Abakekwaho kwica Sandrine wigaga muri UR-CST baburanye, bahakana ibyo bari biyemereye

Imbere y’Urukiko rw’ibanze rwa Nyarugenge, kuri uyu wa Gatatu tariki 25 Nzeri 2019 abasore babiri bakekwaho kwica umukobwa witwa Imanishimwe Sandrine wigaga muri Kaminuza y’u Rwanda mu Ishami ry’Ubumenyi n’Ikoranabuhanga, UR-CST (mu cyahoze ari KIST), baburanye ku ifungwa n’ifungurwa ry’agateganyo.

Uyu mukobwa yishwe tariki 8 Nzeri 2019. Ubushinjacyaha bwavuze ko mu bugenzacyaha no mu bushinjacyaha Niyigaba Emile wari umukunzi wa nyakwigendera na Nsengimana Emmanuel ukekwaho kuba yarahawe ikiraka cyo kwica Sandrine bemeye icyaha.

Ubushinjacyaha bwabwiye urukiko ko ibyo abaregwa bashinjwa bishingiye ku nyandiko mvugo bikoreye bemera icyaha ubwo bari mu bugenzacyaha no mu bushinjacyaha.

Umushinjacyaha yabwiye urukiko ko Niyigaba yari asanzwe ari umukunzi wa Sandrine kugeza mbere gato y’ uko uyu mukobwa apfa. Yavuze ko bafite ibaruwa bafatiye kwa Niyigaba igaragaza ko Sandrine umunsi umwe mbere y’ uko apfa yari yandikiye uyu musore amusaba ko bahagarika urukundo kuko yari yamenye ko uyu musore akunda abandi bakobwa.

Ubushinjacyaha buvuga ko umunsi Sandrine apfa, Niyigaba na Nsengimana bari biriwe bavuga kugira ngo baze guhura basangire banoze umugambi.

Ngo mu bugenzacyaha Niyigaba yavuze ko Nsengimana ariwe wishe Sandrine kuko ngo yari yemerewe amafaranga ibihumbi 200, akabanza guhabwa ibihumbi 100, ibindi 100 akabihabwa igikorwa cyarangiye.

Bombi ngo bavuze ko bamupfutse furari bamukubita ikintu ku mutwe. Ngo Nsengimana yahise atorokera I Huye afatirwayo agarurwa I Kigali.

Abaregwa bahawe umwanya ngo biregure, babwiye urukiko ko impamvu bemeye icyaha ari uko bari bamaze iminsi 4 n’ amajoro 4 bakubitwa.

Niyigaba yemeye ko tariki 7 Nzeri 2019 yashwanye na Sandrine, ariko avuga ko ruriya rwandiko ubushinjacyaha bufite Sandrine yarwanditse bari kumwe ndetse ngo banatandukanye biyunze.

Uyu musore wari umukunzi wa Sandrine avuga ko mbere y’ uko ajya mu bukwe tariki 8 Nzeri yanyuze ku musore amuha amafaranga ibihumbi 5 y’ itike.

Akomeza avuga ko mu masaha y’ umugoroba Sandrine yamwandikiye ubutumwa bugufi amubwira ngo ateke araza kurya kuko yabonaga aragera mu kigo bwije.

Niyigaba avuga ko yategereje Sandrine akamubura yamuhamagara telefone ye nticemo kugeza amenye ko Sandrine yapfuye.

Niyigaba yavuze ko gukurikiranwa afunze byaha ari akarengane bityo asaba kurekurwa.

Nsengimana Emmanuel uregwa kuba yarahawe ikiraka cyo kwica Sandrine avuga ko umunsi Sandrine apfa yari I Huye kugeza saa kumi n’ ebyiri akanavuga ko afite abantu bazi neza aho yari ari.

Nsengimana avuga ko ibyo bemeye babyemeye kubera inkoni asaba urukiko kuzikorera iperereza.

Umushinjacyaha asubijwe ijambo ngo agire icyo avuga ku bwiregure bw’ abaregwa yavuze ko ibyo bavuze byo gukubitwa ari ibintu bimaze kumenyerwa ngo bikorwa n’ abashaka gukwepa ibyaha. Asaba ko urukiko kuzagendera ku nyandiko mvugo z’ abaregwa n’ ibimenyetso rwahawe rugafata umwanzuro.

Umucamanza yavuze ko umwanzuro ku ifungwa n’ ifungurwa uzasomwa ku wa Mbere tariki 30 Nzeri 2019.





Tanga igitekerezo kuri iyi nkuru



Igitekerezo