Abo COVID-19 imaze kwica ku isi barenze miliyoni imwe

Umubare w’abamaze kwicwa n’icyorezo cya Covid-19 ku isi wamaze kurenga miliyoni imwe, nkuko abashakashatsi babivuga, mu gihe uturere twinshi ku isi tugitangaza imibare irimo kwiyongera kw’ubwandu bushya.

Ibarura ryakozwe na Kaminuza ya Johns Hopkins yo muri Amerika rigaragaza ko impfu muri Amerika, Brazil n’u Buhinde zihariye hafi kimwe cya Kabiri cy’abantu bose Covid-19 imaze kwica ku isi.

Inzobere ziburira ko umubare nyirizina w’abo imaze kwica ushobora kuba ari munini cyane kurushaho.

Umunyamabanga Mukuru w’Umuryango w’Abibumbye (ONU/UN), António Guterres yavuze ko uyu ari umubare "urenze ukwemera" kandi ko ari "intambwe ibabaje" isi iteye.

Mu butumwa bwa Video yongeyeho ati "Ariko na none ntabwo tugomba na rimwe kwibagirwa ubuzima bwa buri muntu".

Ati "Bari ba Papa na ba Mama, abagore n’abagabo, basaza bacu na bashiki bacu, inshuti [zacu] ndetse n’abo twakoranaga. Akababaro kariyongereye kubera ubugome bw’iyi ndwara".

Uyu mubare w’abo imaze kwica ugezweho hashize hafi amezi 10 umuntu wa mbere wayanduye atangajwe i Wuhan mu Bushinwa.

Ubu iki cyorezo kimaze kugera mu bihugu 188 aho abantu barenga miliyoni 33 bamaze gutangazwa ko banduye.

Ingamba nka gahunda ya guma mu rugo n’izindi zo kugerageza guhagarika ubwandu bwa Coronavirus zatumye ubukungu bw’ibihugu byinshi buhungabana.

Hagati aho, ibikorwa byo gukora urukingo rwo kwirinda Covid-19 birakomeje nubwo ishami rya ONU ryita ku buzima (OMS/WHO) ryaburiye ko abo yishe bashobora kuzagera kuri miliyoni ebyiri ku isi mbere yuko urukingo rugera henshi ku isi.

Ubu Amerika ni cyo gihugu gifite umubare wa mbere munini ku isi w’abo imaze kwica, barenga 205,000. Hakurikiraho Brazil aho imaze kwica abarenga 142,000 n’u Buhinde aho imaze kwica abarenga 95,500.


Imihango yo gushyingura abishwe na Covid-19 ikorwa umutekano wigengeserewe bikomeye

Umuturage abajije Ingabire Victoire ikibazo gikomeye! Anavuze ku byemezo by’Abaminisitiri, byose urabyiyumvira muri iyi Video:





Tanga igitekerezo kuri iyi nkuru



Igitekerezo