Abanyarwanda bagera kuri  miliyoni 7.1 ni bo bazatora abadepite

Abanyarwanda bari ku ilisiti ntakuka y’abemerewe gutora Abadepite mu kwezi gutaha ni 7,172,612, bakazatorera kuri site z’itora 2473 zifite ibyumba 17146.

Itegeko ngenga rigenga amatora mu Rwanda riteganya ko ilisiti ntakuka y’abazatora itangazwa mu minsi itari munsi ya 15 ngo itariki y’itora igere, iyi ikaba yatangajwe mu gihe habura iminsi 16.

Perezida wa NEC, Prof Kalisa Mbanda, kuri uyu wa Gatanu yatangaje ko “Abanyarwanda biyandikishije ari 7,172,612.”

Yavuze ko agereranyije n’amatora y’abadepite yo mu 2013, abiyandikishije kuzatora muri Nzeri biyongereyeho 20.5%.
Muri 2013 bari 5,953,531.

Yavuze ko ikoranabuhanga ryo kwiyandikisha ryamaze gufunga ku biyandikishaga bari mu mahanga ari naho bazatorera.

Ryahagaritswe hiyandikishije 47000 ubariyemo abasirikare n’abapolisi b’u Rwanda bari mu butumwa bw’amahoro hirya no hino.

Kwiyamamaza byifashe bite?

Prof Mbanda yanagarutse ku bikorwa byo kwiyamamaza ku bakandida.

Yavuze ko nta bibazo bikomeye byo kwica amategeko n’amabwiriza agenga kwiyamamaza bari bahura nabyo.

Ibyagaragaye ni abakandida bakererwa kugera aho biyamamariza kandi abaturage bazindutse, bamwe bakarambirwa bakitahira.

Abakandida batanzwe n’imitwe ya politiki n’abigenga batangiye kwiyamamaza ku wa 13 Kanama.

Abahatanira imyanya yagenewe abagore mu Nteko Ishinga Amategeko batangira kwiyamamaza ku wa 16 Kanama, abafite ubumuga batangira ku wa 17 Kanama naho ab’urubyiruko bazatangira ku wa 21 Kanama 2018.

Abakandida bose hamwe ni 302 b’imitwe ya politiki irimo FPR-Inkotanyi n’imitwe bifatanyije, aba PL, PSD, Green Party na PS-Imberakuri.

Muri abo, abigenga ni bane, 26 b’urubyiruko, abafite ubumuga 10 n’abakandida 179 bahatanira guhagararira abagore.

Biteganyijwe ko mu cyumweru gitaha ibintu byose birimo impapuro z’itora bizaba byamaze gutegurwa hasigaye gusa kubyohereza kuri site z’itora.

Kugeza ubu, NEC imaze kwandika indorererezi zazakurikirana imigendekere y’amatora y’abadepite zibarirwa muri 500 ziganjemo Abanyarwanda.

Igikorwa cyo kuzandika kirakomeje, hitezwe izirenga 2000.

Amatora y’uyu mwaka ateganyijwe ku wa 2 Nzeri ku Banyarwanda bari mu mahanga no ku wa 3 Nzeri 2018 ku bari imbere mu gihugu.

Azatwara ingengo y’imari ingana na miliyari 5.4 Frw, hafi ya yose akaba yaravuye mu gihugu.

Umubavu.com





Tanga igitekerezo kuri iyi nkuru



Igitekerezo