Kigali Coach, umwihariko muri Kampani zitwara abagenzi

Kigali Coach ni imwe muri Kampani itwara abagenzi mu buryo bwa rusange, ikorera mu muhanda Kigali-Musanze kuko ariwo yaherewe uburenganzira n’Ikigo Ngenzuramikorere, RURA. Yatangiye ibikorwa byayo mu 2013, iyi kampani ikaba imaze kuba ubukombe mu gutwara abagenzi.

Mwunguzi Theoneste ni Chairman wa Kigali Coach avuga ko nubwo umwuga wo gutwara abantu ugira ibibazo byinshi, muri Kampani yabo urebye ngo nta bibazo byinshi bahura nabyo kubera ubunararibonye bafite ndetse no gukoresha uburyo bugezweho mu gutwara abagenzi.

Muri Kigali Coach kubahiriza igihe ngo ikintu kitabwaho cyane mu gukomeza imikoranire myiza n’abakiriya babo. Bafite kandi abakozi bashinzwe kugenzura ibikorwa byabo aho imodoka zihagarara hose (Stage of Control) mu kunoza imikorere (Kigali-Nyirangarama-Musanze-Rubavu).

Reba ikiganiro umuyobozi mukuru yagiranye n’umubavu.com

Uretse aba bakozi bagenzura imikorere y’iyi kampani kandi muri Kigali Coach bafite uburyo bw’ikoranabuhanga bukoreshwa bagenzura igihe imodoka ihagurukiye ndetse n’aho yaba igeze mu gihe runaka.

Ku kibazo gikunda kugaragara henshi cy’abashoferi usanga batwara abagenzi mu buryo bunyuranije n’amategeko, Chairman wa Kigali Coach avuga ko bafite abakozi b’abagenzuzi baba bari hamwe ku mihanda aho bahagarika imodoka bakabaza Ticket buri mugenzi mu kunoza serivisi yo gutwara abantu. Uyu muyobozi ashimangira ko mu gihe cyose mu modoka hagaragara umugenzi udafite Ticket yaba ari amabwiriza umushoferi yihaye kuko kompani itabikora.

Kigali Coach yatangiye ibikorwa byo gutwara abantu ifite imodoka 22 mu gihe kugeza ubu igeze ku modoka zisaga 45 n’intumbero yo kugura amabusi manini agezweho mu gutwara abagenzi mu buryo bushimishije kandi nabwo bugezweho ndetse ngo biteguye no gukomeza mu rindi terambere ryose ryaza muri uyu mwuga.

Uyu muyobozi wa Kigali Coach avuga ko ntacyo ashinja Leta y’u Rwanda binyuze mu kigo ngenzuramikorere, RURA bakorana buri munsi ngo kuko ibyo bagenerwa byose babihabwa ndetse bakabareberera hose.

Asoza ikiganiro yagiranye n’umubavu.com asaba gusa inzego zose bakorana mu mwuga wabo wa buri munsi gukomeza imikoranire myiza na bo mu gukomeza umurongo wo guteza imbere igihugu n’abanyarwanda muri rusange dore ko gutwara abantu ari umwuga ugira uruhare runini mu bukungu bw’igihugu.

@Umubavu.com





Tanga igitekerezo kuri iyi nkuru



Igitekerezo