Akayabo Leta y’u Rwanda yaciwe mu nkiko iregwa kwica amategeko

Kuri uyu wa Mbere tariki ya 26 Ukwakira 2020, Komisiyo y’Igihugu ishinzwe Abakozi ba Leta yagejeje ku Nteko Rusange y’Inteko Ishinga Amategeko Imitwe Yombi, raporo y’ibikorwa by’umwaka wa 2019/2020 na gahunda y’ibikorwa byayo by’umwaka wa 2020/202. Mu bikubiye muri iyi raporo harimo ko Leta yaciwe 949,558,559 Frw nyuma y’uko abakozi bayishoye mu manza kubera ibyemezo bafatiwe bitubahirije amategeko.

Mu mwaka 2019/2020, Komisiyo yakoze isesengura rya 5 ry’imanza zaciwe muri 2018/2019 zijyanye n’uko abakozi barega Leta kubera ibyemezo bafatiwe bitubahirije amategeko.

Iri sesengura ryagaragaje ko Leta yaciwe 949,558,559 Frw agizwe na 763,963,633 Frw yari asanzwe ari uburenganzira bw’abakozi bakagombye kuba barahawe kabone n’iyo batajya mu nkiko, naho 185,594,926 Frw akomoka ku ndishyi z’akababaro, igihembo cy’abavoka n’amagarama abakozi batanze mu nkiko.

Byagaragaye kandi ko Inzego za Leta zo zatsindiye 8,540,000 Frw agizwe n’ayo Urukiko rwageneye Leta kubera gushorwa mu manza nta mpamvu n’abakozi bayireze bagatsindwa.

Mu mwaka wa 2019/2020 kandi Komisiyo yakoze igenzura mu Nzego za Leta 9, muri zo inzego 4 yasanze amapiganwa yarakoreshejwe mu buryo bwubahirije amategeko.

Mu Nzego 5 igenzura ryasanze hari ibibazo birimo gutangaza amanota y’ikizamini cyanditse anyuranye n’ari ku makayi, abakandida 7 bongerewe amanota, 6 bagabanyirizwa amanota ; ibi ngo byagaragaye mu turere tubiri.

Mu bindi byagaragaye harimo kwemerera abakandida 8 gukora ikizamini kandi batagaragara ku rutonde rw’abemerewe gukora amapiganwa ; ibi byo byagaragaye mu Karere kamwe.

Mu bindi byagaragaye kandi harimo gushyira umukandida mu mwanya ataratsinze amapiganwa ; ibi na byo bikaba byaragaragaye mu Karere kamwe.

Mu bigaragara muri iyo raporo kandi harimo gushyira mu mwanya abakandida badafite impamyabumenyi zisabwa, ibi byagaragaye ku bakandida 3 mu Karere kamwe hakabamo n’imikono itandukanye ku ikayi y’ikizamini na byo byagaragaye mu Karere kamwe.

Ku bijyanye n’imirimo, iyi raporo igaragaza ko mu mwaka wa 2019/2020, imyanya yatangajwe ko ikeneye abakozi yari 2,021, abasabye akazi kuri iyi myanya bakaba 258,914 ; abatoranyijwe kuri iyo myanya bakaba 149,835 (57.8%) ; abitabiriye amapiganwa ni 52,187 (34.8% by’abatoranyijwe) naho abatsinze nibura n’amanota 70% ni 4,548 (8.7% by’abitabiriye amapiganwa).

Abakandida bashyizwe mu myanya bari 2,021 (44.4% by’abatsinze amapiganwa), muri bo abagore ni 682 (33.7%). Muri rusange abatsinda ni bake ugereranyije n’abakoze amapiganwa ari ku bagabo ari no ku bagore nk’uko iyi raporo ibigaragaza.

ABATUBAJIJE AMAKURU YA CYUMA HASSAN WA ISHEMA TV TWAYABABONEYE UKO ABAYEHO, ABA BANNYAHE BATI "UBU TWAHINDUTSE IMPUNZI MU GIHUGU CYACU", IYUMVIRE BYINSHI MURI IYI VIDEO UTAPFA GUSANGA AHANDI:





Tanga igitekerezo kuri iyi nkuru



Igitekerezo