Abibye imisanzu y’abaturage ya mituweli bari kuyiryozwa

Ba rwiyemezamirimo batanu bibye imisanzu y’ubwisungane mu kwivuza ubu ngo bari kuyishyura, aba ni abafasha abaturage batamenyereye ikoranabuhanga kwishyura ubwisungane mu kwivuza kuko ubu ari ryo ryifashishwa.

Bamwe mu bafasha aba baturage ngo icyo bashinzwe ni ugufasha umuturage kwishyura, kumuha inyemezabwishyu no kumwereka ubutumwa ko umusanzu we wakiriwe. Bamwe ariko bashingira ku bujiji no kutamenya ikoranabuhanga kuri bamwe mu baturage bagatwara udufaranga twabo.

Pierre Kayitana ushinzwe ikoranabuhanga muri RwandaOnline avuga ko ba rwiyemezamirimo bafasha abantu kwishyura amafaranga y’ubwisungane mu kwivuza tari ababitsi.

Ati “uriya ni ufasha umuturage kwishyura akanamuha inyemezabwishyu kandi anafite ubutumwa kuri telephone ko amafaranga yageze mu kigo cy’ubwishingizi.”

Hari abagiye bumva ko aba bantu ari abakusanya amafaranga y’umudugudu bakayashyira umukozi w’IREMBO nyamara ngo sibyo kuko bariya icyo bashinzwe ari ugufasha abatamenyereye ikoranabuhanga kwishyura gusa.

Aba bantu bafasha abaturage bose hamwe mu gihugu bagera ku 3 200, batanu muri bo ngo nibo byamenyekanye ko bibye miliyoni 3,6. Babiri barafashwe kugeza ubu ngo bamaze kwishyura miliyoni 1,5.

Alexis Mulisa ushinzwe ishami ry’ubwisungane mu kwivuza muri RSSB yemeza ko ibibazo bisigaye by’abaturage batibona ku rutonde rw’abishyuye kandi barishyuye ari bicye ko bisigaranye abafite ibibazo byihariye.

Gusa abaturage mu mirenge ya Kamonyi baherutse kubwira Umuseke ko abafite bene ibi bibazo ari benshi.

Avuga ko ubu umuntu abasha no kwirebera ubwe ko umusanzu yatanze wageze kuri RSSB kuri telephone ye aciye kuri *878#.

Abayobozi ngo ntibakwiye gukoresha imbaraga ngo bese imihigo yabo

Bivugwa ko hari abayobozi bakoresha imbaraga ngo abaturage batange ubwisungane mu kwivuza, ababima serivisi runaka, abafatirirwa amatungo n’ibindi.

Ahanini ngo intego yabo usanga ari ukugira ngo bese imihigo y’Uturere baba barahize imbere ya Perezida wa Republika.

Dr Alvera Mukabaramba Umunyamabanga wa Leta ushinzwe imibereho y’abaturage avuga ko ibi bidakwiye ahubwo igikwiye ari uko umuturage yumvishwa akamaro k’ubwisungane mu kwivuza maze akanumva ko gutanga umusanzu wabwo ari ngombwa.

Dr Mukabaramba avuga ko nubwo hakiri ibibazo bimwe na bimwe muri mutuweli ariko akamaro kayo kamaze kugaragara ubajije abayivurijeho n’igiciro bishyuye.

Guhera kuri uyu wa kane MINALOC iratangiza ubukangurambaga muturere ihereye muri Rutsiro nka hamwe mu bari inyuma mu kwitabira ubwisngane mu kwivuza.

Umubavu.com





Tanga igitekerezo kuri iyi nkuru



Igitekerezo