Rusesabagina  uyu munsi  ntiyagaragaye   mu rukiko

Urukiko rukuru i Kigali rwategetse ko urubanza ruregwamo Paul Rusesabagina n’abandi bantu 20 rukomeza, nubwo uyu ufatwa nk’uri kw’isonga ry’abaregwa yarwivanyemo.

Iburanisha ryo kuwa gatatu ritangiye, umucamanza yavuze ko gereza yandikiye urukiko imenyesha ko Rusesabagina yanze kwitabira iburanisha uyu munsi "kuko nta butabera yiteze ku rukiko".

Ubushize, Rusesabagina yari yasabye amezi atandatu yo gutegura ubwiregure bwe, urukiko ntirwayamuha, yahise atangaza ko atazagaruka muri uru rubanza.

Paul Rusesabagina n’abo bareganwa, baregwa ibyaha by’iterabwoba bishingiye ku bitero by’inyeshyamba za FLN byiciwemo abantu mu majyepfo ashyira uburengerazuba bw’u Rwanda hagati ya 2018 na 2019.

Rusesabagina wari ukuriye umutwe wa politiki ukuriye izo nyeshyamba, ntabwo ariregura ku byaha aregwa, avuga ko yagejejwe mu Rwanda ashimuswe.

Ubushinjacyaha na bamwe mu bunganira abandi baregwa uyu munsi basabye ko urubanza rukomeza kuko Rusesabagina yamenyeshejwe igihe ruzabera agahitamo kutitaba ku bushake.

Nyuma yo kwiherera, urukiko rwategetse ko uru rubanza rukomeza abandi baregwa biregura kuko Rusesabagina "nta mpamvu ifatika yatanze ituma atirabira iburanisha."

Mu gufata uwo mwanzuro urukiko rwatanze ingero z’izindi manza zakomeje mu gihe runaka abaregwa badahari, kuko bivanye mu manza zabo, nka Bernard Munyagishari, Ingabire Victoire na Leon Mugesera.

Urukiko ruvuga ko "kwitabira urubanza k’umuburanyi ari uburenganzira bwe" ariko "iyo atitabiriye nta mpamvu ifatika bitabuza urubanza gukomeza", nk’uko umucamanza yabisomye.

Mu gihe Rusesabagina atazaba ahari, urukiko rwavuze ko azajya amenyeshwa aho iburanishwa ribera n’igihe rizabera.

Rwategetse kandi ko igihe cyose urubanza rutarapfundikirwa (rutarasozwa) azaba afite uburenganzira bwo kugaruka akitabira urubanza.

Urubanza rwakomeje humvwa ubwiregure bwa Nsabimana Callixte uzwi nka Sankara, wahoze ari umuvugizi w’umutwe wa FLN, uburana yemera ibyaha kandi wumvikanye ashinja Rusesabagina.





Tanga igitekerezo kuri iyi nkuru



Igitekerezo