Africa izabona urukingo rwayo rwa COVID-19 ryari?

Muri iki cyumweru abashakashatsi batangaje ko urukingo rwa Coronavirus ruri gukorwa na Kaminuza ya Oxford rugaragaza ko rwaba rukora kandi rubatura ubwirinzi bw’umubiri kuri iyi virus.

Igerageza ryakozwe ku bantu 1,077 barutewe ryaberetse ibimenyetso ko rutuma abasirikare b’umubiri n’uturemangingo twitwa ’T-cells’ duhita dushobora kurwanya Coronavirus.

Abakurikira BBC World Service Radio babajije ibibazo byinshi umuganga, cyane cyane bibaza icyo iyo ntambwe isobanuye kuri Afurika.

Tagreed wo muri Sudan yabajije Dr Isaac Bogoch, inzobere mu ndwara z’ibyorezo n’umushakashatsi muri Kaminuza ya Toronto muri Canada, igihe urwo rukingo rwabonekera muri Africa, cyangwa niba ruzanahagera.

Dr Isaac Bogoch yaramusubije ati "Iki ni ikibazo gikomeye. Gusa urukingo rugomba gusaranganywa ku buryo bungana ku rwego rw’isi, ntabwo rushobora kuba urw’ibihugu bikize ngo bikingire abantu babyo bonyine.

"Ntabwo kugeza ubu biramenyekana uko ruzaterwa abantu ku rwego rw’isi, ariko ni ngombwa cyane ko nta muntu uzasigara inyuma.

"Ibyo biganiro byamaze gutangira hagati y’Ishami ry’Umuryango w’Abibumbye ryita ku buzima, OMS/WHO na kompanyi nini ziri gukora izi nkingo".

Bisa n’aho hakiri kare, ariko igerageza ry’inkingo zakozwe riri gukorwa ahantu hanyuranye ku isi ku bantu.

Gukora, kugerageza no kwemeza urukingo, ni igikorwa ubundi gifata imyaka, rimwe na rimwe irenga 10, gusa ubu abahanga bari gukora ibishoboka ngo iyo mirimo ikorwe mu gihe cy’amezi.

"Intambwe ikomeye iri guterwa"

Urukingo rwakozwe na Kaminuza ya Oxford yo mu Bwongereza ubu rwatangiye kugeragezwa ku bantu bagera ku 30,000 muri Amerika, 2,000 muri Afurika y’Epfo na 5,000 muri Brazil.

Abahanga bo mu bindi bihugu nka Leta Zunze Ubumwe za Amerika, u Bushinwa, u Burusiya na Australia na bo batangiye igerageza ku bantu ry’inkingo bakoze.

Ejo ku wa Kabiri, Perezida Donald Trump yanditse kuri Twitter ko hari "intambwe ikomeye iri guterwa ku nkingo n’imiti". Amerika ni cyo gihugu kizahajwe n’iyi virus kurusha ibindi ku isi.

James Gallagher, umunyamakuru wa BBC mu ishami ry’ubuzima, avuga ko bishoboka ko urukingo rwa Coronavirus rushobora kwemezwa mbere y’uko uyu mwaka urangira.

Umubare w’abamenyekanye banduye Coronavirus muri Afurika umaze kuba 737,867 abo yishe ni 15,443 nk’uko bivugwa n’ikigo gishinzwe kurwanya ibyorezo cy’Umuryango w’Ubumwe bw’Afurika.

Mu Rwanda, abamaze kwandura Covid-19 ni 1,655 abo imaze kwica ni batanu, mu Burundi abamaze kuyandura ni 338 imaze kwica umuntu umwe nk’uko bivugwa na Minisiteri z’Ubuzima z’ibi bihugu.


Imirimo yo gukora urukingo yafataga imyaka iri kwihutishwa ngo ifate amezi

Barafinda arishinganishije, abantu bavuge kuko nibavuga niho hazavamo ibisubizo, nibabapfuka iminwa:





Tanga igitekerezo kuri iyi nkuru



Igitekerezo