Abadepite basabye ko hafatwa ingamba ku bapfubuzi n’abitukuza

Abagabo bicuruza bazwi nk’abapfubuzi n’abagore bitukuza uruhu, bagaragajwe nk’ikibazo kibangamiye Umuryango Nyarwanda, Guverinoma isabwa kugifatira ingamba mu maguru mashya.

Cyabajijwe Minisitiri w’Umuco na Siporo, Nyirasafari Espérance, uwa Migeprof, Nyirahabimana Solina, Umunyamabanga wa Leta muri Minisiteri y’ubutabera, ushinzwe Itegeko Nshinga n’andi mategeko, Uwizeyimana Evode n’umunyamabanga wa Leta muri Minaloc, ushinzwe imibereho myiza y’abaturage, Alvera Mukabaramba.

Hari mu nama nyunguranabitekerezo yahuje abayobozi b’inzego za Leta n’abafatanyabikorwa bayo yabereye mu cyumba cy’Inteko Ishinga Amategeko kuri uyu wa Kane, yigaga ku bibazo bibangamiye umuryango nyarwanda no kwihutisha iterambere rishingiye ku muryango utekanye.

Bimwe mu bibangamiye umuryango Nyarwanda byagaragajwe harimo amakimbirane, gutandukana kw’abashakanye, inda ziterwa abana, ubuharike, ikoreshwa ry’ibiyobyabwenge n’ibindi.

Depite Nizeyimana Pie yavuze ko ‘abagabo bicuruza, abapfubuzi, ari ikintu gitangiye gufata indi ntera kidakunda kuvugwa kandi kiri mu byugarije umuryango nyarwanda’.

Ati “Ikintu cy’ubupfubuzi gitangiye gufata intera ku buryo gisenya umuryango, aho usanga hari ingo zisenyuka zagiye muri icyo kintu. Abagore bashobora kujya muri ibyo byo kwipfubuza (abitabiriye basekamo). Muraseka ariko ni ikibazo.”

Yavuze ko ari umuco wadutse mu minsi ya vuba ariko umaze gufata indi ntera ku buryo bikeneye gufatirwa ingamba mu maguru mashya.

Ati “Turagitekerezaho gute kugira ngo turebe uburyo iki kintu twagihagarika kigacika kuko cyibasiye umuryango mu minsi iri imbere.”

Depite Nizeyimana yakomeje avuga ku kwitukuza, aho abantu bisiga mukorogo n’ibindi byica uruhu n’umwimerere w’isura yabo, ashimangira ko ari ikintu gifite ingaruka ku muryango.

Ati “Nkaba nabaza Minisitiri muri Minisiteri y’ubutabera niba ibi bintu byo kwitukuza ibikoresho byabo ubitafatanywe atahanwa nk’ufatanywe ibiyobyabwenge.”

Minisitiri Uwizeyimana yavuze ko kumenya abantu bakora ubupfubuzi bitoroshye kuko bakora nka za taxi zidateye amarangi, aho umuntu uyigendamo ari uwuzi nimero za nyirayo gusa.

Yongeyeho ko kuvuga ikibazo cy’ubupfubuzi bikwiye ko impande zose zirebwaho, kuko usanga bituruka ku mibanire cyane cyane iyo bibaye hagati y’abashakanye.

Yatanze urugero aho buri gihe umugabo aheranwa n’akazi, agataha asanga umugore yaryamye, bikabangamira inshingano zo kubaka urugo.

Ati “Iyo umugore amaze kukubura kandi warabaye umugabo wo mu mpapuro gusa ngo uranditsemo uri umugabo wa kanaka [...]. Muraza gusanga bigaruka ku bavuye ku nshingano zabo, kuki cyera bitahozeho.”

Uwizeyimana yasobanuye ko nubwo bitoroshye gufata umupfubuzi, umwe mu babikora aba ari gukora icyaha cyo gusambana kandi hari itegeko ribihana.

Yanavuze ko bitari ngombwa ko buri gihe abantu bihutira gushaka ibihano, ahubwo ikiba gikenewe ari ugushaka uko bakumira ikibitera.

Ingingo ya 136 yerekeye ubusambanyi, uko buhanwa n’uko bukurikiranwa, ivuga ko umuntu wese washyingiwe ukorana imibonano mpuzabitsina n’uwo batashyingiranywe, aba akoze icyaha.

Iyo abihamijwe n’urukiko ahanishwa igifungo kitari munsi y’amezi atandatu ariko kitarenze umwaka umwe. Gukurikirana icyaha cy’ubusambanyi ntibishobora kuba hatareze uwahemukiwe mu bashyingiranywe ku buryo bwemewe n’amategeko.

Abana benshi basa na ba Se kubera kwitukuza

Ku kibazo cyo kwitukuza, Uwizeyimana yavuze ko biri gutera ibibazo birimo kanseri z’uruhu, ndetse ubu abana benshi basigaye basa na ba Se, kuko ba nyina batakigira isura y’umwimerere.

Yasobanuye ko ‘hari amategeko akumira kwinjiza mu gihugu amavuta ahindura uruhu, ahubwo imbogamizi ari uko ari nk’ibiyobyabwenge, bishobora guhindurwa, hakinjizwa ibindi bitari ku rutonde rw’ibitemewe.’

PNG - 1011.4 kb
Abadepite basanga kwitukuza bikwiye gufatwa nk’ibiyobyabwenge

@Umubavu.com
Source: Igihe





Tanga igitekerezo kuri iyi nkuru



Igitekerezo
Kkkkkx Kuya 8-12-2018

Njye ndasanga aba badepite bari bafite ibindi bakwiga biruta kujya kwiga ku bapfubuzi no ku bitukuza. Kuko ibyo byose bikorwa n,abanyamurengwe ,ntabwo waba wabuze ibyo kurya ngo ubone ibyo kugura ayo mavuta ya mukorogo,ikindi waburaye ntabwo wagira ibyiyumvo by’umubiri ko wajya kirongoza.Birababaje ko inteko yata igihe ku banyamurengwe bitukuza n,abishimisha imibiri yabo.,hakiri imirenge itagerwamo n,imodoka kubera kubura imihanda,hakiri Ruswa ica ibintu mu ma Banki nka BPR mu itangwa ry’inguzanyo,hakiri ubujura bwinshi buhishe bunyunyusa umuturage harimo gusoreshwa cyane birimo gutuma abenegihugu bagihunga ngo bagiye gukorera ahandi, harimo kwirukana abacuruzi bato hakimakazwa umucuruzi umwe cg groupe yabake bikubira ibyiza byose by’igihugu. Imisoro idasobanutse yakwa rubanda niyigwaho. Ubushomeri ,nlihutazwa ry’uburenganzira bwa muntu,ivangura mu banyagihugu, ibyo byose ntibyigwaho ahubwo ngo mukorogo ngo abapfubuzi ?Iyo muvuga nibura ko mwize uburyo haboneka Trame iva Kigali ijya Kamembe cg igabanya embouteillage y,umugoroba byari bwumvikane ariko ntabwo mwatekereza ibyo mutazi..Iyo mwiga uburyo Petrole nkeya iri mu gihugu yacukurwa byari bwumvikane ariko murasetsa imikara ,murambura abacuruzi utwabo., ngo mukorogo.?

emmy Kuya 7-12-2018

mbegabyiza