Rusesabagina n’abarimo ’Sankara’ bazahurira mu rubanza rumwe

Urugereko Rwihariye rw’Urukiko Rukuru Ruburanisha Ibyaha Mpuzamahanga n’Ibyambuka Imbibi ruri i Nyanza mu majyepfo y’u Rwanda kuri uyu wa Kane tariki ya 03 Ukuboza 2020 rwategetse ko abantu 20 bo mu mutwe wa MRCD-FLN barimo na Paul Rusesabagina wari umukuru wa MRCD bahurizwa mu rubanza rumwe.

Umucamanza yavuze ko imanza zabo zigomba guhuzwa kuko ibyaha bakurikiranyweho by’iterabwoba no kurema umutwe w’ingabo utemewe babihuriyeho.

Ikindi ngo ni uko iyo imanza zisoberekeranye ziregewe urukiko rumwe, Perezida w’urukiko afite uburenganzira busesuye bwo gutegeka ko ziba urubanza rumwe.

Umucamanza yanavuze ko zitaburanishirijwe hamwe, ngo imikirize yazo ishobora kuvuguruzanya.

Mu iburanisha riheruka ryo ku itariki ya 26 Ugushyingo 2020, ubushinjacyaha bwari bwasabye ko imanza zabo zihurizwa hamwe.

Bwavuze ko bose ibyaha bakurikiranyweho bisa kandi bigendanye n’ibitero byagabwe n’uwo mutwe mu myaka ibiri ishize mu majyepfo ashyira uburengerazuba bw’u Rwanda.

Nsabimana Callixte uzwi nka ’Sankara’ yumvikanye mu iburanisha ryo mu kwezi kwa Cyenda avuga ko urubanza rwe n’urwa Nsengimana basimburanye ku buvugizi bwa FLN zahuzwa n’urubanza ruregwamo Paul Rusesabagina wagejejwe mu Rwanda mu buryo n’ubu butavugwaho rumwe.

Sankara kandi yari yavuze ko icyifuzo cy’ubushinjacyaha cyo guhuza izi manza ngo gishimishije kuko na we yari yarabisabye.

Uretse Sankara wagaragazaga ko yifuza ko izi manza zahuzwa, na Herman Nsengimana mu iburanisha riheruka yavuze ko ngo na we yumva guhuza izo manza ntacyo bimutwaye, gusa abwira urukiko ko ubwo yafatwaga muri Kongo, ngo yafatanywe n’abandi barwanyi b’umutwe wa FLN basaga 300, bose bajyanwa mu kigo cya Mutobo gihugurirwamo abari mu mitwe y’abarwanyi, ariko ngo agatangazwa n’ukuntu we yakuwe muri icyo kigo wenyine agafungwa.

Kuri ibi, umucamanza yavuze ko ngo ibyo byazasobanurwa mu rubanza mu mizi, cyane cyane ko ngo abo Herman avuga bashobora kuba bari muri abo 17 bareganwa na Rusesabagina.

Mu kwezi kwa Cumi uyu mwaka, uru rukiko ruburanisha ibyaha by’iterabwoba nibwo rwategetse ko urubanza rwa Callixte Nsabimana uzwi nka ’Sankara’ n’urwa Herman Nsengimana zihuzwa.

Icyo gihe urukiko rwavuze ko ngo rwasanze ubusabe bw’ubushinjacyaha bwo guhuza izi manza bufite ishingiro kuko ngo ibyo baregwa bifitanye isano.

Aba bombi babaye abavugizi b’umutwe wa FLN hagati ya 2018 na 2020, bashinjwa ibyaha by’iterabwoba n’ubwicanyi. Bombi baje gufatwa mu bihe bitandukanye bazanwa mu Rwanda.

Guhuza izi manza bibaye mu gihe ku ruhande rwa Paul Rusesabagina kuri uyu wa Gatatu tariki ya 02 Ukuboza 2020, Urukiko Rwisumbuye rwa Nyarugenge rwatesheje agaciro ubujurire bwe ku kongererwa igihe cyo gufungwa by’agateganyo, ubu akaba agiye gukomeza gufungwa by’agateganyo indi minsi 30 mu gihe hagitegerejwe urubanza mu mizi.

Ihuzwa ry’izi manza kandi ryakomojweho na Pereizda Kagame mu kwezi kwa Cyenda uyu mwaka ubwo yavugaga ku ifatwa rya Paul Rusesabagina, aho yavuze ko ngo imanza z’aba zizahuzwa.

Icyo gihe yagize ati "... bazagira aho bahurira buri wese ashinje undi ibyo yakoranye n’undi, cyangwa ibyo yakoresheje undi..."

Umucamanza yavuze ko uru rubanza rukomatanye rw’aba bantu 20 bo mu mutwe wa MRCD-FLN ruzatangira kuburanishwa ku itariki ya 26 y’ukwezi gutaha kwa Mbere 2021.


Rusesabagina uko yafashwe akagezwa mu Rwanda kugeza ubu ntibivugwaho rumwe, aha yari mu rukiko mu kwezi kwa Cyenda


Nsabimana Callixte ’Sankara’ (ibumoso) na Herman Nsengimana wamusimbuye ku buvugizi bwa FLN, bombi baje gufatwa mu bihe bitandukanye bajyanwa mu Rwanda

U RWANDA RUHAKANA KO ABARIMO PEREZIDA KAGAME BAKOZE IBYAHA BY’INTAMBARA, RUJIGIRO NTAKOZWA IBYO KWISHYURWA N’U RWANDA AMAFARANGA RWATEGETSWE N’URUKIKO RWA EAC KUMWISHYURA, AYA MAKURU N’ANDI URAYIYUMVIRA BIRAMBUYE MURI IYI VIDEO:





Tanga igitekerezo kuri iyi nkuru



Igitekerezo