Ubuhamya: Urukundo ruruta byose kandi amabwire ntiyubaka

Amazina yanjye nitwa Gatesi Jolie (Amazina yahinduwe), ntuye muri Leta Zunze Ubumwe za Amerika, mu mujyi wa Chicago, muri Leta ya Illinois. Nakundanye n’umuhungu turirimbana muri Korale ariko ababyeyi banjye batabishaka ngo nuko afite ubumuga bw’ubugufi kandi akaba atifashije nyamara birengagije ko Imana ariyo igena byose.

Igihe cyose twakundanye ntabwo nigeze ngira amahoro kuko iwacu bambwiraga ko yandoze ko nta mukobwa muzima wakwemera gukundana n’umusore ufite ubumuga bw’ubugufi nk’ubw’uwo yari afite kandi anakennye cyane.

Igihe cyaje kugera maze twiyemeza kutumva amagambo yabantu ahubwo tugategura ejo hazaza hacu.

Nubwo bitari byoroshye, twakomeje urukundo rwacu ndetse dutangira no gupanga umunsi w’ubukwe bwacu.

Umunsi w’ubukwe warageze, dukora ubukwe bwiza cyane haza abantu benshi batandukanye barimo n’abanyamakuru bose batangaye bibaza icyo nakundiye umukunzi wanjye.

Hashize umwaka umwe umugabo wanjye yajyanwe n’Itorero kwiga ubupasitoro muri America.

Mu mwaka wa 2016 nibwo nanjye naje kumusanga hanze, ubu tukaba dufite abana babiri b’impanga kandi ndashima Imana ko yakuyeho igisuzuguriro k’umugabo wanjye akaba asigaye yifashije ndetse yubashywe n’umuryango wanjye ndetse n’abandi bose bamusuzuguraga uko bashatse.

Inama nagira abakobwa bo muri iyi minsi nuko urukundo ruzima rutareba amafranga, ubwiza,indeshyo n’ibindi ahubwo urukundo ruba rwiza iyo ukunze ugukunda nta kindi umukurikiyeho. Mbonereho kubibutsa ko umukunzi mwiza umuhabwa n’Imana yonyine biciye mu gusenga cyane.

Musore nawe nkumi, niba wizera ko Imana ari urukundo kandi umufasha mwiza umuntu amuhabwa n’Imana (Imigani 19.14) nawe komeza usenge kandi urushaho gukiranukira Imana muri byose nawe izagutoranyirize umukunzi ugukwiriye mu gihe yagennye kuko ariyo izi uwo mwabana urugo rwanyu rugakomera hatagendewe ku miterere ye.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo
Nzokirantevye p claver Kuya 28-04-2018

Imana yacu ninziza ibihe vyose.Nanje narayibony mubihe nkivyo