Abanyarwanda baba muri Tanzania bibutse Jenoside yakorewe Abatutsi

Abanyarwanda baba muri Tanzania n’inshuti zabo bibutse ku nshuro ya 24 Jenoside yakorewe Abatutsi muri Mata 1994.

Uyu muhango witabiriwe n’abarenga 500 baturutse mu bice bitandukanye bya Tanzania, wabereye mu nzu mberabyombi ya Mlimani mu Mujyi wa Dar es Salaam ku wa 7 Mata 2018.

JPEG - 51.1 kb

Abanyacyubahiro bitabiriye uyu muhango wahuriranye n’itangizwa ry’icyumweru cy’icyunamo barimo uwahoze ari Minisitiri w’Intebe wa Tanzania, Ambasaderi Dr Salim Ahmed Salim; Umuyobozi uhagarariye Umuryango w’Abibumbye muri Tanzania, Alvaro Rodriguez na Minisitiri w’Itangazamakuru, Urubyiruko, Umuco na Siporo, Dr Harrison Mwakyembe wari umushyitsi mukuru.

Abitabiriye uyu muhango beretswe filime ngufi yagarutse ku buryo Jenoside yakorewe Abatutsi yateguwe, ikanashyirwa mu bikorwa ndetse n’ubuhamya bw’abayirokotse bugaragaza uko igihugu cyiyubatse mu myaka 24 ishize.

Abanyeshuri bo mu mashuri yisumbuye ya Chang’ombe na Kibasila yo muri Tanzania bavuze imivugo itandukanye ikubiyemo ubutumwa bw’amahoro no kurwanya Jenoside ku Isi hose.

Abafashe ijambo bagarutse ku nsanganyamatsiko y’uyu mwaka ivuga ngo “Twibuke, twiyubaka.”

Uhagarariye Abanyarwanda baba muri Tanzania, Nyiridandi Emile, yavuze ko mu kwibuka harimo no kuzirikana intambwe u Rwanda rumaze gutera.

Yagize ati “Turibuka Jenoside yakorewe Abatutsi, icyizere ndetse no gushikama kwaranze Abanyarwanda nyuma y’amahano yabagwiriye.”

Ambasaderi w’u Rwanda muri Tanzania, Kayihura Eugène, yagarutse ku rugendo rw’u Rwanda rwo kwiyubaka.

Yagize ati “Abanyarwanda bakomeje gukira ibikomere batewe na Jenoside yakorewe Abatutsi biyubakira igihugu.”

Yakomeje avuga ko bakomeje guhangana n’abahakana ndetse bakanapfobya Jenoside yakorewe Abatutsi.

Minisitiri Dr Harrison Mwakyembe yagaragaje ko mu bihe bikomeye u Rwanda rwaciyemo, Tanzania nk’umuturanyi nayo yagezweho n’ingaruka, bituma bagira umukoro wo gukumira Jenoside.

Yagize ati “Dufite inshingano zo kurinda ko hakongera kubaho jenoside ukundi haba mu Rwanda ndetse no ku Isi hose.”

Umuyobozi uhagarariye Umuryango w’Abibumbye muri Tanzania, Alvaro Rodriguez, yibukije imiryango mpuzamahanga ko bamwe mu bakoze Jenoside batarafatwa bagomba gushakishwa ndetse bagashyikirizwa ubutabera bakaryozwa ibyo bakoze.
source igihe.com

JPEG - 64.2 kb
Abanyeshuri bo mu mashuri yisumbuye ya Chang’ombe na Kibasila muri Tanzania bifatanyije n’Abanyarwanda kwibuka Jenoside yakorewe Abatutsi muri Mata 1994





Tanga igitekerezo kuri iyi nkuru



Igitekerezo