Abadepite b’Abarundi ntibashyigikiye Martin Ngoga watorewe kuyobora EALA

Nyuma yuko Umunyarwanda Martin Ngoga atorewe kuyobora Inteko Ishinga Amategeko y’Umuryango w’Ibihugu bya Afurika y’Uburasirazuba (EALA) mu matora yabaye kuri uyu wa kabiri tariki ya 19 Ukuboza 2017, bamwe mu badepite b’abarundi nabo babarizwa muri iyi Nteko bashyize umukono ku rwandiko rwamagana itorwa ry’uyu mudepite nk’umukuru w’urwo rwego bavuga ko amategeko atubahirijwe.

BBC dukesha iyi nkuru ivuga ko abo badepite bari kumwe n’abo mu gihugu cya Tanzaniya bavuga ko mu kugena ugomba kuyobora urwo rwego badatora, ko ahubwo harebwa igihugu kigezweho kujya muri uwo mwanya.

PNG - 888.2 kb
Aba ni bamwe mu badepite b’Umuryango wa EALA


Muri iryo tangazo ryashyizweko umukono n’Abadepite bose b’Abarundi baturuka mu mashyaka atandukanye yo mu gihugu cyabo, bari mu Nteko Inshinga Amategeko y’Akarere k’Uburasirazuba bwa Afrika, batangira bamenyesha ko hashize amezi agera kuri arindwi yose ibikorwa bitaratangira kuko bari barindiriye Abadepite bo mu gihugu cya Kenya kugira ngo imibare iteganywa n’amategeko yuzure.

Aba badepite binubiye uburyo amatora y’ugomba kuyobora uru rwego yagenze, bavuga ko guhererekanya kw’ibihugu bigize uyu muryango mu kuyobora Inteko Nshingamategeko ntaho bihuriye no guhangana mu matora.

PNG - 706.2 kb
Martin Ngoga watorewe kuyobora EALA


Abo badepite uko ari umunani bakomeza bavuga ko bari bashyikirije urwandiko ushinzwe amategeko muri iyo Nteko, berekana amakenga yerekeye ugiye kuyobora urwo rwego ariko bikarangira nta gisubizo babonye.

Bakomeza bavuga kandi ko ku munsi wa kabiri tariki ya 19 Ukuboza 2017, ushinzwe amategeko muri iyo Nteko yokoresheje amatora Abarundi n’Abatanzaniya basohotse, bakavuga ko yarenze ku Itegeko rya 53.1 rivuga ko ibihugu bigenda bihererekanya ubuyobozi bitanyuze mu matora.

Ibi ngo byanagarutsweho n’akanama gashinzwe kunganira uyu munyamategeko kamubwira ko amatora ataba mu gihe n’imibare iteganywa n’amategeko ituzuye, ariko abirengaho abibona.

Izi mpamvu zose nizo zateye abo badepite b’Abarundi kutemeranya n’itorwa rya Martin Ngonga ngo mu gihe babona ko amategeko agenga Umuryango w’Ibihugu bya Afrika y’Uburasirazuba yirengagijwe nkana ndetse n’ibindi bihugu bisangiye uyu muryango bidahari, bityo bagashingira kuri ibi byose bemeza ko ayo matora nta gaciro yakagombye guhabwa.

Barangiza basaba ko amategeko yakubahirizwa mu nyungu rusange z’uyu muryango ibi bihugu byose bisangiye.

Ibihugu byitabiriye ayo matora ni u Rwanda rukomokamo uwatowe Martin Ngoga, Uganda, Kenya na Sudani y’Epfo.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo