Ali Kiba na Sheebah biteguye gususurutsa Abanyarwanda

Sheebah na Ali Kiba biteguye gususurutsa Abanyarwanda mu gitaramo cya “East African Party” kiba buri mwaka ku itariki ya mbere y’umwaka mushya.

Mu kiganiro n’abanyamakuru Ali Kiba umwe mu bahanzi bubatse izina muri aka karere, yagize ati “nishimiye kongera kuza gutaramana n’Abanyarwanda ndetse icyo nababwira ni uko mu Rwanda mpafata nko mu rugo.”

Ali Kiba avuga ko yiteguye gushimisha Abanyarwanda ati “Ndi kumwe na band, ndi kumwe n’ababyinnyi, ndabizeza kuzabashimisha.”

JPEG - 102 kb
Mushyoma Joseph bita Boubou uyobora EAP ni umwe mu baje kwakira Ali Kiba (Ifoto-Igihe)

Abajijwe ikintu gishya azanjye, Ali Kiba yavuze ko ari ibanga ko ibindi bizabibonera ku rubyiniro.

Avuga ko yishimiye ubutumire bwa East Africa Promoters isosiyete tegura igitaramo ngarukamwaka cya East African Party.

Ati “Nkunda muzika y’u Rwanda ni yo mpamvu mbonye ubutumire byanshimishije cyane.Niteguye gusangira umwaka mushya n’Abanyarwanda.”

Yijeje Abanyarwanda kuzabaha muzika y’umwimerere ndetse akabaririmbira na zimwe mu ndirimbo ze zakunzwe n’abatari bake mu Rwanda ndetse n’izikunzwe kuri ubu.

Nyuma ya Ali Kiba haje Sheebah Karungi umwe mu bakunzwe muri Uganda, mu kiganiro yagiranye n’abanyamakuru yavuze ko yari amaze amezi atatu avuye mu Rwanda ati “maze amezi atatu mvuye mu Rwanda, ariko ibyo mbazaniye ni bishya.Nazanjye n’umubyinnyi wa mbere muri Uganda, kandi uwo mubyinnyi tumaranye imyaka 7, twarabyinanye ndizera ko muzabona urubyiniro rusa neza.”

JPEG - 168 kb

Mushyoma Josesph bakunze kwita Boubou, umuyobozi wa sosiyete ya “East African Promoters” isanzwe itegura iki gitaramo yabajijwe ni ba nta gahunda yo kuzajyana East African Party mu ntara, asubiza ati “Abanyakigali bazakomeza barebe ibyo bamenyereye n’abandi nabo tuzajya tubategurira ibyabo.”

Igitaramo cya East African Party kigiye kuba ku nshuro ya 10.Nyuma ya Sheebah na Ali Kiba kizitabirwa n’abandi bahanzi bo mu Rwanda nka Riderman, itsinda rya Tuff Gngz, Buravan Bruce Melodie n’abandi.

Iki gitaramo kizabera kuri Sitade Amahoro ku mugoroba wo kuri uyu wa Mbere tariki ya 1 Mutarama 2018.





Tanga igitekerezo kuri iyi nkuru



Igitekerezo