Amerika yirukanye Abadiplomate babiri bahagarariye Cuba muri ONU

Leta Zunze Ubumwe za Amerika zirukanye Abanya-Cuba babiri bari bahagarariye igihugu cyabo mu Muryango w’Abibumbye (ONU) i New York, zishinja gukora ibikorwa bibangamiye umutekano wa Amerika, nkuko bivugwa n’umuvugizi w’urwego rw’ubabanyi n’amahanga rwa Amerika.

Abandi bakozi ba Cuba basigaye bakora mu biro biyihagarariye muri ONU ubu bategetswe kutarenga agace ka Manhattan ahari icyicaro cya ONU, nkuko bivugwa na Morgan Ortagus, umuvugizi w’urwego rw’ububanyi n’amahanga rwa Amerika.

Amerika nta makuru arenzeho yari yatanga kuri ibyo bikorwa ishinja abo bakozi ba Cuba.

Bruno Rodriguez, Minisitiri w’ububanyi n’amahanga wa Cuba, yavuze ko ibyakozwe n’Amerika "nta shingiro na busa bifite".

Mu butumwa yatangaje mu rurimi rw’Icyespanyole ku rubuga nkoranyambaga rwa Twitter ku munsi w’ejo ku wa Kane, Bwana Rodriguez yavuze ko ibyo Amerika ishinja Cuba ari igitutsi nyandagazi ku gihugu cye.

Yongeyeho ko iyirukanwa ry’abo bategetsi babiri ryateje umwuka mubi hagati y’ibihugu byombi.

Abategetsi baturutse mu bice bitandukanye by’isi bitezwe guhurira mu nama ngarukamwaka ya ONU i New York mu minsi micye iri imbere.

Uko kwirukanwa ni cyo gikorwa cya vuba aha kibayeho mu bushyamirane mu mibanire hagati ya Amerika na Cuba.

Mu kwezi kwa Karindwi, Cuba yamaganye ubushakashatsi bwakozwe n’abarimu bo kuri Kaminuza ya Pennsylvania muri Amerika bwasanze ubwonko budakora neza ku bategetsi ba Amerika bigeze guhagararira iki gihugu muri Cuba.


Mu mwaka wa 2016, abadiplomate bo muri ambasade y’Amerika mu murwa mukuru Havana wa Cuba binubiye kugira ibimenyetso by’indwara bidasobanutse birimo kugira iseseri no kutumva

Amerika yakomeje gushinja Cuba kugaba ibitero by’urusaku cyangwa amajwi akomeretsa ibice byo mu bwonko (bizwi nka ’sonic attacks’), nyuma yaho benshi mu bahagarariye Amerika muri Cuba binubiye ko bagira ibimenyetso by’indwara bidasobanutse birimo kugira iseseri no kutumva.

Abarimu ba Kaminuza bakora mu kigo cya Cuba cy’ubuvuzi bw’indwara zo mu bwonko bavuze ko ibyagezweho n’abo bashakashatsi bo muri Amerika bidasobanutse.

Ku munsi w’ejo ku wa Kane, ubushakashatsi bwakozwe n’abarimu ba Kaminuza bo muri Canada, bwavuze ko ibyo abo badiplomate ba Amerika bahuye nabyo icyo gihe bishobora kuba byaratewe n’uburozi bwibasira urwungano rwo mu bwonko buturuka mu byo Abanya-Cuba basanzwe bakoresha mu kwirinda udusimba dutera indwara.

Kuva yagera ku butegetsi, Perezida Donald Trump yakomeje kongera igitutu yotsa Cuba, ahindura umujyo w’ibikorwa byakozwe n’uwamubanjirije byo kugerageza kubyutsa umubano hagati y’ibihugu byombi.

Mu kwezi kwa Gatandatu, ubutegetsi bwa Bwana Trump bwashyizeho ibihano bishya kuri za kompanyi zo muri Amerika zikora ingendo zerekeza kuri icyo gihugu cy’ikirwa cya Cuba.

Steven Mnuchin, umunyamabanga w’urwego rw’imari rwa Amerika, yavuze ko iryo kumira rizafasha mu gutuma amadolari ya Amerika adakomeza kugera mu ntoki z’igisirikare, ubutasi n’inzego z’umutekano za Cuba.


Aha ni ku cyicaro cya ONU i New York muri Leta Zunze Ubumwe za Amerika





Tanga igitekerezo kuri iyi nkuru



Igitekerezo