Batahuwe munsi y’intebe z’imodoka bashaka kujya i Burayi mu buryo bufifitse

Abagabo babiri bo mu gihugu cya Maroc batahuwe ubwo bari bihishe munsi y’intebe z’imodoka yo mu bwoko bwa Mercedes bashaka kwambuka umupaka berekeza i Burayi muri Esipanye mu buryo butemewe n’amategeko, bakaba barahise batabwa muri yombi.

Aba bagabo bombi bafashwe n’inzego z’umutekano z’igihugu cya Esipanye bakorera ku mupaka w’iki gihugu mu gace ka Beni-Enzar aho gihana imbibi na Maroc.
Ikinyamakuru Daily Mail dukesha iyi nkuru, kigaragaza ko ibi bintu byo kwambukana abantu mu buryo nk’ubu bimaze igihe bikorwa cyane ku mupaka wa Maroc na Esipanye, dore ko no mu mwaka ushize hafatiwe umugore atwaye umusore mu ivarisi ashaka kumwambutsa umupaka.
Aba bagabo bombi bo bari bihishe munsi y’intebe, aho bari bazeguye maze bashaka umwanya munsi yazo aba ariho aba bagabo baryama n’ubwo polisi yaje kubatahura ikabavanamo.
Polisi yavuze ko yatahuye ko aba bagabo bari munsi y’ibyuma by’intebe z’imodoka ubwo yarimo kuyisaka kugirango ijye yabona uburenganzira bwo gutambuka.
Polisi yahise ita muri yombi umushoferi wari utwaye iyo modoka yo mu bwoko bwa Benz Mercedes aho ashinjwa ibikorwa bifitanye isano n’ubucuruzi bw’abantu.

PNG - 1.1 Mb
Aba bagabo b’Abanya-Maroc batahuwe aho bari bihishe munsi y’intebe z’imodoka bagerageza kujya i Burayi mu buryo bufifitse


Abantu bakora akazi ko komotsa abimukira mu buryo nk’ubu bamaze kubigira ubucuruzi ngo kuko kugira ngo batambutse umuntu umwe byibura bagomba kwishyurwa ama-Euro hagati ya 3,550 na 4,000 ni ukuvuga akabakaba Miliyoni 4 mu mafaranga y’u Rwanda.

Mu mpera z’umwaka wa 2016 hamwe n’intangiriro za 2017, abimukira barenga 1000 bafatiwe ku mupaka wa Esipanye na Maroc bashaka kwambuka ngo berekeze ku mugabane w’u Burayi mu buryo butemewe n’amategeko. Ibikorwa byo kubakumira byakomerekeyemo abapolisi batanu ba Esipanye n’abandi 50 ba Maroc, nyuma y’uko abo bimukira bashakaga kwinjira ku ngufu barwanyije abashinzwe umutekano.

Muri uku kwezi gushize k’Ukuboza, abimukira bo muri Afurika yo munsi y’ubutayu bwa Sahara barenga 400 babashije kwinjira ku ngufu muri Ceuta muri Esipanye, iki gihugu gihita kirushaho gukaza ingamba zo kubakumira. Kugeza ubu Libya, iza ku isonga mu bihugu byo muri Afurika birimo guturukamo abimukira benshi bashamadukira kujya i Burayi.

Umwaka wa 2016, ni wo mwaka wa mbere mu mateka wagaragayemo umubare munini w’abantu bapfuye bagerageza kwimukira i Burayi baciye mu nyanja ya Mediterranean, umuryango mpuzamahanga w’abinjira n’abasohoka ukaba warabaruye impfu zibarirwa mu 5000.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo
Nimuboba Freddy Kuya 15-03-2018

11/4/1995

Nimuboba Freddy Kuya 15-03-2018

11/4/1995