Ese ni ikihe gihe kiza ushobora kwereka ababyeyi bawe umukunzi wawe?

Hari abasore kimwe n’inkumi bahora bibaza mu by’ukuri igihe cyababera kiza cyo kwereka ababyeyi babo abukunzi bahisemo ugasanga babiburiye igisubizo cyane ko hari ababyeyi usanga bavuga ko nta gakungu baba bakeneye mu rugo rwabo wenda bagendeye ku myaka abakundana bakagombye kuba bafite cyangwa n’indi mpamvu ariko kandi umwana yaba amaze gukura bihagije, bagatangira kumubaza impamvu ntacyo ari kubabwira kijyanye no gushaka. Iyi niyo mpamvu Umubavu.com twashatse kubagezaho igihe kiza cyo kwereka ababyeyi umukunzi.

Bitewe n’imico itandukanye y’ababyeyi baba baranyuzemo cyangwa babamo, hari ababyeyi bamwe usanga babwira abana babo ko batemerewe kubazanira abantu runaka mu rugo rwabo bitewe nk’urugero n’ibyo bemera cyangwa bashaka. Ibi bigatuma bamwe mu bakobwa cyangwa abasore batinya kugeza mu rugo iwabo abo bakundana ngo ababyeyi babo batabamaganira kure uretse ko muri iki gihe usanga uyu muco abenshi bita uwa kera ugenda ucika umwana akikundira uko umutima we ushaka.

Hari n’ababyeyi usanga babwira abana babo ko bagomba kugira imiryango runaka batagiramo inshuti bityo umwana yakwisanga afite umukunzi wo muri iyo miryango yabujijwe ku mpamvu runaka ugasanga abuze uburyo yahingutsa umukunzi we mu rugo. Abantu benshi bemeza ko ibi bibaho cyane n’ubu mu miryango ifatwa nk’iyifashije ngo aho usanga imiryango ifatwa nk’idatunze idashobora kugirana ubushuti ubwo aribwo bwose n’ikize.

Mu gusubiza ikibazo cy’abibaza igihe kiza cyo kwereka umukunzi wawe abayeyi, bamwe bavuga ko byaba byiza umuntu abanje kuzuza imyaka yemewe n’amategeko (21, mu Rwanda) kugira ngo atekereze kuba yazana umukunzi we mu rugo bitewe nuko hasi yayo akenshi bifatwa nk’agakungu gashobora no gukurura imyifato mibi.

Hari kandi n’abavuga ko byaba byiza umusore /inkumi azanye umukunzi we mu rugo iwabo kumwereka ababyeyi be mu gihe bitegura kwambikana impeta bashingiye ko akenshi ibya hutihuti usanga hari igihe bipfa ugasanga ntibigaragaye neza guhora werekana umukunzi irengero rye ntirimenyekane imbere y’ababyeyi.

Kuri iyi ngingo buri wese yavuga igihe cye yumva cyamubera kiza cyo kwereka ababyeyi be umukunzi we kimwe nuko hari abavuga ko bakwituriza bakabanza bagapanga gahunda yabo neza babona hari igifatika bagezeho bakabona kubimenyesha ababyeyi bitewe na cya kibazo cy’uko ngo ibikozwe hutihuti hari igihe bitaramba.

Nawe usomye iyi nkuru birashoboka ko hari uko ubyumva cyangwa ubona igihe kiza wakwereka ababyeyi bawe umukunzi wawe wahisemo, wakwandika ahagenewe igitekerezo ugasangiza abandi igihe nawe ubona gikwiriye cyo kwerekana umukunzi mu muryango wawe.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo