Abarimu bigisha muri APADE mu ruhuri rw’ibibazo birimo no kudahemberwa igihe

Ku itariki 07-08 z’ukwezi kwa Kanama 2019, nibwo ikigo cy’ishuri cya APADE giherereye mu mujyi wa Kigali cyahembye abarimu bacyo umushahara w’ukwezi kwa Gatanu n’ukwa Gatandatu bivuze ko bafitiwe ibirarane by’ukwezi kwa Karindwi n’uku kwa Munani kugiye kurangira, uku kudahembwa neza bikabagiraho ingaruka zikomeye mu mibereho yabo n’imiryango yabo.

Bavuga ko kudahemberwa ku gihe bibatera guhora mu myenda idashira ngo dore ko umushahara ujya kubageraho wose waramaze gushira mu gihe nyamara ubaye ubonekera igihe wajya ukemura ibibazo byabo neza bitabasabye kujya mu madeni bityo na bo bagakora akazi kabo neza.

Kutubahiriza ibikubiye mu masezerano nacyo ni ikindi kibazo aba barimu bagaragaza aho ngo mu masezerano bafitanye n’ikigo abemerera kongererwa 4% by’umushahara bahembwa ku mwalimu uhamaze igihe kingana n’umwaka ahakora, ngo nyamara ibi bikaba biri mu nyandiko gusa kuko mu barimu bose bahamaze igihe gikubiye mu masezerano, nta n’umwe urabikorerwa ngo birambe kuko byagiye bikorwa rimwe na rimwe ubu bikaba bidaheruka mu myaka hafi itatu ishize.

Kutishyurirwa amafaranga y’ubwiteganyirize n’umusoro nacyo ni ikibazo aba barimu bagaragaza kuko umushahara wabo utazira igihe kandi haba hari abashobora kugira ikibazo bakaguza Kontabure, yajya kubahemba akayabakata bityo kuri Banki hakagera igice.

Bamwe mu barimu ba APADE baganiriye n’umunyamakuru w’UMUBAVU bavuga ko ngo ibi bibagiraho ingaruka aho bamwe bahora birukanwa mu nzu babuze ubukode, abandi bakwepa abo bafitiye amadeni kuko babuze ayo kwishyura, na ho ku bafite amadeni ya Banki bakaba ikibazo kibaremereye kurushaho.

Bagira bati "Duheruka umushahara w’ukwezi kwa Gatanu n’ukwa Gatandatu, twahembwe ku itariki 7&8 z’uku kwezi kwa Munani ariko ntabwo tuzi neza igihe tuzahemberwa ibirarane by’ukwezi kwa Karindwi n’uku kwa Munani kwenda gushira dore ko byamaze kuba akamenyero ko bataduhembera igihe nyamara bigaragara ko ikigo gifite ubushobozi bwo kuba cyabona umushahara w’abarimu mu buryo bworoshye".

Twashatse kumenya icyo ubuyobozi bw’iri shuri bubivugaho, umuyobozi wa APADE Gatoya atubwira ko atemerewe kugira icyo atangaza kuko ikigo gifite ugihagarariye mu mategeko gusa nyuma y’iminsi mikeya twaganiriye n’uyu avuga ugihararariye.

Umuyobozi uhagarariye ikigo cya APADE mu mategeko Gashayija Justin yasubije ko iki kibazo gihari ariko akaba ari ikibazo kidakomeye cyane, ati "Kirahari ariko si ikibazo gikomeye cyane kuko kugira ngo twubake ibyo twagombye kuguza BRD, byasaga nk’ibihenze kuko byadusabaga kwishyura amafaranga menshi ariko muri iyi minsi ibigo byigenga ntabwo bikibona abanyeshuri benshi kubera ko twagize amashuri menshi mu Rwanda mu tugari, mu mirenge bituma abanyeshuri baba bakeya rero hari igihe umwarimu aba yigisha abanyeshuri bakeya, mu yandi magambo n’amafaranga yinjira akaba makeya".
Kanda hano wumve ikiganiro twagiranye

Akomeza avuga ko kugabanuka kw’abanyeshuri byatumye hari n’ibigo byinshi bihagarara gusa ngo bo bakaba baragize umugisha wo gukorana na bo neza ku buryo ikigo cyabo kitahagaze.

Ku kibazo cyo guhemba abarimu nabi akomeza avuga ko ngo icyakora hari igihe bashobora gukererwa kubahemba gakeya ariko bari gukora ibishoboka byose ngo babahembe gusa ntagaragaza igihe iki kibazo kizarangirira.

Ati "Icyakora hari igihe dushobora gukererwa gakeya ariko turi gukora ibishoboka byose ngo tubahembe, icyo tuzi ni uko abarimu bose bishimye ariko icyo dusobanukiwe ni uko ahantu hari abantu icumi cyangwa se makumyabiri bose badashobora kunyurwa ngo bashime, haba hari abashima n’abagaya barahari, n’igihugu cyacu uku ubona gitera imbere gutya hari abanenga".

