Umuryango wa Rusesabagina uravuga ko amerewe nabi, RCS yo iti

Umuryango wa Paul Rusesabagina uvuga ko aho afungiye muri Gereza ya Nyarugenge iri i Mageragere mu Mujyi wa Kigali yababwiye ko arwaye, kandi ubuzima bwe bukomeje kumera nabi kubera indwara asanganywe zisaba imiti ihoraho.

Rusesabagina, azwi cyane ku isi kubera film ’Hotel Rwanda’ itavugwaho rumwe ikina inkuru y’uko yarokoye Abatutsi barenga 1,000 muri Jenoside yakorewe abatutsi mu Rwanda muri Mata 1994.

Ubu Rusesabagina afunzwe aregwa ibyaha by’iterabwoba bishingiye ku bitero byiciwemo abantu mu 2018 na 2019 byakozwe n’umutwe wa FLN yemeye ko yashinze, ibyaha mu rukiko kugeza ubu atigeze yemera cyangwa ngo ahakane.

Umuryango we uravuga ibi mu gihe urwego rushinzwe imfungwa n’abagororwa rwo ruvuga ko Rusesabagina ari muzima, ko ngo "nta n’igicurane arwaye".

Itangazo ryasohowe n’umuvugizi wa Hotel Rwanda Rusesabagina Foundation rivuga ko amafoto ya vuba y’itangazamakuru "agararagaza ko ubuzima bwe bumeze nabi."

Iryo tangazo rigira riti "Mu biganiro aheruka kugirana n’umuryango we yababwiye ko agira kuzungerwa, kubabara umutwe, kwitura hasi agata ubwenge, bishobora kuba biterwa n’umuvuduko ukabije w’amaraso utagenzurwa, n’uburyo afunzemo".

Rusesabagina yatakaje 6Kg kandi yasabye gushyirwa mu bitaro inshuro eshatu, nk’uko iri tangazo rikomeza ribivuga.

Rusesabagina aracyari kuburana ku ifungwa n’ifungurwa ry’agateganyo, mu mpamvu atanga asaba kurekurwa akaburana adafunze, avugamo iy’uburwayi.

Umuvugizi w’urwego rushinzwe imfungwa n’abagororwa, SSP Pelly Gakwaya Uwera yabwiye BBC dukesha iyi nkuru ko ngo ibyo bivugwa n’umuryango we nta kuri kurimo kuko "Rusesabagina ni muzima".

Ati "Icyo nakubwira, Rusesabagina nta n’umuriro afite, nta n’igicurane. Nta kibazo afite habe na gito".

Madamu Uwera, avuga ko ngo ubuzima bwa Rusesabagina bwitaweho byihariye, kandi avugana n’umuryango we kuri Telefone ya gereza nk’abandi bafunze, kuko bitemewe gusurwa kubera icyorezo cya Covid-19.

Yakomeje ati "Tumuvuza nk’uko tuvuza abandi mu gihe barwaye, we noneho kubera umuvuduko w’amaraso, aravurwa byihariye."

Ku wa Gatatu, Minisiteri y’Ubuzima yatangaje ko ku bantu 50 bari batahuweho Covid-19 mu Rwanda, 27 muri bo bari muri gereza ya Nyarugenge iri I Mageragere mu mujyi wa Kigali, aho na Rusesabagina afungiye.

Rusesabagina azongera kuburana ubujurire ku ifungwa n’ifungurwa ry’agateganyo tariki ya 20 z’uku kwezi. Imanza ze ubu ziba hifashishijwe ikoranabuhanga mu kwirinda ikwirakwira ry’icyorezo cya COVID-19.

Hagati aho arasaba urukiko rwisumbuye rwa Nyarugenge ko rusesa icyemezo cyo kumwongerera indi minsi 30 yo gufungwa by’agateganyo mu gihe hategerejwe ko urubanza nyirizina rutangira.

Nyuma yo gutandukana n’abanyamategeko babiri bivugwa ko yari yahawe n’urugaga rw’abunganizi mu Rwanda, ubu Rusesabagina arunganirwa na Gatera Gashabana, umwe mu bunganizi 7 bashyizweho n’umuryango we.

Kugeza ubu uko Rusesabagina yafashwe akagezwa mu Rwanda ntibivugwaho rumwe, dore ko bitarasobanurwa mu buryo butomoye uretse kuba gusa bivugwa ko nyiri ubwite yavuze ko ngo yari agiye mu Burundi akisanga mu Rwanda.


Rusesabagina ari kuburana ubujurire ku gufungwa indi minsi 30 y’agateganyo

Uburyo umuhanuzi yamubeshye ko ngo adakwiranye n’umugore we ahubwo bikarangira amumutwaye we agasigara aririra mu myotsi:





Tanga igitekerezo kuri iyi nkuru



Igitekerezo