Bagizwe ingumba ku ngufu kubera bafite Virus itera SIDA

Ubushakashatsi bwakozwe muri Afrika y’Epfo bwerekana ko abagore barenga 50 banduye Virusi itera SIDA bagizwe ingumba ku ngufu mu bitaro bitandukanye muri icyo gihugu.

Ubwo bushakashatsi bwashizwe ahabona ejo ku wa Mbere, bwakozwe mu mwaka wa 2015 ubwo imiryango iharanira uburenganzira bw’abagore yagezaga ikibazo cyayo ku muryango ushinzwe iyubahirizwa ry’uburinganire hagati y’abagabo n’abagore muri icyo gihugu (CGE) ufise amazina y’abantu 48 bavugwa ko bagizwe ingumba ku ngufu.

Urwo rwego rwahise rutangira kwegeranya ibyemezo kuri abo bagore bavugwaho kuba baratewe ubugumba.

Keketso Maema, uyoboye umuryango CGE, muri icyo cyegeranyo agira ati "Abagore bose batugannye bari abiraburakazi, abenshi banduye Virusi itera SIDA".

Ubwo bubisha buvugwa muri icyo cyegeranyo bwakozwe hagati ya 2002 na 2015.

Icyo cyegeranyo kigira kiti "Mu gihe barimo babyara (…) bategetswe gutera igikumwe (gusinya) ku ngufu ku rwandiko bagiye kumenya nyuma ko rwari urwo kwiyemeza ko batanze uburenganzira bwo gukoresha uburyo bwose kugira ngo babatere ubugumba".

Abakoze ubwo bushakashatsi basanze hari abaganga muri ibyo bitaro batera ubwoba abo bagore ko mu gihe batatera igikumwe kuri urwo rwandiko badashobora kuvurwa.

Urwo rwego rwarangije icyegeranyo cyarwo rumenyesha ko abo bagore bahohotewe bikomeye kandi ko bakorewe "ibikorwa bihonyora uburenganzira bwabo".

Urwo rwego kandi rushinja abo baganga ko barenze ku "masezerano biyemeje yo kuvura abantu".

Icyo cyegeranyo cyashyikirijwe Minisiteri y’Ubuzima muri Afrika y’Epfo gusa ntiyashatse kugira icyo ibivugaho.


Aha aba bagore bo muri Afrika y’Epfo bari mu myigaragambyo

Byari amarira n’agahinda gusa mu gusezera kuri Kizito Mihigo mu rugo rw’umubyeyi we, Diane Rwigara yararuciye ararumira amaze kumusezeraho:





Tanga igitekerezo kuri iyi nkuru



Igitekerezo