Bari mu kiriyo cy’uko yapfuye, bakwirwa imishwaro nyuma yo kumubona ahingutse mu rugo

Ni mu gihugu cya Kenya mu gace ka Marindi, aho imiryango yari yateranye mu gutegura imihango yo gusezera ku mugabo witwa Nicholus Nyamwanga bibwiraga ko yapfuye kuko hari hashize iminsi myinshi yaraburiwe irengero, nyamara nyuma bagatungurwa no kumubona atungutse mu rugo bose bagakwirwa imishwaro buri wese yiruka atazi iyo ajya ari nako ubwoba ari bwose bakeka ko yaba ari muzimu we nyamara bari baremejwe n’ibitaro ko umurambo watoraguwe ari uwe.

Kuri uyu wa kabiri tariki ya 16 Mutarama 2018 nibwo Nicholus Okelo Nyamwanga yageze mu rugo mu gihe imiryango yo yari mu kababaro ko kumubura. Nyuma yo kumukubita amaso, umugore we, inshuti, abavandimwe n’imiryango ye bose bari aho bahise biruka kibuno mpa amaguru, buri wese akizwa n’amaguru nyuma yuko bamubonye mu buryo batari biteze cyane ko bari bazi ko yapfuye.

Ubwo yahingukaga mu rugo, uyu mugabo w’imyaka 35 y’amavuko wari amaze amezi agera kuri 2 yose aburiwe irengero, yasanze imiryango ye iri gutegura imihango yo kumusezeraho niko gukwirwa imishwaro buri wese yiruka atazi iyo ajya.

Ikinyamakuru Tuko dukesha iyi nkuru kivuga ko iyi miryango ikimara kubura uyu mugabo bakomeje gutanga amatangazo hirya no hino nyuma hakaza gutoragurwa umurambo mu mugezi wa Migori wahise ujyanwa gusuzumwa mu bitaro bya Migori Level Five hospital ari nabwo uyu muryango wemejwe ko uwo murambo ari wo wa Nicholus Okelo Nyamwanga nyamara atari wo.

Bitewe nuko uyu murambo wari warangiritse ku buryo bukomeye, byatumye imiryango ya Nicholus Nyamwanga yemezwa neza ko uyu murambo ari wo wabo bityo nabo babyemezwa nuko bari bamaze igihe bamubuze.

PNG - 668 kb
Uyu ni umugezi wa Migori watoraguwemo umurambo wiswe uwa Nicholus Okelo Nyamwanga


Ku wa gatatu tariki ya 17 Mutarama 2018, nibwo imiryango ya Nyamwanga yabwiwe ko umurambo we watoraguwe mu mugezi wa Migori ugahita ujyanwa mu buruhukiro bw’ibitaro bya Migori Level Five hospital dore ko aribwo uyu muryango wose wari uteranye kugira ngo utegurire hamwe imihango yo gusezera kuri uyu mugabo.

Ubwo imiryango yari iteranye, umwe mu bagize umuryango wa Nyamwanga yavuze ko babwiwe ko umurambo w’uyu mugabo bawutoye mu mugezi warangiritse ku buryo bukomeye byanatumye bigorana kumenya niba ari we nyirizina.

Francis ni umubyeyi wa Nyamwanga utuye mu gace ka Marindi gaherereye mu burengerazuba bw’igihugu cya Kenya, avuga ko nawe ubwe nk’umubyeyi yagerageje uburyo bwose kugira ngo amenye niba koko uwo murambo ari wo w’umwana we ariko bikarangira bimugoye kubera wari wangijwe n’umugezi bawusanzemo.

PNG - 949.7 kb
Imiryango yari yamaze gutegura imva y’aho igomba gushyingura Nyamwanga


Umubyeyi wa Nyamwanga yakomeje avuga ko nubwo byarangiye yemejwe n’ibitaro ko umurambo watoraguwe mu mugezi ari wo w’umwana we, yakomeje kubihakana ababwira ko atari we bityo ababwira ko agishakisha aribwo yaje kugira amahirwe yo kumubona ahingutse mu rugo ari muzima mu gihe imiryango yiteguraga kumusezeraho.

Nyuma yuko kubw’amahirwe Nyamwanga ahingutse mu rugo, iyi miryango yari iteranye yahise ikwirwa imishwaro itekereza ko yaba ari umuzimu we ariko nyuma baza gushira ubwoba baramwegera niko gusanga ari we kandi ari muzima bityo bongera kwishima batangira no gusubira mu ngo zabo bishimye ko umwana wabo yongeye kugaragara ari muzima nyuma y’amezi 2 yose yari yaraburiwe irengero.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo