imyitwarire mibi yarazamutse igera no mu baministiri”, ararikocoye muri iyi Video:





Tanga igitekerezo kuri iyi nkuru



Igitekerezo