Avuga ko muri APADE we ngo abona bafata abakozi babo neza ndetse nta kindi kibazo gihari ashingiye ko banatsindisha neza.

Ku barimu batemeranya na bo ku kibazo cy’inguzanyo ikigo cyafashe ituma haba ibibazo mu mihembere yabo, uyu muyobozi akomeza ashimangira ko ngo nta kibazo bafitanye n’abakozi babo ngo uretse gusa kuba muri bo harimo abadashima.

Bamwe mu barimu bavuga ko haba hari impamvu yihishe inyuma yo kuba Gatoya yarakomeje kuba umuhuzabikorwa w’iki kigo kuko ngo bitumvikana uburyo yava gukora muri INILAK agakomeza gukorera muri APADE.

Kuri ubu umushahara w’ikigo cya APADE uyingayinga ibihumbi 600 nyamara umushahara w’umwarimu wo muri INILAK ungana n’ibihumbi 44 ku isaha imwe. Isomo ritoya nibura rigira amasaha 45 bivuze ko nibura umushahara muto ashobora gufata ari Miliyoni irenga ku kwezi.

Bamwe mu basesengura bemeza ko hari icyihishe inyuma yo kuba yarahisemo kuguma ari umuyobozi wa APADE akareka kuba umwarimu muri INILAK kuko ngo haba hari imishinga idasobanutse inyererezwamo amafaranga y’umurengera akaba ari nayo mpamvu habura amafaranga yo guhemba abakozi.

Bati "Ni gute wareka gukorera muri INILAK ukaza gukorera muri APADE hari umushahara muto? Ibi babikoze mu manyanga bashaka gukomeza kujya barya ikigo nyamara yari yaragiye mu kiruhuko k’iza bukuru, ibi ni bimwe mu bituma tutabona amafaranga neza nyamara wabivuga ngo uri kwiteranya ngo ntushobotse n’ibindi byinshi batubwira".

Mu minsi ishize Leta yafashe icyemezo cyo kujya iha ibigo byigenga byujuje ibisabwa abanyeshuri ku buryo uwo mwanzuro wamaze gushyirwa mu bikorwa kuko ubu APADE iri mu bigo bifite banyeshuri ba Leta, haribazwa niba aba banyeshuri bazabona ireme ry’uburezi mu gihe abarimu badahembwa neza.

APADE yatangiye mu mwaka w’1987 ari ikigo cy’incuke. Mu 1991 nibwo batangiye amashuri abanza nyuma baza no gutangiza amashuri yisumbuye bahereye ku ishami ry’ubuvuzi nyuma Minisiteri y’Uburezi iza kugabanya amashuri yigishaga iri shami bashyiraho andi mashami kuri ubu arenga 10 arimo aya Tekinike n’andi asanzwe.

@Umubavu.com





Tanga igitekerezo kuri iyi nkuru



Igitekerezo
Ingabire Kuya 22-08-2019

None se niba nta kibazo gikomeye cyo guhemba abarimu bafite kuki babimye assurance na caisse social, ibyaho ni birebire ibyo mwavuze ni bike.

KANAMUGIRE Micheal Kuya 22-08-2019

Njyewe nk’umunyeshuri wa APADE mba nangajwe no kumva ibyo bintu kandi nukuntu batwishyuza buri munsi,kandi kigaragara amafaranga y’ishuri twarayishyuye,ahubwo babishyure tubone uburezi neza kuko ashobora kuba arinayo mpamvu batwigisha nabi! Murakoze

Aime Kuya 21-08-2019

Bari baratinze kugaragaza ibibazo byabo kuko bimaze iminsi bizwi twebwe twahisemo kuvanayo abana bacu kuko ntabwo byumvikana ko umwarimu yakwigisha umwana ashonje atanaziko nataha adasanga bamusohoye munzu

Aime Kuya 21-08-2019

Bari baratinze kugaragaza ibibazo byabo kuko bimaze iminsi bizwi twebwe twahisemo kuvanayo abana bacu kuko ntabwo byumvikana ko umwarimu yakwigisha umwana ashonje atanaziko nataha adasanga bamusohoye munzu

Claudette Kuya 21-08-2019

Birababaje kubona uko mwarimu yitanga hanyuma ntahembwe.
Mbona leta yashyiraho ikigega gishinzwe guhemba abarimu bo amashuri yigenga Cg hagashyirwaho uburyo byakorerwa mu Umwarimu sacco hanyuma Ayo mashuri yigenga akajya ashyiramo imishahara y’abarimu bayo régulierement. Gutyo ikigo cyakererwa gushyiramo iyo mishahara kigahabwa ibihano.
Rwose aba bantu nibarenganurwe