Abahamwe no kwica abavandimwe ba Disi Deudonné urukiko rwanze ubujurire bwabo

Urukiko Rukuru rwa Nyanza, Urugereko Rwihariye Ruburanisha ibyaha Mpuzamahanga n’Ibyaha Byambuka Imbibi, rwanzuye ko ubujurire bwa Kabiri bw’abaregwa kwica abavandimwe 2 ba Disi Deudonné nta gaciro bufite rugumishaho igihano cya Burundu bakatiwe.

Mu mwanzuro ruriya Rukiko rwafashe kuri uyu wa Kabiri tariki 17 Ugushyingo 2020, harimo ko rutakiriye ubujuire bwa Kabiri bwa Musabyuwera Madeleine n’umuhungu we Kayihura Cassien kuko budakurikije amategeko.

Musabyuwera Madeleine n’umuhungu we Kayihura Cassien, bari batanze ikirego cy’ubujurire bwa Kabiri mu Urukiko Rukuru, Urugereko Rwihariye Ruburanisha ibyaha Mpuzamahanga n’Ibyaha Byambuka Imbibi, rufite i kicaro i Nyanza, ariko aba barega bavuga ko kidakwiye kwakira.

Musabyuwera Madeleine n’umuhungu we Kayihura Cassien bahamijwe n’Urukiko Rwisumbuye rwa Huye tariki 8 Gicurasi 2020, icyaha cyo kwica abavandimwe babiri ba Disi Deudonné, ari bo Uwayezu Denis (yari afite imyaka 9) na Ufiteyezu Raymond (yari afite imyaka 7), bari bahunguye muri ruriya rugo rwa Musabyuwera bari inshuti z’umuryango wa Disi Didas.

Hashize imyaka 26 abo kwa Disi Dieudonné bari bategereje guhabwa ubutabera, nubwo amakuru y’urupfu rwa bariya bana batinze kuyamenya.

Me Bizumuremyi Felix wunganira Musabyuwera Madeleine n’umuhungu we, yari yabwiye Urukiko mu iburanisha riheruka ko bashingiye ku ngingo ya 43 ivuga ko ruriya rugereko rufite ububasha bwo kuburanisha ubujurire bw’ibyaha bya Jenoside n’ibyaha bifitanye isano na yo.

Icyo gihe yagize ati “Iyo ngingo twayisanishije n’ingingo ya 52 aho agace ka 9 ivuga ku bujurire bwa Kabiri mu Rukiko rw’Ubujurire kuko bakatiwe igifungo kirenze imyaka 15.”

Ubushinjacyaha bwhawe ijambo buhakana ibyo uriya Munyamategeko yavuze, buvuga ko iriya ngingo bakoresheje itavuga ku bujurire bwa Kabiri.

Yavuze ko Ingingo ya 52 na yo bakoresheje agace ka 9, mbere yo kukageraho ngo yari kubanza kureba agace ka 1 n’aka 2.

Ati “Iyi ngingo kandi ivuga ku bubasha bw’Urukiko rw’Ubujurire cyangwa (Court of Appeal) ntabwo ivuga ku Rukiko Rukuru Urugereko Rwihariye. Kuvuga ko ari ugusanisha izi ngingo, icyo tubivugaho ni uko izi nkiko zidahuye, akaba adakwiye gusanisha ibidasanishwa.”

Ku wa Kabiri tariki 17 Ugushyingo 2020, nibwo Urukiko Rukuru, Urugereko Rwihariye Ruburanisha ibyaha Mpuzamahanga n’Ibyaha Byambuka Imbibi, rufite i kicaro i Nyanza rwanzuye ko ikirego cy’ubujurire bwa Kabiri ku baregwa nta shingiro gifite, ndetse ko igihano cyo Gufungwa Burundu cyafashwe n’Urukiko Rwisumbuye rwa Huye kigumana agaciro kacyo.

Icyemezo cy’Urukiko kigira kiti “Rwemeje kandi rutegetse ko urubanza no RPA/GEN 00004/2019/TGI/HUYE rwaciwe n’Urukiko Rwisumbuye rwa Huye ku wa 08/05/2020 rwajuririwe rugomba kurangizwa uko rwaciwe…”.

Umwe mu bo mu muryango wa Disi Didas yabwiye Umuseke ko bishimiye icyemezo cy’Urukiko ndetse ko bashimira inzego ziharanira kurwanya Jenoside na Leta babafashije ngo abahamwe no kubahemukira bahanwe.

Yagize ati “Turashimira Perezida wa Repubulika kuko nyuma yo kumutakira baradufashije, turashimira RIB ku rwego rw’igihugu yamanutse igacukumbura ikabona ibimenyetso byari byarahishwe ku Murenge wa Kibirizi, turashimira Urukiko rwisumbuye rwa Huye, turashima IBUKA yatubaye hafi yatugiye inyuma mu buryo bukomeye cyane.”


Inyubako ikoreramo Urukiko Rukuru rwa Nyanza

Menya umwanzuro w’urukiko ku rubanza rw’umuyobozi w’UMUBAVU ku bujurire bw’ubushinjacyaha bwari bwajuririye ifungurwa ry’agateganyo rye:





Tanga igitekerezo kuri iyi nkuru



Igitekerezo