Abashinzwe umutekano ngo baba batinya gufata Abamasayi mu bazunguzayi batinya kurogeshwa?

Hashize igihe kitari gito Leta y’u Rwanda ifashe icyemezo cyo guca burundu umuco wo kuzunguza (gucururiza mu muhanda) mu buryo bwo kugabanya akavuyo mu Mugi byanatumye aba bazunguzayi bashakirwa aho bakorera mu buryo bwo kubakura mu mihanda ariko kugeza ubu hari bamwe mu bakunze kwitwa Abamasayi bakomeje kwibazwaho impamvu bo badafatwa nk’abazunguzayi kandi nabo birirwa bazerera Umugi wose bacururiza mu mihanda nk’uko abazunguzayi basanzwe babikoraga/babikora (abatarava mu muhanda).

Nubwo aba bazunguzayi b’abanyarwanda baciwe mu Mugi wa Kigali, ngo Abamasayi bo ntibakorwaho kandi nabo bigaragara ko ari abazunguzayi nk’abandi (Abacururiza mu muhanda) ariko igitangaje ni uko inzego z’umutekano zitinya kubafata cyangwa kubaca mu Mugi ngo kuko akenshi bitwaza ibikoresho bikomeretsa nk’inkota n’ibindi, biteguye kwitabara cyangwa ngo bakaba babarogesha nkuko abenshi babivuga. Ubu haribazwa niba abo bamasayi batabarwa nk’abazunguzayi.

kuba Umugi wa Kigali warakajije imikwabu idahagarara hirya no hino yo guca ubucuruzi bwo mu muhanda ku buryo kugeza ubu ufashwe akora ubwo bucuruzi ahanwa by’intangarugero aho bamwe bamburwa ibicuruzwa byabo bikajyanwa cyangwa bagacibwa amafaranga ariko ngo abacuruzi b’abanyamahanga bitwa Abamasayi bo ntibakorwaho kuko inzego z’umutekano zibatinya ngo bashobora kubarogesha.

Itangazamakuru riganira na bamwe mu baturage, batangaza ko Abamasayi ntawabakoraho ngo kuko barogesha Umupolisi ubafashe cyangwa bakaba bamutera inkota bitwaza ziba zihishwe bityo ibi bikaba aribyo bituma bidegembya mu Mugi uko bashatse ndetse n’aho bashatse.

PNG - 1.1 Mb
Aba ni abazunguzayi bacururiza imbere y’isoko rya Nyarugenge impande yaho Taxi Voiture ziparika


Umubavu.com washatse kumenya uko bamwe bumva iki kibazo maze uganira n’uwitwa Karasira agira ati "urugero ni nk’abazunguzayi bacururiza imbere y’isoko rya Nyarugenge impande yaho Taxi Voiture ziparika b’Abamasayi, usanga bacuruza nta bwoba bafite Polisi inahagaze iruhande rwabo yewe na za Dasso zibanyura iruhande. Ubwo twashakaga kubavugisha, abatwara Taxi Voiture baratubwiye ngo reba bafite inkota ku itako, nimubavugisha byinshi bazabarogesha nta nzego z’umutekano zatinyuka bariya ba Masayi kuko ari abarozi”.

Ibi bivugwa n’abantu batandukanye, ubuyobozi bwa Nyarugenge bwasobanuye ko abo Bamasayi nabo ari abazunguzayi ndetse bunavaga kuri ubu bwoba Abamasayi batera inzego z’umutekano.

PNG - 961.2 kb
Uyu ni umuyobozi w’Akarere ka Nyarugenge, Kayisime Nzaramba avuga ko Abamasayi ari abazuynguzayi nk’abandi


Avugana n’itangazamakuru, umuyobozi w’Akarere ka Nyarugenge, Madame Kayisime Nzaramba yagize ati "Abamasayi nabo ni abazunguzayi, ni nayo mpamvu nabo tubakurikirana ngo bahagarike buriya bucuruzi bakorera mu muhanda kuko Leta ntawe ivangura ngo uyu ni muntu ki, ahubwo bose babyumve ko bibujijwe kuri buri muntu wese wakorera ubucuruzi ahatari mu isoko kuko nafatwa azahanwa nk’abandi bose nta kabuza".

Akomeza agira ati "ibyerekeranye n’uko baroga, ibyo ni ukubeshya kuko tujya tubafata ntibagire icyo bakora kandi gahunda yo kubafata ntabwo izahagarara kubera ko nabo ari abazunguzayi".

Kuri ubu abazunguzayi b’Abanyarwanda bari bamaze gucika gukora ubucuruzi bwo muhanda nyuma yuko bamwe bagiye gukorera mu masoko Leta yagiye ibubakira.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo