Wa mwana basanganye Ebola muri Uganda yamuhitanye!

Nyuma yuko Minisiteri y’Ubuzima muri Uganda yemeje ko hari umuntu basanganye indwara ya Ebola mu karere ka Kasese mu burengerezuba bwa Uganda, ubu yamaze kumuhitana.

Uyu Ebola yahitanye ni umwana w’umukobwa w’imyaka icyenda wavanye na nyina muri DR Congo ku wa Gatatu w’iki cyumweru baje kwivuza.

Kasese muri Uganda ni agace kari kuri 140Km uvuye mu mujyi wa Beni cyangwa uwa Butembo muri DR Congo.

Ejo ku wa Kane nibwo ibizamini by’amaraso byari byagaragaje ko uyu mwana afite Ebola.

Uyu mwana yari yaketsweho iyi ndwara ubwo ku mupaka wa Mpondwe bapimaga abambuka bakamusangana umuriro ukabije no kuva amaraso mu kanwa.

Apfuye yari yashyizwe mu bitaro bya Bwera mu ishami rishinzwe kuvura Ebola.

Mu kwezi kwa gatandatu muri aka gace ka Uganda hagaragaye abantu babiri bafite Ebola.

Umugabo w’umunya-Uganda n’umugore we w’umunye-Congo bapfushije abana babo babiri bafashwe na Ebola bagiye hakurya muri Congo.

Ebola muri DR Congo imaze gufata abantu 3,000 kuva mu kwezi kwa munani umwaka ushize, abarenga 1,800 yarabahitanye nk’uko bivugwa n’ishami ry’umuryango w’abibumbye ryita ku buzima.

Hashize iminsi hari imiti iri kwifashishwa mu kuvura Ebola, abahanga bavuga ko ivura neza ku kigero cya 90%. Hari kandi uruingo rw’iyi ndwara ariko rudahagije kuri bose.

Ibihugu by’u Rwanda n’u Burundi byafashe ingamba zikomeye mu gusuzuma abambuka umupaka wabyo na DR Congo birinda ko iyi ndwara ibageraho.


Uyu ni umwe mu bana wafashwe na Ebola muri Congo mu mezi ashize ubwo yariho yitabwaho n’abaganga





Tanga igitekerezo kuri iyi nkuru



Igitekerezo