Akarere ka Huye kabonye umuyobozi mushya w’agateganyo usimbura Meya Muzuka

Akarere ka Huye abonye umuyobozi mushya nyuma yuko abagize Inama Njyanama bakoze inama idasanzwe muri iki gitondo bakemeza Madamu Uwamaliya Veneranda nk’Umuyobozi w’agateganyo w’aka karere ugomba kuba asimbuye meya Muzuka Eugene uherutse kweguzwa ari kumwe n’abamwungirije bose.

Mu gitondo cyo kuri uyu wa Mbere tariki 4 Kamena 2018, nibwo abagize Njyanama y’aka karere bari kumwe na Guverineri w’iyi Ntara, Madamu Mureshyankwano bateranye bemeza ko uyu mugore wari usanzwe ari umukozi muri kaminuza y’u Rwanda ishami rya Huye aba ayobora aka karere mu gihe cy’iminsi 30 y’agateganyo.

Meya Muzuka Eugene ari kumwe n’uwari umuyobozi w’akarere wungirije ushinzwe ubukungu, Ntarwasibo Cyprien n’uwari umuyobozi w’akarere wungirije ushinzwe imibereho myiza y’abaturage begujwe kuwa kane tariki 30 Gicurasi 2018, aho Njyanama yari yavuze ko basabwe ibisobanuro ku makosa yabo ajyanye n’imiyoborere y’akarere icyo gihe ngo bananirwa kwisobanura.

Icyo gihe Perezida w’Inama Njyanama y’akarere ka Huye yari yabwiye ikinyamakuru Ukwezi.com ko Impamvu ya mbere yatumye aba bayobozi birukanwa ari uko batigeze bashyira mu bikorwa inama bagiriwe n’Inama njyanama.

Yagize ati "Ikindi ni ibibazo bikomeye byagaragajwe n’Umugenzuzi Mukuru w’Imari ya Leta, byerekeye imishinga minini. Twabahaye umwanya uhagije wo kwisobanura ariko byarangiye abajyanama batanyuzwe.".

PNG - 607.3 kb
Uyu ni Madamu Uwamaliya Veneranda wagizwe meya w’agateganyo w’akarere ka Huye
PNG - 463.3 kb
Ubwo abagize Inama Njyanama bemezaga ko Uwamaliya aba ayoboye akarere ka Huye by’agateganyo

@Umubavu.com





Tanga igitekerezo kuri iyi nkuru



Igitekerezo