Abantu nibisuka mu muhanda ntabwo gereza zose bazazibuzuzamo-Karasira

Karasira Aimable uzwiho gutanga ibitekerezo bye mu buryo bwihariye kandi yisanzuye, avuga ko ngo nubwo abantu bagaragaza ibitekerezo byabo bisanzuye bakiri bakeya, ngo mu gihe abiyemeje baramuka bisutse mu mihanda bagatangaza ibitekerezo byabo, ngo gereza batazazibuzuzamo.

Ibi yabigarutseho mu kiganiro kirambuye yagiranye n’UMUBAVU, aho yagarutse kuri byinshi by’umwihariko avuga ku bantu bagaragaza ibitekerezo byabo ugasanga bahuye n’ingorane.

Aha yatanze urugero rw’uburyo ngo yirukanwe ku kazi ko kwigisha muri Kaminuza y’u Rwanda, ibyo avuga ko yazize ibitekerezo bye nkuko yakunze kubigarukaho kenshi avuga ko kuva yatangira umuyoboro we wa YouTube yise ’UKURI MBONA’ yatangiye guhura n’ibibazo mu kazi ke.

Ati "Ikintu cyambayeho n’abandi kibabaho bamwe bagafungwa, abandi bakirukanwa ku kazi nkuko mbyambayeho, abandi ntibemererwe amashyaka nka ba Victoire, abandi ntibemerwerwe Kandidatire nka ba Diane Rwigara, n’abandi, ikibazo ni uko bakiri bakeya...".

Aha nibwo Karasira yakomoje ku kuba ngo mu gihe abantu bazaramuka bisutse mu mihanda bagatangaza ibitekerezo byabo, ngo gereza zose batazazibuzuzamo, ati "Abantu nibisuka mu mihanda bagatangaza ibitekerezo byabo, ntabwo gereza zose bazazuzuzamo abantu, sisiteme izageraho ibyemere".

Yakomoje ku bihisha ntibigaragaze bakamusaba kuvbavugira, ati "Ikibazo dufite ubu, ni abantu bihisha bati ’Karasira aramvugira’ nyamara yibereye i Burayi arya za Pizza".

Karasira yakomoje ku kuba atanga ibitekerezo bye uko abyumva, akabwirwa ko ngo amafaranga ayahawe ari ayo kujya atuka Kagame, ibyo avuga ko atabereyeho kumutuka ngo na cyane ko amuruta.

Ati "No, jye Kagame ntabwo mbereyeho kumutuka arananduta ariko kuvuga ibibi bya FPR wenda ayobora na byo si ikibazo gikomeye cyane, nabivuga".

Karasira muri iki kiganiro yagarutse ku kuba abanyarwanda usanga baterura ngo bavuge ibitekerezo byabo, aha akagaruka kuri Cyuma, Ingabire Victoire, Famille Rwigara, Ntaganda bakunze gutanga ibitekerezo byabo nkuko babyemererwa n’Itegeko Nshinga rya Repubulika y’u Rwanda ryo mu 2003 ryavuguruwe mu 2015.

Avuga ko ngo na Kizito Mihigo abantu bemera ngo ibitekerezo bye atabivugaga ku mugaragaro uretse kubicisha mu bihangano bye, ati "Na Kizito twemera ni uko yabivugaga mu ndirimbo, ntabwo yigeze abivuga ku mugaragaro ariko twebwe turatinyuka tukabivuga ku mugaragaro kandi ntabwo dupfa, yego ntabwo bivuga ko dufite Immunite bashobora no kutwica ariko icyangombwa ni uko mwe mwiyima uburenganzira bwanyu, bariyima uburenganzira bwabo".

Abajijwe niba hari abantu baba bumva bagira icyo bagaragaza nk’igitekerezo cyabo ariko ntibabigaragaze mu kwitinya, Karasira ati "Barahari, none se nk’abarimu twigishanyaga benshi ntibanterefona kuri Telefoni bati ’ibyo wavugaga ni byo’ wazize n’ukuri kuko wavugaga ukuri twe twitwabitinyuka twebwe ni imbehe zacu tugomba kubumbatira".

Karasira yagarutse ku baturage ba Kangondo ahazwi cyane nka Bannyahe ikibazo cyabo cyabaye agatereranzamba, ati "Ugeze muri Bannyahe/Kangondo ukabaza abaturage ububi bw’ubutegetsi buriho atari ububi bw’igihugu, bandusha kubivuga kuko bo barara rwantambi, barara imvura ibanyagira".

Karasira Aimable wamenyekanye cyane kubera uburyo atangamo ibitekerezo bye bwihariye, yari umwarimu muri Kaminuza y’u Rwanda, ishami ry’Ikoranabuhanga, URCST.

Mu baruwa yo ku wa 14 Kanama 2020 yashyizweho umukono n’umuyobozi wa Kaminuza y’u Rwanda (UR), Prof. Philip Cotton, Karasira Aimable, yandikiwe abwirwa ko yirukanwe ku kazi ke k’ubwarimu muri Kaminuza y’u Rwanda.

