Abavuzi Gakondo bizeye ko imiti bashyikirije NIRDA izavamo uvura COVID19

Urugaga rw’Abavuzi Gakondo rwatangaje ko rwamaze gushyikiriza Ikigo cy’ubushakashatsi n’iterambere ry’inganda mu Rwanda (NIRDA), imiti bizeye ko ishobora kuzavamo uwemezwa nk’ushobora kurokora Isi ukavura icyorezo cya COVID19 giterwa n’agakoko gashya ka Coronavirus.

Iki cyorezo bivugwa ko cyatangiye kugarika ingogo mu Bushinwa mu Ugushyingo kwa 2019, ariko amakuru yacyo yatangiye gusakara mu bitangazamakuru byo ku isi hagati mu Ukuboza 2019.

Ubwo iki cyorezo cyatangiraga kuvugwa mu itangazamakuru byabanje gufatwa nk’intambara igihugu cy’u Bushinwa kiri kurwana cyonyine.

Gusa ku itariki ya 30 Mutarama 2020, Ishami ry’Umuryango w’Abibumbye ryita ku buzima (OMS) ryatangaje ko icyorezo kitakiri ku rwego rw’u Bushinwa gusa, ahubwo ko isi yose iri mu kaga.

Kimwe n’ahandi ku Isi hose, abahanga muby’ubuvuzi mu Rwanda by’umwihariko abavuzi gakondo bagaragaje ko hari imiti babonye ko ishobora kuvura iki cyorezo ari nayo bamaze gushyikiriza NIRDA ngo ibashe kuyikoraho ubushakashatsi.

Umukozi ushinzwe itangazamakuru n’itumanaho muri NIRDA, Mbonyinshuti Jean D’Amour, yavuze ko iyi miti bamaze kuyishyikirizwa n’abavuzi gakondo ariko ubushakashatsi butaramara gukorwa ngo hamenyekane niba harimo utanga icyizere.

Yagize ati “NIRDA isanzwe ifasha abavuzi gakondo mu kunoza ibyo bakora cyane cyane hibandwa ku buziranenge. Ubusabe bw’abavuzi gakondo bwarakiriwe, icyo NIRDA irimo gukora ni ukugenzura imiti yagaragajwe ko yagira uruhare mu kurwanya COVID-19.”

Mbonyinshuti avuga kandi ko hari urutonde rw’imiti 20 bagaragaje kandi NIRDA iri kuyisuzuma yose aho nyuma hazamenyekana igikurikiraho.

Umuyobozi w’Urugaga rw’Abavuzi Gakondo mu Rwanda, Nyirahabineza Gertrude Jeanne [Shangazi Jane] yabwiye UKWEZI, ko bafite icyizere cy’imiti bahaye NIRDA ko ishobora kuzemezwa nk’ivura COVID19.

Yagize ati “Hari abavuze ko bayivura ariko buriya buri muntu agira uko abivuga ariko biriya ni ukubeshya. Kuko ibi ni ibintu bisaba kugira ngo bice muri laboratwari ntahantu bo babinyujije ngo bibanze gupimwa.”

Yakomeje agira ati “Kumva ko uvura inkorora, cyangwa izindi ndwara zo mu myanya y’ubuhumekero, ntabwo ariko kuvura Corona, buriya ikintu kirimo virusi cyakozwe bisaba kujya muri laboratwari, twatanze imiti muri NIRDA bashobora kuzaduha ibisubizo byiza nicyo dutegereje.”

Ku wa 18 Werurwe 2020, nibwo Urwego rw’Igihugu rushinzwe Ubugenzacyaha, RIB, rwataye muri yombi umuvuzi gakondo wo mu Karere ka Musanze nyuma yo gutangaza ko avura Coronavirus.

Shangazi Jane usanzwe nawe ari umuvuzi gakondo ufasha abantu batandukanye mu bijyanye n’ubuzima bw’imyororokere, urukundo, imibanire y’abashakanye n’umuco, yavuze ko bagenzi be bakunze kuvuga ko bavura iki cyorezo babeshyaga kuko ntabwo biremezwa n’inzego zibishinzwe.

Avuga ko bafite icyizere cy’uko amoko 14 y’imiti bashyikirije NIRDA hazabonekamo uwemezwa bityo ukaba warokora Isi yugarijwe n’icyorezo cya COVID19.

Yakomeje agira ati “Twabihaye ababishinzwe, natwe ntabwo twigeze twicara ahubwo twakusanyije ubwoko bw’imiti igera ku bwoko 14, turayitunganya tuyishyikiriza NIRDA, ubu dutegereje ikizavamo kandi dufite icyizere 100%.”

Mu gihe ibihugu bitandukanye ku Isi bikomeje guhirimbanira kubona umutu uvura iki cyorezo, muri Afurika igihugu cya Madagascar nicyo cyonyine cyabashije kuvumbura umuti kivuga ko ushobora kuvura Coronavirus ndetse uyu muti urakoreshwa muri iki gihugu no mu bindi bihugu nka Tanzania.

Perezida wa Madagascar, Andry Rajoelina, akomeje gukorera ubuvugizi bukomeye umuti avuga ko igihugu cye cyavumbuye uvura COVID-19. Ni umuti witwa Covid Organics ukoze mu byatsi byitwa Artemisia.

Ku wa 20 Mata ubwo yari mu Ishuri rikuru ry’Ubushakashatsi muri Madagascar, (IMRA), Perezida Rajoelina Andry, yabwiye abaminisitiri, abadiplomate n’abanyamakuru ko igerageza ryamaze gukorwa, abantu babiri bamaze gukizwa n’uyu muti.

Ishami ry’Umuryango w’Abibumbye ryita ku Buzima, OMS, ryatangaje ko ritarabona amakuru na make yerekana imikorere y’umuti Madagascar ivuga ko yavumbuye, ndetse yifashisha mu kuvura abarwaye COVID-19.

Umuntu wa mbere wanduye Coronavirus yabonetse hanze y’u Bushinwa ku wa 13 Mutarama 2020 ; muri icyo gihe u Bushinwa bwo bwari bwaramaze kubona ko icyorezo cyabwibasiye kitoroshye kuko muri Mutarama bwaciye agahigo ko kubaka ibitaro byihariye byo kwita ku barwayi ba COVID-19 mu minsi icumi gusa.

Kuva umurwayi wa mbere wa COVID-19 iterwa n’agakoko gashya ka Coronavirus agaragaye mu Rwanda, hamaze kuboneka 1001 banduye mu bipimo 140 249 bimaze gufatwa, 443 barayikize mu gihe 556 bakiri mu bitaro naho babiri bitabye Imana.

Kugeza ubu nta muti n’urukingo bya Coronavirus biraboneka, hakoreshwa uburyo bwo kuvura ibimenyetso by’iki cyorezo gusa, kugeza umubiri w’umuntu wubatse ubudahangarwa, virus igashira ityo mu maraso.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda, abaturage basabwa gukomeza kubahiriza amabwiriza ya Leta hitabwa cyane cyane ku gukaraba intoki kenshi n’amazi n’isabune, kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi mu nsisiro cyangwa ahatuye imiryango myinshi.

Ben Rutabana wo muri RNC ya Kayumba Nyamwasa ngo afungiye muri Uganda neza, Dr Kayumba agiye kugaragara imbere y’urukiko, Iperereza i Kigali kuri Kabuga Felicien:





Tanga igitekerezo kuri iyi nkuru



Igitekerezo