Amagambo mabi Trump yavuze kuri Afurika yateje impagarara na Mushikiwabo yagize icyo abivugaho

Nyuma y’amagambo atari meza Donald Trump aherutse gukoresha avuga bimwe mu bihugu bya Africa ko ari imyanda, ibiro bishinzwe ububanyi n’amahanga muri Africa y’Epfo byahamagaje umuyobozi mukuru wungirije w’abahagarariye America muri iki gihugu ngo ahatwe ibibazo.

Bivugwa ko Perezida Trump yavuze ko ibihugu bya Africa ari “imisarane” (“shithole countries”) ubwo yaganiraga n’abandi bayobozi ba America kuri politiki y’abinjira n’abasohoka.

Gusa, Trump akomeje guhakana ibyavuzwe kubera iyo mvugo ye ko avangura amoko. Yabwiye abanyamakuru ati “Ntabwo ndi umuntu uvangura amoko. Umuntu utarangwaho ivanguramoko mu bandi bose mwavuganye.”

PNG - 393.7 kb
Trump ahakana amagambo ashinjwa kuvuga avuga ko nta rondamoko agira


Itangazo ryasohowe n’urwego rushinzwe ububanyi n’amahanga muri Africa y’Epfo rivuga ko iki gihugu kifatanyije n’Umuryango wa Africa yunze ubumwe mu buryo wakiriye amagambo ya Perezida Donald Trump.

Africa yunze Ubumwe yavuze ko amagambo ya Trump “ateye ubwoba, ahangayikishije andi ababaje”, ndetse igasaba Donald Trump gusaba imbabazi.
Africa y’Epfo ivuga ko umubano hagati yayo na America ugomba gushingira ku bwubahane.

Ibihugu bya Africa, nka Namibia, Botswana na Ghana ni bimwe mu byasohoye amatangazo byamagana amagambo ya Perezida Trump.

Ku wa gatandatu w’icyumweru gishize, umwe mu banyamakuru bari baherekeje Minisitiri w’Ububanyi n’Amahanga w’u Bushinwa Wang Yi wakiriwe na Perezida Paul Kagame, yabajije Minisitiri w’Ububanyi n’Amahanga w’u Rwanda kugira icyo avuga ku magambo ya Donald Trump.

Mushikiwabo yamusubije agira ati “Navuga ibintu bibiri kuri ayo magambo, icya mbere niba yaravuzwe byaba bibabaje cyane, icya kabiri ni uko hari ukuri kumwe ku byerekeye Africa, kandi Africa igomba guhangana na byo, mu yandi magambo twebwe nk’umugabane, hari ibyo tugomba gukora tugaha agaciro abantu ba Africa, tukubaka ubukungu bwacu.

PNG - 842 kb
Mushikiwabo avuga ko Trump yaba yarapfobeje Afurika niba koko yaravuze ibyo ashinjwa


Amagambo nk’ayo, na none navuga ko ntizeye neza ko yavuzwe, ariko niba ari byo, rwose ku mugabane ni amagambo apfobya, kandi atari ngombwa.”

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo