Abandi bantu 3 banduye COVID-19 mu Rwanda, bose ubu ni 113

Kuri uyu wa 9 Mata 2020, Miniteri y’ubuzima yatangaje ko habonetse abandi barwayi batatu bashya bafite iyi virus, bituma abarwayi ba COVID-19 mu Rwanda bagera ku 113, muri bo abakize baracyari barindwi (7).

MINISANTE yatangaje ko aba barwayi batatu bashya bakuweho mu bizamini byari byafashwe n’abaganga ku bantu 720 bakekwagaho Coronavirus.

Mu barwayi bashya babonetse harimo babiri bakoreye ingendo mu mahanga n’undi umwe wahuye n’umurwayi wa Coronavirus mu Rwanda.

Minisante yongeye kuvuga ko abarwayi bose bari kuvurirwa ahabigenewe ku bitaro bya Kanyinya mu karere ka Nyarugenge kandi ko bameze neza.

Guverinoma yafashe ingamba nyinshi zo gukumira iki cyorezo ahanini bitewe no kwiyongera kw’abanduye, iheruka no kongera iminsi 15 kuri gahunda ya #GumaMurugo ikazagera tariki 19 Mata.

Mu ngamba zindi harimo ko abantu bagomba kwirinda ingendo zitari ngombwa, ingendo za moto n’imodoka bitwaye abagenzi zarahagaritswe. Nta muntu wemerewe kuva mu karere ngo age mu kandi keretse afite impamvu yumvikana itatuma ategereza ko gahunda ya gumamurugo irangira.

Ikindi Abanyarwanda barasabwa gukaraba intoki kenshi bakoresheje amazi meza n’isabune, no guhana intera nibura ya metero hagati y’umuntu n’undi.

Uwiketseho coronavirus cyangwa ukeneye ibindi bisobanuro ahamagara 114, umurongo w’ikigo cy’igihugu cy’ubuzima RBC.


Abanduye COVID-19 mu Rwanda bageze ku 113 nyuma yuko hagaragaye abandi 3 mu bipimo 720 byafashwe ku bakekwagaho iki cyorezo

Uko bihagaze mu bihugu bigize Umuryango wa Afurika y’Iburasirazuba, EAC no mu karere k’Ibiyaga Bigari muri rusange:

1. Muri RDC: Abanduye ni 215 , hamaze gupfa 20, abamaze gukira ni 13.

2. Muri Kenya: Abanduye COVID-19 ni 84, 7 bamaze kwicwa na COVID-19, 12 bakize iki cyorezo.

3. Mu Rwanda: Abanduye ubu bamaze kuba 113, nta wapfuye yishwe n’iki cyorezo nkuko MINISANTE ibivuga, 7 barakize.

4. Muri Ethiopia: 65 ni bo banduye COVID-19, 2 bamaze gupfa , 4 barayikize.

5. Muri Uganda abantu 53 ni bo inzego z’ubuzima zivuga ko banduye COVID-19, ntawishwe na yo, nta n’urayikira.

6. Muri Tanzania: Abantu 25 ni bo banduye COVID-19, umuntu 1 imaze kumuhitana, 5 barayikize.

7. Muri Somalia: Abantu 12 ni bo bamaze kugaragarwaho n’icyorezo cya COVID-19, 1 cyaramuhitanye, undi umwe yaragikize.

8. Mu baturanyi mu Burundi abantu 3 ni bo bamaze kugaragarwaho na COVID-19, ntawapfuye, nta n’urayikira

9. Muri South Sudan: Abamaze kwandura COVID-19 ni 3, nta wapfuye, nta n’uwayikize.

#Kwibuka26: Inzira y’umusaraba Uwamahoro Claudine yanyuzemo, bamusabye kwicukurira ngo yitabe apfe areba, ubuhamya bwe urabwumva muri iyi Video:





Tanga igitekerezo kuri iyi nkuru



Igitekerezo