Menya ibiribwa warya bikagufasha guhorana umubiri utemba itoto

Hari ibiribwa umuntu ashobora kurya bikamufasha kugumana ingufu za gisore ndetse hari n’ibyo asabwa gukurikiza kugira ngo umubiri we wiyubake neza cyane ko burya umubiri ari nk’izindi mashini zose kandi uko uwugaburiye ni nako umera.

Ibi byatumye Umubavu.com tugushakira bimwe mu biribwa byagaragajwe n’ubushakashatsi ko bifasha umubiri kugumana imbaraga n’itoto bityo ntusaze vuba kandi ugahorana imbaraga. Bimwe muri byo ni:

1. Amavuta ya “Olive”

Hashize imyaka 40, abashakashatsi mu mbonezamirire bemeje ko amavuta akomoka kuri Olive arwanya ku buryo bugaragara indwara zifata imyanya y’ubuhumekero ndetse na Kanseri. Ayo mavuta akomoka ku gihingwa cya “Olive”, akarwanya gusaza imburagihe aho umuntu agumana ubusore. Si ibyo gusa kuko ngo arwanya n’umubyibuho ukabije bita “Obésité”.

2. Yaourt

Mu myaka ya 1970, igihugu cy’Uburusiya, cyavugaga ko aricyo gifite umubare munini w’abantu bari bafite imyaka igera ku 100 ndetse inarenga. Ibanga ryabo rero nk’uko babitanzemo ubuhamya ni Yaourt kuko ngo itajya ibura mu mirire yabo. Ibyo biterwa ni uko muri Yawurute hagwiriyemo Kalisiyumu irwanya “Ostéoporose”(indwara yibasira abantu bageze mu bukure) kandi hakanabonekamo “Probiotiques”, ifite uruhare runini mu kurwanya indwara zibasira amara, zishingiye ku kigero cy’imyaka y’ubukure umuntu aba afite.

3. Amafi

Mu myaka ya 1980, abashakashatsi b’abahanga mu mbonezamirire batangiye kwibaza impamvu abaturage b’igihugu cya Alaska bitwa « Inuits »batajyaga bafatwa na rimwe n’indwara z’ubuhumekero. Abo bahanga baje kuvumbura ko nta rindi banga ryabo kugumana itoto no kutarwaragurika uretse gushingira ku mubare munini w’amafi barya. Amafi akaba ari isoko y’ibyo bita « acides gras », irwanya indwara zo kuziba kw’imiyoboro y’amaraso ndetse igatuma n’umutima ukomeza gutera neza.

4. Shokola

Chocolat, hamwe n’ibindi bikomoka ku giti cya Cacao bibonekamo “flavonoides” zifasha cyane ku mikorere myiza y’imiyoboro y’amaraso no gukora neza mu gukingira indwara z’imitima, diyabeti y’ubwoko bwa kabiri ndetse n’indwara z’impyiko.

5. Noix de coco, cyangwa coconut

Ubushakashatsi butandukanye bwagaragaje ko abantu barya imbuto zitwa “Noix” bafite amahirwe yo kutarwaragurika, dore ko izo mbuto ari isoko y’intungamubiri zisa n’izikomoka ku gihingwa ya Olive kuko ngo zikungahaye cyane ku mavitamine, ku myunyu ngugu n’ibindi bituma umuntu agumana imbaraga za gisore.

6. Divayi (Wine)

Kunywa ibinyobwa bisembuye mu rugero, ngo bikingira indwara zimwe na zimwe z’umutima, diyabete ndetse ngo no kubakunda kwibagirwa cyane, nabo ngo irabafasha. Hakurikijwe ubushakashatsi bwakozwe, ndetse bugakorerwa ku nyamaswa, basanze divayi itukura igwiriyemo ibintu byinshi bituma ingirirangingo zidasaza vuba. Ibyo bigatuma umuntu ahorana uruhu rutoshye ari nacyo kimenyetso nyamukuru cy’uko umuntu aba atarasaza.

Nk’uko bitangazwa n’urubuga rwa interineti Doctissimo.fr, ni ngombwa cyane kandi kwitabira imirimo ngororangingo (Sport) kandi burya ngo ubwinshi sibwo ngombwa ahubwo ngo icy’ingenzi kandi gikenewe ni uguhozaho gahunda idahinduka mu buryo iyo sport ikorwamo. Ni byiza kandi gufata indyo ikungahaye ku ntungamubiri zirimo imbuto, imboga rwatsi, ibinyampeke n’izindi ndetse hakagabanywa ibiribwa bigwiriyemo “Karori” cyane cyane bigwiriyemo amasukari.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo