Bamwe mu banyeshuri barangije ubuvuzi muri UR barasaba kurenganurwa

Nubwo bemerewe gukora ’Graduation’ nk’abandi banyeshuri barangije amasomo yabo muri Kaminuza y’u Rwanda muri uyu mwaka w’amashuri wa 2018-2019, bamwe mu barangije ubuvuzi (abize imyaka 6) barasaba kurenganurwa kuko n’ugerageje gushaka icyangombwa cyemeza ko arangije amasomo ye, atagihabwa abwirwa ko ngo ibyabo bitarasobanuka neza.

Ni mu gihe mu ntangiriro z’Ugushyingo, byavuzwe ko Kaminuza y’u Rwanda yamaze gukemura ikibazo cy’Abanyeshuri 370 barangije mu ishami ryigisha ibijyanye n’ubuvuzi bari bibuze ku rutonde rw’abazahabwa impamyabumenyi.

Ni ikibazo cyari giturutse ku makuru yavugaga ko hari bamwe mu barangije kwiga ibijyanye n’ubuvuzi muri Kaminuza y’u Rwanda, batazahabwa impamyabumenyi bitewe n’uko hari amasomo batize nk’uko byari byatangajwe n’Inama y’Igihugu y’Amashuri Makuru na Kaminuza (HEC).

Mu nama yabaye igitaraganya yahuje inzego zitandukanye zifite aho zihuriye n’iki kibazo zirimo Minisitiri w’Ubuzima, Dr Diane Gashumba, Minisitiri w’Uburezi, Dr Mutimura Eugène, Umuyobozi Mukuru w’agateganyo wa HEC, Benjamin Muhizi Kageruka, Umuyobozi wa Kaminuza y’u Rwanda, Prof Philip Cotton, Umuyobozi Wungirije, Dr Charles Murigande n’abari bahagarariye abanyeshuri biga muri iri shami ry’ubuvuzi, mu myanzuro yavuyemo harimo ko aba banyeshuri bahabwa impamyabumenyi nk’abandi.

Iyi myanzuro yafashwe muri iyi nama umuntu yavuga ko yasigaye aho kuko kugeza ubu atari ko bimeze kuko uwize ubuvuzi ugerageje kwegera ishami ry’ubuvuzi muri Kaminuza y’u Rwanda rikorera i Remera (ahahoze KIE), ngo bamuhe icyangombwa kigaragaza ko yarangije amasomo ye, bamutera utwatsi.

Umwe mu barangije mu buvuzi muri UR utarashatse ko tuvuga amazina ye, yagiye gusaba icyangombwa ku cyicaro cy’ishamiri y’ubuvuzi aterwa utwatsi, yagize ati "Sinzi aho nari mbonye akazi bansaba ko kubera impamyabumenyi zitarasohoka naba mbahaye icyangombwa cyerekana ko narangije amasomo, ubwo ni bwo nagiye kucyaka ngezeyo bantera utwatsi ngo ibyacu ntibirasobanuka".

Bamwe mu baganiriye n’UMUBAVU, basobanuye ko izingiro ry’ikibazo ari uko uyu mwaka harangije poromosiyo ebyiri zirimo abize imyaka 6 nkuko byari bisanzwe n’abize imyaka 5 muri porogaramu nshya ya Kaminuza y’u Rwanda mu gihe iy’imyaka 6 imaze imyaka irenga 10 isohora abaganga kandi izi poromosiyo zombi zikaba zarakurikiye (Curriculum) integanyanyigisho ebyiri zitandukanye.

Bakomeje bavuga ko ahubwo Kaminuza y’u Rwanda yanashatse kuburizamo imyaka 6 bamwe bize ivuga ko abarangije bose bize imyaka itanu bityo bose bagomba gukora Stage y’amezi 5 ari byo abize imyaka 6 bakomeza gutera utwatsi bavuga ko bireba abize imyaka 5 gusa.


Nk’uko bigaragara mu nyandiko yashyizwe ku rukuta rwabo rwa Twitter, aba banyeshuri baragaragaza agahinda bafite baterwa no kuba bari gusabwa gusubira mu kwimenyereza umwuga (Stage) nk’abanyeshuri kandi bararangije amasomo yabo nkuko byemejwe na Minisitiri w’Intebe muri ’Graduation’ yabereye kuri Stade ya Huye ku wa 08 Ugushyingo 2019, bityo ibi bakabifata nk’akarengane.

Ikindi aba banyeshuri bagaragaza nk’akarengane ni uko bagerageje kwandikira Kaminuza y’u Rwanda (mu ibaruwa dufitiye kopi) bayisaba ibisobanura ku butumwa bari bohererejwe bwo kujya muri Stage, aho izakorerwa, uburyo bazabaho muri Stage, icyo bazaba bitwa (kuko barangije kwiga), no kongererwa igihe cyo kuyitegura bibaye ngombwa ko ikorwa, bagasubizwa gusa ko bemerewe kongererwa igihe cyo gutangira iyo Stage nyamara izindi ngingo basabyeho ibisobanuro ntibazisobanurirwe.

Ku isomo rya Laboratwari (Laboratory) aba banyeshuri bari gusabwa gusubiramo, bagaragaza ko baryize nkuko bigaragara kuri ’Transcript’ yo mu mwaka wa Gatatu y’umwe mu banyeshuri mu bize imyaka 6 dufitiye kopi.

Si ibi gusa kuko banagerageje gusaba ko bakorana inama n’ubuyobozi bwa Kaminuza, ntibayemererwa bityo bakaba bakomeje gusaba ko inzego zirebwa n’iki kibazo zabarenganura.

Mu gushaka kumenya iby’iki kibazo gituma abarangije ubuvuzi by’umwihariko bize imyaka 6 badahabwa ibyangombwa nkuko inama twavuze hejuru yabyanzuye, Dean wa School of Medicine and Pharmacy muri College of Medicine and Health Sciences ikorera i Remera, Dr Jean Claude Byiringiro twagerageje kumuhamagara kuri Telefoni ngendanwa atubwira ko bitewe n’umubare munini aba banyeshuri ngo bahawe ibyari bihari mu bushobozi bwari buhari.

Gusa kandi akavuga ko aba banyeshuri hari ibyo batujuje kugira ngo babe abaganga biteguye kuvura abanyarwanda ariko ntagaragaza ibyo batujuje ibyo ari byo dore ko ku rundi ruhande avuga ko nta porogaramu aba banyeshuri batize.

Gusa kuri Twitter, Kaminuza y’u Rwanda yabaye nk’isubiza ibaruwa aba banyeshuri banditse ivuga ko "ikibazo atari imyaka aba banyeshuri bize ko ahubwo ari icyuho buri muvuzi wese agomba kuziba".

UR yakomeje ivuga ko inzego zirebwa n’iki kibazo zirimo Minisiteri y’Ubuzima, Minisiteri y’Uburezi, HEC (Higher Education Council), RMDC (Rwanda Medical and Dental Council (RMDC)) na Kaminuza y’u Rwanda ziri kugikoraho cyane kugira ngo aba bavuzi bashya bazabashe kuvura abanyarwanda neza.

Twabibutsa ko mu nama yahuje inzego zose zirebwa n’iki kibazo (n’uyu waruciye akarumira yarimo) mu ntangiriro z’uku kwezi ku ya 4 Ugushyingo 2019 , zose zagaragaje ko nta mpamvu n’imwe yatuma aba banyeshuri badahabwa impamyabumenyi nk’abandi.

Icyo gihe uyu muyobozi w’ishuri ry’ubuvuzi (Dean of School of Medicine and Pharmacy), Dr Jean Claude Byiringiro, yavuze ko nyuma y’iyo nama, bemeje ko aba banyeshuri bagomba guhabwa impamyabumenyi.

Yagize ati “Twafashe umwanzuro ko abanyeshuri bazahabwa impamyabumenyi kandi turabyishimiye.”

Muri iyi nama Kaminuza yagaragaje ibimenyetso ku makuru yatanzwe mu igenzura yagaragaje ko nta mpamvu n’imwe yatuma basubika gutanga impamyabumenyi kuri aba banyeshuri.

Dr Charles Muhizi, umuhuzabikorwa mu Ishuri ry’Ubuvuzi yavuze ko yishimiye iki cyemezo, ati “Nishimiye cyane ko twese twumvise ibintu kimwe. Ni amakuru meza iyo wigisha abanyeshuri bakarangiza amasomo yabo neza.”

Umuyobozi Mukuru wa UR, Prof Cotton na we icyo gihe yavuze ko nyuma yo kugirana ibiganiro no kungurana ibitekerezo byiza biteguye gutanga impamyabumenyi ku banyeshuri barangije ubuvuzi.

Amakuru UMUBAVU twamenye ni uko aba banyeshuri barangije ubuvuzi muri Kaminuza y’u Rwanda by’umwihariko abize imyaka 6 ari na bo bafite ikibazo, bamaze kugeza ibaruwa yabo isaba kurenganurwa mu Nteko Ishinga Amategeko y’u Rwanda, umutwe w’Abadepite nkuko umwe muri bo utashatse ko dutangaza amazina ye yabitubwiye.

Uburyo umunyamakuru Gatera yagambaniwe akisanga muri Gereza:





Tanga igitekerezo kuri iyi nkuru



Igitekerezo
Bampigirirora fidele Kuya 29-11-2019

Abo banyeshuri birakwiye ko barenganurwa...ubwose nigute umuntu yamaze gukora graduation aricyo kimenyetso gifatika kdi kigaragara ko yize amasomo ye ateganywa( covered all modules) hanyuma NGO asubire mur stagae... impossible
Inzego zibishinzwe zirenganure abo banyeshuri...Natwe nkabanyarwanda mur rusange bizadushimisha.

Bampigirirora fidele Kuya 29-11-2019

Abo banyeshuri birakwiye ko barenganurwa...ubwose nigute umuntu yamaze gukora graduation aricyo kimenyetso gifatika kdi kigaragara ko yize amasomo ye ateganywa( covered all modules) hanyuma NGO asubire mur stagae... impossible
Inzego zibishinzwe zirenganure abo banyeshuri...Natwe nkabanyarwanda mur rusange bizadushimisha.

Orli Kuya 28-11-2019

Abarezi babigishije babona igihe kitaragera ko barangiza.ikigaragara babonako ntacyobaba bahaye abanyarwanda.nibasubire ku ishuri.