ADEPR ntivuga rumwe n’abakorerabushake ba radio yayo bayishinja kubambura

Abakorerabushake bari bamaze umwaka urenga bakora kuri Life Radio y’Itorero ADEPR bahagaritswe kubera ikibazo cy’amikoro, bavuga ko bambuwe umushahara w’amezi 14 nubwo ubuyobozi bw’iyi Radio buvuga ko nta deni bubarimo.

Ubuyobozi bw’iyi radio bunavuga ko ibyo bagenerwaga atari umushahara, ahubwo ari itike bagenerwaga bitewe n’aho buri wese aturuka.

Nyuma y’uko amasezerano bari bafitanye na Life Radio arangiriye ku wa 4 Nzeri 2018 abakorerabushake umunani bandikiye ubuyobozi bw’iyi radiyo bayisaba ko bakongererwa igihe, basubizwa ko bitashoboka ariko ko nikomeza kwagura ibikorwa byayo hakaboneka n’ubushobozi, bashobora kuzongera guhamagarwa bagakorana.

Umwe muri aba bakorerabushake waganiriye na IGIHE, yavuze ko amasezerano yabo yarangiye badahawe ‘umushahara’ w’amezi 14.

Yagize ati ‘‘Byavugwa ko bazagabanya (abakozi) ariko twumvaga ko bazabanza bakaduhemba kuko hafi ya twese baturimo umushahara w’umwaka n’amezi abiri none ntayo baduhaye.’’

Aba banyamakuru bavuga ko bagiye kwiyambaza inzego zishinzwe itangazamakuru zikabavuganira, byananirana bakaziyambaza inkiko.

Umunyamabanga wa ADEPR, Pasiteri Gatemberezi Muzungu Paul, yabwiye IGIHE ko abasezerewe atari abakozi ba Life Radio.

Yagize ati “Ntabwo ari abakozi birukanwe, ahubwo bari abakorerabushake. Hari amafaranga y’urugendo twabageneraga ari hagati y’ibihumbi 20 na 25 ku kwezi kandi nta numwe tubereyemo umwenda.”

Umuyobozi wa Life Radio, Hakizimana Justin, yatangarije IGIHE ko ibivugwa n’aba bakorerabushake atari ukuri, anagaragaza urupapuro basinyagaho bahabwa amafaranga y’urugendo ari hagati y’ibihumbi bibiri n’ibihumbi bitandatu buri cyumweru.

Yagize ati "Twaje gusanga nta bushobozi buhari bwo kubagumana bose duhitamo kutongera amasezerano twari dufitanye, ariko nta numwe dufitiye ideni ni abakorerabushake bahabwaga itike kandi rwose nta numwe utarayihawe ndetse twabageneye n’indi tike y’inyongera y’amafaranga ibihumbi 30 kuri buri muntu, bose bayafashe tariki ya 11 Nzeri 2018."

Hakizimana yakomeje ati “Ntabwo bazaga buri munsi, umuntu yazaga rimwe cyangwa kabiri mu cyumweru kandi harimo n’abafite ahandi akazi. Bari abakorerabushake kandi nta n’umwe wagiye adahawe amafaranga y’urugendo yagombaga guhabwa. »

Akomeza asobanura ko Life Radio yari ifite abakozi 23, barimo bane bafite amasezerano y’akazi n’abandi 19 b’abakorerabushake baza kabiri mu cyumweru.

Abo 19 nibo amasezerano yabo y’akazi yarangiye, mu busabe bushya bahitamo gukomezanya 10 aba aribo bongerewe amasezerano, undi umwe akaba yarabonye akazi ku yindi radiyo.





Tanga igitekerezo kuri iyi nkuru



Igitekerezo