Umuyobozi wa UR muri iyi baruwa ati "Mbabajwe no kukumenyesha ko wirukanwe mu kazi kawe ko kwigisha muri Kaminuza y’u Rwanda kandi bigahita byubahirizwa".

Muri iyi baruwa byavuzwe ko kumwirukana byashingiye ku byasabwe na Minisiteri y’Abakozi ba Leta n’Umurimo na Raporo ya Komite ishinzwe imyitwarire muri Kaminuza yasabye ko yirukanwa.

Byavuzwe kandi ko ngo hashingiwe ku ibaruwa No 450/2020 yo ku wa 27 Nyakanga 2020 yamusabaga ibisobanuro ku myitwarire itari myiza, ngo ibisobanuro yatanze mu ibaruwa yo ku wa 29 Nyakanga 2020 bikaba bitarabanyuze.

Ngo hashingiwe kandi ku ibaruwa No 1299 yo ku wa 12 Kanama 2020 ya Minisiteri y’Abakozi ba Leta n’Umurimo na Raporo ya Komite ishinzwe imyitwarire muri Kaminuza y’u Rwanda yasabye ko yirukanwa muri Kaminuza nk’igihano gikuru kubera amakosa atandukanye.

Mu makosa ashinjwa Karasira muri iyi baruwa harimo ngo kugaragaza imyitwarire kimwe n’ibitekerezo bye binyuze mu matangazo ngo atavugwaho rumwe akorerwa mu ruhame hakoreshejwe imiyoboro itandukanye y’itangazamakuru by’umwihariko ngo indangagaciro, imyitwarire n’amahame binyuranyije n’ibikwiriye umurezi.

Muri iyi baruwa kandi Karasira yashinjwe ngo gukwirakwiza amakuru agamije gushishikariza abantu kuyanga no kuyubahuka kimwe n’izindi nzego, Kaminuza y’u rwanda ikavuga ko ngo ibi binyuranyije n’Iteka rya Perezida No 45/01 ryo ku wa 30 Kamena 2015 rishyiraho amategeko agenga imyitwarire y’umwuga asaba abakozi ba Leta kubaha buri gihe inzego za Leta, Politiki na gahunda za Guverinoma.

Karasira yashinjwe andi makosa ngo yo kutubaha umwuga we ndetse ngo no gukorana agasuzuguro ibikorwa ahabwa, aha Kaminuza ikavuga ko yatinze gushyira kuri Interineti amasomo yari kwifashishwa mu kwigisha abanyeshuri hifashishijwe ikoranabuhanga.

Gusa ibi byose Karasira yashinjwe kugeza ubwo yirukanwe ku kazi ke, mu biganiro bitandukanye yagiranye n’UMUBAVU yavuze ko byagiye bikorwa azizwa ibitekerezo bye atanga kandi nyamara abyemerewe n’Itegeko Nshinga ry’u Rwanda.

Karasira yavukiye mu Ntara y’Amajyepfo mu yahoze ari Butare mu 1977, mu mwaka wa 1980, umuryango we wimukiye mu Mujyi wa Kigali, yiga amashuri ye abanza ku ishuri ribanza rya EPA rihereye mu Gitega. Yakomereje muri Lycée de Kigali.

Yize muri Kaminuza Nkuru y’u Rwanda ayivamo mu 1998 afite impamyabumenyi y’icyiciro cya Kabiri cya Kaminuza mu bumenyi n’Ikoranabuhanga. Icyiciro cya Gatatu yagikomereje muri Suède.

Karasira Aimable, yari umwarimu w’umuhanga mu bijyanye n’ikoranabuhanga by’umwihariko ku bumenyi bwa Mudasobwa (Computer Science) ari na byo yari amaze imyaka igera kuri 14 yigisha muri Kaminuza y’u Rwanda Ishami ry’Ubumenyi n’Ikoranabuhanga, UR-CST (iyahoze ari KIST) kuva mu 2008.

Ubuhanga bwe yabusobanuye aho yabwiye UMUBAVU mu biganiro bagiranye ko ubusanzwe akazi ke agakora neza ndetse no mu manota y’imihigo nta na rimwe arajya munsi ya 80%.

Yamenyekanye kandi mu bihe byashize mu Muziki nka ’Prof Nigga’ akaba kuri ubu ari n’umwe mu bakunzwe ku mbuga nkoranyambaga cyane cyane mu biganiro bye aho atangamo ibitekerezo bye mu buryo bwihariye kandi yisanzuye binyuze ku muyoboro we wa YouTube yise ’UKURI MBONA’, umuyoboro avuga ko kuva yawutangiza yatangiye guhura n’ibibazo bitandukanye mu kazi ke.

UMVA MURI IYI VIDEO IKIGANIRO CYOSE KARASIRA YAGIRANYE N’UMUBAVU CYAGARUTSE KU NGINGO ZITANDUKANYE:





Tanga igitekerezo kuri iyi nkuru



Igitekerezo