Biden yabwiye abari mu zabukuru ko ’nta cyo bavuze’ kuri Trump

Umukandida-Perezida w’ishyaka ry’abademokarate,Joe Biden yanenze uburyo Perezida Donald Trump yitwaye mu guhangana n’icyorezo cya Coronavirus, ndetse areshya abatora bageze mu zabukuru muri leta ya Florida iba ari isibaniro mu matora.

Ari mu kigo cyita ku bageze mu zabukuru cyo mu mujyi wa Pembroke Pines, Bwana Biden yababwiye ko kuri Perezida "nta cyo muvuze".

Bwana Biden abivuze hashize umunsi Bwana Trump asubukuye ibikorwa byo kwiyamamaza muri mitingi muri leta, bwa mbere nyuma yuko bamusanzemo Covid-19.

Bwana Trump yabwiye abamushyigikiye ko yumva "akomeye".

Leta ziba ari isibaniro mu gihe cy’amatora nka leta ya Florida na leta ya Ohio ziba ari ingenzi mu kubona ubwiganze bw’amajwi rusange 270 aba acyenewe ngo umuntu atsindire kuba Perezida w’Amerika.

Ntibigenwa no kubara bisanzwe amajwi y’abatoye mu gihugu.

Amakusanyabitekerezo yo mu gihugu agaragaza ko Bwana Biden ari imbere ho amanota 10 ku ijana kuri Bwana Trump ku kuba yatorwa, ariko muri za leta zimwe ayo manota aragabanuka.

Muri leta ya Florida, Bwana Biden arusha Bwana Trump amanota 3.7 ku ijana, nkuko impuzandengo (moyenne) y’amakusanyabitekerezo yakozwe n’ikigo Real Clear Politics ibigaragaza.

Mu matora yo mu 2016, Bwana Trump yatsinze bigoranye muri leta ya Florida, intsinzi yagizwemo uruhare rukomeye n’abatora bageze mu zabukuru.

Ariko amakusanyabitekerezo yo mu gihe cya vuba gishize agaragaza ko ubu ibintu birimo guhinduka mu batora bageze mu zabukuru b’i Florida bo mu ishyaka ry’abarepubulikani rya Bwana Trump.

Biden yavuze iki nyirizina?

Ejo ku wa Kabiri, Bwana Biden yagejeje ijambo ku itsinda ry’abo mu kigo cyita ku bageze mu zabukuru cyo mu majyepfo ya Florida, hakurikijwe ingamba zo kutegerana mu kwirinda Coronavirus.

Icyo gikorwa cye cyo kwiyamamaza cyakozwe mu buryo butandukanye cyane n’icyo Perezida Trump yakoreye muri iyo leta ku munsi wabanje, ubwo abantu babarirwa mu bihumbi bacyitabiraga, benshi muri bo batambaye udupfukamunwa.

Bwana Biden yashinje Perezida Trump gucyerensa ibyago Coronavirus iteje ku bantu bageze mu zabukuru.


Abantu bareba Joe Biden avuga muri mitingi yo kwiyamamaza muri leta ya Florida

Bwana Biden yababwiye ko kuri Bwana Trump, "nta cyo muvuze, muri abo kwibagirana, urebye ntacyo muri cyo. Uko ni ko abona abageze mu zabukuru. Uko ni ko mwebwe ababona [abafata]".

Bwana Biden w’imyaka 77, yongeyeho ko "umuntu wenyine gusa ugeze mu zabukuru Donald Trump asa nk’uwo yitayeho" ari we ubwe wenyine.

Bwana Biden yananenze Perezida Trump, w’imyaka 74, gukoresha "ibirori byanduriyemo [coronavirus] abantu benshi cyane ubwo abarepubulikani bahoberanaga nta mpungenge z’ingaruka", mu gihe abageze mu zabukuru bo batashoboraga guhura n’abuzukuru babo.

Ubwo Debbie Wasserman Schultz, umudemokarate uhagarariye Florida mu nteko ishingamategeko, yahaga ikaze Bwana Biden, yavuze ko abatora b’imyaka 65 no hejuru yayo ari bo "bazagena ibiva mu matora muri ’Sunshine State’ [izina ry’akabyiniriro (agatazirano) rya Florida]".

Trump we yavuze iki?

Muri mitingi yo kwiyamamaza ejo ku wa Kabiri nijoro muri leta ya Pennsylvania, y’ingenzi mu matora, Bwana Trump yavuze ko mucyeba we wo mu ishyaka ry’abademokarate "atari umuntu mwiza".

Ati "Ni umuntu mubi. Igihe cyose yakomeje kuba umuntu wiyorobeka".

Bwana Biden yamaze igihe kinini cy’ubuto bwe muri iyo leta ya Pennsylvania, ariko Bwana Trump yabwiye abitabiriye mitingi mu mujyi wa Johnstown ati "Bavuga ko yavukiye i Scranton [muri Pennsylvania]. Ariko yarahavuye. Yarahavuye. Mumpe amahoro".

Perezida Trump yanagerageje kureshya abatora b’ingenzi bagizwe n’abagore bo mu nkengero y’umujyi, benshi muri bo bavugwa mu makusanyabitekerezo ko batareba neza Bwana Trump.

Ati "None nshobora kubasaba icyo mwankorera? Mwe bagore bo mu nkengero y’umujyi, nyabuneka mushobora kunkunda?

"Narokoye aho mutuye habi".

Ku wa Mbere, Bwana Trump yakoreye mitingi muri leta ya Florida kandi hari n’izindi ateganya gukora muri iki cyumweru muri Iowa, North Carolina, Georgia ndetse agasubira no muri Florida.

Karasira yakorewe agashya ku Isabukuru ye ahabwa Pasiporo ikomeye, tubonye na Murumuna we, gusa birababaje cyane:





Tanga igitekerezo kuri iyi nkuru



Igitekerezo