Abanduye COVID-19 muri Kenya bageze kuri 374

Imibare y’abanduye icyorezo cya COVID-19 mu gihugu cya Kenya ikomeje gutumbagira aho ubu igeze kuri 374 nyuma yuko mu bipimo byafashwe mu masaha 24 hagaragayemo abandi bantu bashya banduye 11.

Muri aba bantu 11 bashya bagaragaweho n’iki cyorezo, 2 muri bo ni abana b’imyaka ibiri mu gihe mu basigaye umukuru afite imyaka 75 y’amavuko nkuko byatangajwe n’Umunyamabanga muri Minisiteri y’Ubuzima muri Kenya, Rashid Aman.

Akomeza avuga ko kandi muri aba bantu bashya bagaragaweho na COVID-19, 7 ari ab’i Nairobi mu gihe abandi 4 ari ab’i Mombasa.

Muri aba b’i Nairobi 4 ni abo mu gace ka Kawangware mu gihe undi umwe byatahuwe ko ari uwo mu gace ka Eastleigh, Mangi ahitwa Kaloleni. Ni mu gihe abandi bane b’i Mombasa byatahuwe ko ari abo mu gace ka Kibokoni.

Dr Rashid Aman ati "Dufite abantu 11 bashya bagaragaweho na COVID-19 mu bipimo 589 byafashwe3 mu masaha 24. Bivuze ko abanduye COVID-19 bose hamwe mu gihugu bamaze kuba 374. Muri aba bagaragaye bashya harimo abana b’imyaka 3 mu gihe umukuru muri bo afite imyaka 75 y’amavuko".

Uyu muyobozi yaburiye uduce twagaragawemo aba barwayi bashya ba COVID-19 adusaba kwitwararika no gukomeza kubaha ingamba zashyizweho mu gukomeza gukumira ikwirakwira ry’iki cyorezo kitarabonerwa umuti yewe n’urukingo.

Dr Aman yongeyeho ko aba barwayi bashya bashyizwe mu kato i Nairobi n’i Mombasa. Ibi kandi ngo byagaragaje ko iki cyorezo cyageze no mu byaro bitandukanye.

Kugeza ubu mu gihugu cya Kenya nkuko twabivuze abanduye COVID-19 bamaze kugera kuri 374, yishe 14 mu gihe abagera ku 124 bayikize.

Ku isi yose abanduye bamaze kurenga Miliyoni 3, imaze kwica abarenga ibihumbi 210 mu gihe ibihumbi 895 byayikize.


Umunyamabanga muri Minisiteri y’Ubuzima muri Kenya, Dr Rashid Aman avuga aho imibare y’abanduye COVID-19 igeze, aha yari ku nyubako ikoreramo iyi Minisiteri i Nairobi





Tanga igitekerezo kuri iyi nkuru



Igitekerezo