Armenia-Azerbaijan: Abagera hafi ku 5,000 bamaze gupfira mu mirwano

Perezida w’u Burusiya, Vladimir Putin yavuze ko abantu bagera hafi ku 5,000 bamaze kwicirwa mu ntambara y’ingabo za Armenia n’iza Azerbaijan zipfa akarere ka Nagorno-Karabakh.

Uwo mubare uri hejuru cyane ugereranyije n’uwatangajwe n’impande zombi.

Bwana Putin yavuze ko buri munsi avugana n’impande zombi inshuro nyinshi, kandi ko nta ruhande azabogamiraho muri iyi ntambara.

Yavuze ko u Burusiya butemeranya na Turukiya ishyigikiye Azerbaijan kuri iyo mirwano.

Yanasabye Leta Zunze Ubumwe z’Amerika gufasha mu gushaka amahoro muri ako karere.

Armenia na Azerbaijan bishinjanya kurenga ku masezerano y’agahenge agamije kwita ku mbabare mu karere ka Nagorno-Karabakh.

Imirwano yongeye kubura mu kwezi gushize muri ako karere, kemewe ku rwego mpuzamahanga nk’akarere ka Azerbaijan ariko gategekwa n’abo mu bwoko bw’abanya-Armenia.

Ni yo mirwano ya mbere ikaze ibayeho muri aka karere kuva harangira intambara yamaze imyaka itandatu yasojwe n’agahenge mu mwaka wa 1994.

Putin yavuze iki nyirizina?

Uburusiya bufitanye umubano mu bya gisirikare na Armenia ndetse bufite ikigo cya gisikare muri icyo gihugu. Ariko bunafitanye umubano wa hafi na Azerbaijan.

Mu nama yanyuze kuri Televiziyo, Perezida Putin yagize ati "Hari abapfuye benshi ku mpande zombi, barenga 2,000 kuri buri ruhande".

Yongeyeho ko umubare w’abapfuye "uri hafi kugera ku 5,000".

Uyu ni umubare uri hejuru cyane ugereranyije n’amagereranya yabanje, umubare uheruka gutangazwa n’abategetsi bavugaga ko abapfuye bari munsi ya 1,000.


Perezida Putin avuga ko nta ruhande azabogamiraho muri iyi ntambara

Abategetsi b’akarere ka Nagorno-Karabakh bavuze ko abasirikare babo 874 n’abaturage b’abasivile 37 bapfuye kuva ku itariki ya 27 y’ukwa cyenda.

Azerbaijan ivuga ko abaturage bayo 61 bamaze kwicwa, ariko ntiyatangaje umubare w’abasirikare bayo bapfuye.

Bwana Putin yongeyeho ko "ahora" avugana na Minisitiri w’intebe wa Armenia Nikol Pashinyan na Perezida Ilham Aliyev wa Azerbaijan kandi ko nta ruhande azabogamiraho.

Yagize ati "Mvugana nabo kuri telefone inshuro nyinshi ku munsi".

Bwana Putin yavuze ko atemeranya na Turukiya kuri iyi mirwano.

Yongeyeho ko nubwo Perezida Recep Tayyip Erdogan "ashobora kugaragara nk’umunyamahane, ariko ni umunyapolitike wumvikana kandi ukorana n’Uburusiya wo kwizerwa".

Turukiya yasezeranyije kohereza abasirikare no gufasha Azerbaijan mu bya gisirikare niramuka ibisabwe.


Iyi ni yo mirwano ya mbere ikaze ibayeho hagati y’impande zombi kuva mu 1994

Bwana Putin yasabye Amerika "gukorera hamwe" n’u Burusiya mu kurangiza iyi mirwano.

Biteganyijwe ko ejo ku wa Gatanu haba ibiganiro hagati ya Armenia na Azerbaijan i Washington, aho umunyamabanga wa leta ya Amerika Mike Pompeo azahura na ba minisitiri b’ububanyi n’amahanga b’ibihugu byombi.

Amerika, u Burusiya n’u Bufaransa bifasha mu kuyobora itsinda ry’ubuhuza bw’ikigo OSCE Minsk Group, cyasabye ko habaho agahenge.


Abasirikare ba Armenia mu mirwano mu karere ka Nagorno-Karabakh

Turumiwe!!! ABATURAGE BASOHOWE MU NZU ZIRASENYWA N’IBINTU BYOSE BITABWA HANZE N’UWO BISE UMUKIRE NONE BARATABAZA:





Tanga igitekerezo kuri iyi nkuru



Igitekerezo