Abadepite ba USA bose bategetswe kwambara udupfukamunwa

Inteko Ishinga Amategeko umutwe w’abadepite muri Amerika yategetse abadepite n’abakozi bose kwambara udupfukamunwa mu gihe abishwe na Coronavirus muri Amerika ubu barenze 150,000.

Madamu Nancy Pelosi ukuriye iyi Nteko, yaburiye ko uzarenga kuri iri tegeko rishya ashobora kuvanwa mu bagize iki cyumba cy’Inteko.

Yafashe uyu mwanzuro nyuma y’uko Louie Gohmert, umudepite wa leta ya Texas wo mu barepubulikani wakunze kuboneka kenshi aho Inteko ikorera nta gapfukamunwa yambaye, ubu bamusanzemo Covid-19.

Byari biteganyijwe ko Bwana Gohmert umunsi bayimusanzemo afata urugendo ari kumwe na Perezida Donald Trump.

Pelosi yategetse iki?

Madamu Pelosi uhagarariye leta ya California wo mu bademokarate, ejo ku wa Gatatu nijoro (muri Amerika) yavuze ko abadepite bazemererwa gusa kuvanamo agapfukamunwa igihe bari kugeza ijambo ku Nteko.

Yagize ati "Ukuriye Inteko yizeye ko buri wese no mu bakozi azakurikiza ibi nko kubaha ubuzima no kwirinda, ndetse no kurinda abandi bose bari muri iyi nzu no hafi yayo".


Nancy Pelosi yavuze ko utazubahiriza ibi ashobora gusohorwa

Madamu Pelosi yavuze ko "kunanirwa kwambara agapfukamunwa bizafatwa nko kurenga ku mabwiriza bikomeye", aburira ko ushinzwe umutekano ashobora gusohora uwayarenzeho.

Urubuga GovTrack.us ruvuga ko abadepite 10 ba Amerika, batatu b’abademokarate na barindwi b’abarepubulikani, bamaze kubasangamo Coronavirus.

Louie Gohmert yavuze iki?

Uyu mugabo w’imyaka 66, basanze yaranduye Covid-19 ubwo yari apimwe nk’uko bikorwa buri gihe ku biro bya Perezida wa Amerika bitewe n’uko ejo ku wa Gatatu byari biteganyijwe ko ajyana i Texas na Perezida Trump.

Bwana Gohmert yahise asubira ku biro bye kubimenyesha bagenzi be, ibitangazamakuru byo muri Amerika bivuga ko yasubiyeyo yambaye agapfukamunwa.

Yanatanze ikiganiro aho yavuze ko akeka ko n’agapfukamunwa ke kaba ariko kamwanduje.


Bwana Gohmert yagaragaye kenshi atambaye agapfukamunwa mu nteko ya Amerika, aha ni ku wa Kabiri

Gusa ni umwe mu badepite b’abarepubulikani wakunze kuboneka ku nyubako y’Inteko atambaye agapfukamunwa.

Ku wa Kabiri, Bwana Gohmert yavanyemo inshuro nyinshi aka gakoresho mu Nteko yateranye amasaha agera kuri atanu iri kumva umucamanza mukuru wa Amerika William Barr.

Ifoto iboneka kuri Twitter yerekana abagabo babiri bamwegereye nabo nta n’umwe ukambaye. Ibiro bishinzwe ubutabera muri Amerika bivuga ko kubera iyo mpamvu, Bwana Barr nawe agiye gusuzumwa.

Muri Amerika, nubwo ku ikubitiro ry’iki cyorezo habayeho impaka ku gapfukamunwa, abahanga mu buzima ubu bemeza ko gupfuka ibice iyi virus yanduriramo bigabanya ibyago byo kuyandura no kuyikwiza.

Kugeza ubu muri Amerika abagera kuri 4,510,801 bamaze kwemezwa ko banduye COVID-19, abagera kuri 2,209,418 barayikize mu gihe imaze guhitana 153,027.

Ku rwego rw’isi abagera kuri 17,031,281 bamaze kwemezwa ko banduye COVID-19, abagera kuri 9,951,105 barayikize mu gihe imaze guhitana ubuzima bw’abantu 667,060.


Nancy Pelosi yaburiye abadepite ko utambaye agapfukamunwa bazamusohora

Gitifu arashinjwa guhohotera umuturage amuziza ubutaka bwe, uwo Polisi yishe imurashe, Dr Kayumba yakatiwe igifungo cy’umwaka, CSP Zuba wemereye umuvandimwe wa Gen Patrick Nyamvumba gusurwa yakatiwe gukomeza gufungwa n’andi makuru menshi utapfa gusanga ahandi ni k’UMUBAVU TV ONLINE:





Tanga igitekerezo kuri iyi nkuru



Igitekerezo