Amafaranga ya Buruse atunga abanyeshuri bo muri Kaminuza yongerewe

Mu gitondo cyo kuri uyu wa Gatanu tariki 16 Gashyantare 2018, nibwo Dr Eugene Mutimura, Minisitiri w’Uburezi mu Rwanda, yatangarije mu Nteko Ishinga Amategeko y’u Rwanda ko Leta y’u Rwanda yazamuye amafaranga atunga abanyeshuri bahawe inguzanyo yo kwiga azwi nka buruse akavanwa ku mafaranga y’u Rwanda 25.000 agashyirwa kuri 35.000.

Minisitiri w’Uburezi, Dr Eugene Mutimura yakomeje atangaza ko ibi byanenejwe n’inama y’Abaminisitiri yateranye ku wa Gatatu tariki 14 Gashyantare 2018, mu rwego rwo kurushaho kunoza imyigire n’ubuzima bw’abanyeshuri biga muri Kaminuza y’u Rwanda.

Abanyeshuri bakunze kugaragaza kenshi ko amafaranga 25.000 y’u Rwanda babonaga buri kwezi, ari macye cyane ugereranyije n’uko byifashe hanze ku bijyanye n’ibiciro ku masoko, dore ko ayo ari yo avamo icumbi, ibyo kurya ndetse n’ibindi by’ibanze bibafasha mu myigire yabo.

Leta yafashe icyemezo cyo kuzamura aya mafaranga agashyirwa ku 35.000, nyuma y’uko muri 2015, uwari Minisitiri w’Uburezi, Dr Papias Musafiri Malimba yari yavuze ko aya mafaranga adashobora kongerwa kuko Leta itabona ubwo bushobozi.

Abanyeshuri benshi bari bamaze igihe basa n’abemeye kwakira ko batazongererwa amafaranga kubera ibyari byatangajwe na Dr Malimba.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo