Afurika y’Epfo yasohoye impapuro zo gufata Abanyarwanda babiri baregwa kwica Col Karegeya

Ubushinjacyaha bw’Afurika y’Epfo buvuga ko bwasohoye impapuro zo guta muri yombi abantu babiri bacyekwaho kwica uwahoze akuriye ubutasi bw’u Rwanda.

Umurambo wa Col Patrick Karegeya wasanzwe muri Hotel Michelangelo y’i Johannesburg mu ijoro rya nyuma ry’umwaka wa 2013.

Uru rwego rwigenga AfriForum rusabira ubutabera Col Karegeya, ruvuga ko rwamenyeshwe n’ubushinjacyaha bw’iki gihugu ko hasohowe impapuro zo guta muri yombi babiri muri bane bacyekwaho kwica Col Karegeya.

Adv. Gerrie Nel uyobora AfriForum iri kunganira umuryango wa Patrick Karegeya yabwiye BBC ko abantu babiri ari Ismael Gafaranga na Alex Sugira.

Mu kwezi kwa mbere uyu mwaka nibwo hatangiye gukurikirana mu butabera ikirego ku iyicwa rya Co Patrick Karegeya.

Icyo gihe havuzwe abantu bane bacyekwaho kurugiramo uruhare; Appollo Ismael Gafaranga Kiririsi, Alex Sugira, Nshizirungu Vianney na Samuel Niyoyita.

Muri uko kwezi umucamanza Mashiane Mathopa nibwo yategetse ko iki kirego gihabwa ubushinjacyaha, bikaba byari biteganyijwe ko azashyiraho impapuro zo guta muri yombi abaregwa.

Bivugwa ko ubusabe bwo kohereza muri Afurika y’Epfo abo bacyekwa nibumara gutangwa, ubushinjacyaha bw’Afurika y’Epfo buzahita bwandikira polisi mpuzamahanga, Interpol, ngo itange ikizwi nka "Red Notices" ngo abo bacyekwa batabwe muri yombi.

Adv. Nel avuga ko iyi ari "intsinzi ikomeye", ariko akavuga ko iki ari "n’ikimenyetso ko ubushinjacyaha bwakoresheje nabi urwego rw’ubucamanza kuko impapuro zo guta muri yombi zatanzwe nta rindi perereza rikozwe".

"Ibi bigakorwa nyuma yaho ubushinjacyaha bugaragarije ko budashobora gufata icyemezo cyo kuburanisha bugendeye ku bimenyetso bihari busaba ko hakorwa iperereza ry’ubucamanza".

Mu kwezi kwa kane uyu mwaka, urukiko rwa Randburg Magistrate’s Court i Johannesburg rwari rwongeye koherereza iyi dosiye ubushinjacyaha bw’Afurika y’Epfo ngo bufate icyemezo niba bwakurikirana mu mategeko abacyekwaho kwica Col Karegeya.

Umuryango wa Col Karegeya ushinja leta y’u Rwanda urupfu rwe - Leta y’u Rwanda ntabwo yigeze yemera uruhare ishinjwa mu kwica Col Karegeya cyangwa ngo iruhakane yeruye.

Mu masengesho ku gihugu mu 2014, Perezida Paul Kagame yabaye nk’ukomoza ku byari bimaze kuba kuri Col Karegeya, yagize ati: "Ntawagambanira u Rwanda ngo abikire. Uwari we wese, ni ikibazo cy’igihe gusa".

Afurika y’Epfo ivuga ko abaregwa bari mu Rwanda, gusa ibihugu byombi nta masezerano yo guhana abaregwa ibyaha bifitanye kugira ngo urwandiko nk’uru rwo guta muri yombi rushyirwe mu bikorwa.

Kuri iki, Adv. Gerrie Nel yabwiye BBC ati: "Dufite icyizere ko abantu bakurikiza amategeko bazatuma ubutabera bugerwaho".

Guhungira muri Afurika y’Epfo kwa Col Patrick Karegeya na Gen Kayumba Nyamwasa, ibikorwa bya politiki leta y’u Rwanda yabashinjaga gukorerayo, hamwe no kwicwa kwa Karegeya no kugerageza kwica Kayumba byazambije umubano hagati y’ibi bihugu kuva mu 2014.

Urwego AfriForum ruvuga ko rwo n’umuryango wa Col Karegeya "bazakomeza gukurikiranira hafi" iyi dosiye.


Col Patrick Karegeya wahoze akuriye ubutasi bw’u Rwanda yiciwe muri Hotel yo muri Afurika y’Epfo

Inkuru ya BBC





Tanga igitekerezo kuri iyi nkuru



Igitekerezo