Abanyamakuru bashinjwe kubaza Perezida ibibazo ’bidashinga’ ngo bipfira ku batumira-Video

Nyuma yuko mu minsi ishize abantu batandukanye by’umwihariko abaturage bifatiye ku gahanga abanyamakuru babanenga kubaza Perezida ibibazo bidashinga batabavuganira ku bibazo bitandukanye baba bafite, UMUBAVU washatse kumenya niba ari ikibazo cy’abanyamakuru, niba nta bibazo baba babona ko bikwiriye kubazwa umukuru w’igihugu n’ibindi, ...maze uvugana n’abanyamakuru batandukanye basobanura aho bipfira aho benshi bagarutse ku batumira n’abatanga ijambo ku babaza ibibazo.

Mu minsi ishize ku mbuga nkoranyambaga hadutse abantu bibasira bikomeye abanyamakuru baherutse kugirana ikiganiro n’Umukuru w’Igihugu, Paul Kagame ubwo yari amaze kugeza ku Baturarwanda uko igihugu gihagaze.

Abanyamakuru bashinjwe kubaza ibibazo bitari ngombwa Perezida biherewe ku kuba nta munyamakuru wigeze abaza ikibazo cy’umusoro w’ubutaka ubangamiye cyane ab’I Kigali ndetse n’ibindi bibazo nk’ibiri muri REB ahubwo bakabaza ‘icyo Perezida Kagame avuga ku mibare y’ubwandu bushya bwa Coronavirus’.

Hari n’abumvikanye bavuga ko ngo ahari abanyamakuru b’abanyamwuga bigiriye mu yindi mirimo abandi bakaba bibereye kuri YouTube ariko bamwe ibi babiteye utwatsi bavuga ko nta kibazo mu banyamakuru ko ahubwo kiri mu mitangire y’ijambo n’uburyo abajya mu kiganiro batoranywa.

Gatera Stanley, ni umunyamakuru akaba n’umuyobozi mukuru w’ikinyamakuru Umusingi unamaze igihe kirenga imyaka 10 mu itangazamakuru, ntiyemeranya n’abavuga ko nta banyamakuru b’abanyamwuga bagihari.

Ati "Abanyamakuru bari professional ahubwo uburyo bwo gutumira, abatumira niho hari ikibazo ariko abanyamakuru barahari barakora, barandika...iyaba babonaga uko babaza babaza".

Uwizeyimana Marie Louise na we ni umunyamakuru w’ikinyamakuru Integonews ntiyemeranya n’abavuga ko hari ikibazo cy’ubunyamwuga buke bwashinjwe abanyamakuru, avuga ko umunyamakuru uri bukore inkuru ngo ari we umenya uburyo ari bubaze ikibazo cye bitewe n’ibyo ashaka.

Ati "Nta kibazo cy’ubunyamwuga cyabaye muri kiriya kiganiro na Perezida wa Repubulika, kubera impamvu ndibuguhe, umunyamakuru uri bwandike inkuru ye afite uburyo abazamo bitewe na Angle ashaka...".

Bigirimfura Rachid ukorera ikinyamakuru Rwandanziza na we yashimangiye ko ikibazo kiri ku bantu batumira abanyamakuru, ati "Ikibazo ntabwo nkibona ku banyamakuru, ikibazo nkibona mu muntu utumira, utumira ubaha ijambo...kuko ngira ngo ejobundi warabibonye umuntu watangaga ijambo yarihaga abantu abanje kubavuga amazina, bigaragare ko abantu baba batumiwe n’ubundi ni abantu baba bazi".

"Iyo umutiye abantu benshi ubona ibibazo byinshi bitandukanye, ariko iyo utumiye abantu bamwe, ubona ibintu bikeya nkeka ikibazo kiri ahongaho naho ubundi n’abari hariya bose ntibabajije keretse wenda bose iyo babaza tukabona ibibazo nk’ibyo ni bwo twari kunenga abanyamakuru".

René Anthère Rwanyange, umwanditsi mukuru w’ikinyamakuru Panorama we yavuze ko kuba abayamakuru baranenzwe ari byiza kuko ngo hanengwa ukora, akavuga ko batanenzwe baba badakora.

Ati "Kutunenga ahubwo batatunenzwe twaba tudakora, banenga umuntu ko akora hari ibyo atatunganyije mu murongo bumva bifuza byakabaye bikorwamo ahongaho niho bakunenga, bakunenga ari uko wakoze ari nuko itangazamakuru rihari kandi rikora wenda ahubwo ridatunganya ku murongo babyifuza".

Ku kibazo cy’abavuze ko abanyamakuru babajije Perezida ibibazo bidashinga, bakabashinja ubunyamwuga bukeya, ati "Ubunyamwuga no kubaza ntaho bihuriye burya uburyo umuntu abaza n’uwo agiye kubaza n’uburyo amwiyumvamo, ushobora kugera imbere y’umukuru w’igihugu, umukuru w’igihugu ntabwo ari umuntu upfa kubaza uko ubonye, wajya no kumubaza ukumva ndamubaza mpereye he, ikintu cya mbere iyo ugiye kubaza umukuru w’igihugu ni ukwigirira icyizere...".

Umunyamakuru René Anthère Rwanyange avuga ko mu gihe umuntu agiye mu kiganiro na Perezida atarabyiyumvamo neza ngo ubwoba bushobora gutuma atamubaza ikibazo cye neza.

Mu gihe umunyamakuru yabaza ikibazo kidashinga, avuga ko atabishyira ku munyamakuru nyirizina ahubwo byabazwa igitangazamakuru cyamutumye kuko ngo aricyo kiba cyamuhaye ikibazo arabaza.

Ntawi John Williams wa Iremenews we kuri ibi, avuga ko kiriya kiganiro cyitwa icya Perezida wa Repubulika n’abanyamakuru kidahamagarwamo abavugira abaturage, ngo ahubwo Ibiro by’Ubuvugizi bwa Leta (Office of the Government Spokesperson,OGS) bitumira abafasha leta gutangaza ibyo igomba gutangaza.

Ati "Ntabwo kiriya kiganiro gihamagarwamo abantu bavugira abaturage, ntigihamagarwamo abantu bahura n’abaturage...Ibiro by’Ubuvugizi bwa Leta rero bihamagara, bitumira abafasha leta gutangaza ibyo igomba gutangaza, ntabwo ari abasaba Leta kwisobanura ku bitagenda cyangwa ku bifitemo ikibazo".

Benshi muri aba banyamakuru basaba urwego rutumira abanyamakuru mu kiganiro na Perezida wa Repubulika kujya babitegura neza kandi abanyamakuru benshi bagahabwa ijambo kugira habonekemo n’ibitekerezo bitandukanye.


Nyuma y’ikiganiro giheruka Perezida Kagame yagiranye n’abanyamakuru nyuma yo kugeza ku Banyarwanda uko igihugu gihagaze muri 2020 iri gusozwa, hadutse impaka ku mibarize y’abanyamakuru itavugira umuturage

Umva ikiganiro kirambuye UMUBAVU wagiranye n’aba banyamakuru nyuma yuko banenzwe kubaza umukuru w’igihugu ibibazo bidashinga kandi abaturage bugarijwe n’uruhuri rw’ibibazo:





Tanga igitekerezo kuri iyi nkuru



Igitekerezo