Ese koko hari ikigero cy’imyaka runaka ikenewe kugira ngo umuntu abashe gushinga urwe rugo?

Bamwe mu bantu barimo urubyiruko n’abakuze usanga mu by’ukuri bibaza niba hari umubare runaka w’imyaka usabwa kugira ngo umuntu abe yabasha gufata icyemezo gushinga urwe rugo, ese umusaza n’umukecuru bo mu gihe cyabo ntibashobora gushyingirwa? Haba hari ngaruka mbi ku mukecuru cyangwa umusaza bakoze ubukwe? Mu gusubiza ibi bibazo, hifashishijwe ubushakashatsi bwakozwe ku rwego rw’isi kuri iyi ngingo kugira ngo haboneke ibisubizo by’ukuri.

Ubu bushakashatsi bwakozwe n’abahanga mu bijyanye n’ubuzima bw’imyororokere bo muri Amerika mu mwaka wa 2014, bwagaragaje ibitekerezo bitandukanye kuri iyi ngingo ari naho hazingiye ibisubizo by’ibi bibazo byibajijwe n’abantu batandukanye bashaka kumenya niba koko kugira ngo umuntu afate icyemezo cyo gushaka, kugendera ku kigero cy’imyaka runaka ari ngombwa.

1. Ubuzima umuntu ubwe yari asanzwe abamo

Ubushakashatsi bwagaragaje ko mu gihe umuntu runaka yamenyereye kubana n’abandi bantu mu buzimabwe bwose, uyu bitamugora no gushing urwe rugo cyane ko inzira aba atangiye yo kubana n’undi muntu mu nzu imwe aba abimenyereye. Gusa ngo mu gihe imyaka igenda yiyongera , ku muntu wese si byiza cyane kuko umubiri ugenda ugira impinduka zishobora kuzana ibibazo bitari byitezwe.

2. Impinduka zigenda zigaragara uko umuntu asaza

Uko umuntu agenda asaza niko agenda atakaza ubwiza bwe bwaba ubw’imbere ndetse n’inyuma biturutse ku kuba umubiri ugenda ukanyarara. Iyi mihindagurikire y’umubiri ngo igenda ituma umuntu agenda arushaho kugendera kure gutekereza gushing urugo. Ku gitsina gore, ni byiza cyane gushing urugo bakiri batoya kuko aribwo umubiri wabo uba ugifite itoto binatuma bishimira ingo zabo. Ku bagore kandi uko basaza niko uruhu rwabo rukanyarara cyane ndetse rugakomera mu gihe rwakagombye kuba rworohereye.

Ikindi uko umuntu agenda asaza niko uruhu rwe rugenda ruhindura impumuro. Ku bagore kandi uko bagenda basaza niko bagenda batakaza amavangingo abafasha mu gihe cy’imibonano mpuzabitsina (Ibi byose birashimangira ko ari byiza gushaka udategereje imyaka y’ubusaza).

Si ibi gusa kuko twese tuzi kandi ko uko umuntu agenda asaza ari ko agenda atakaza agatege ko gukorera urugo rwe igifatwa nk’inkingi ya mwamba mu gushakira umuryango imibereho.

3. Mu myaka y’ubusaza

Aha tubanze twibaze ikibazo kigira kiti, ubundi imyaka ifatwa nk’iy’ubusaza ku buryo umuntu atashobora kuzuza inshingano z’urugo ni ingahe? Mu gusubiza iki kibazo, hifashishijwe ubushakashatsi aho byagaragaye ko igihe gifatwa nk’ubusaza aho umugabo cyangwa umugore aba yatangiye kumva nta gatege ko kuzuza inshingano z’urugo rwe uko bigomba ari byibuze kuva ku myaka 60 y’amavuko ujya hejuru mu gihe nabwo umuntu yari abaye mu buzima bwiza kuko ishobora no kujya hasi bitewe n’ubuzima bubi umuntu yabayemo.

Ubundi bushakashatsi kandi bwagaragaje ko umuntu atangira guhura n’uruhuri rw’ibibazo bishobora gutuma atubaka urwe neza, kuva mu kigero cy’imyaka 35 kugeza kuri 55. Ibi biba ku gitsina gabo n’igitsina gore biturutse ku mpamvu runaka z’ubuzima babayemo bwa buri munsi.

4. Indwara zo mu busaza zishobora kutera ingorane mu kubaka urugo

Ubusaza buhera ku myaka 60 kandi bushobora gutangira guteza ibibazo birimo n’indwara ku mubiri w’umuntu. Nyuma y’ubu burwayi, umuntu ashobora gukoresha imiti yivura ariko nyamara uko umubiri ugenda umenyera imiti ni nako ugenda ucika intege bityo n’imbaraga zikayoyoka.

Mu gihe umuntu abazwe biturutse ku ndwara ziterwa n’ubusaza, nabyo bituma umubiri ugenda utakaza ubudahangarwa bwawo bigatuma umuntu agenda arushaho gutakaza agatege kakamufashije kubaka urugo rwe neza.

Amagufwa, amavi, amaboko, intugu, ikibuno n’umugongo ni bimwe mu bice bikunze gutangira gucika intege mu gihe umuntu atangiye kugenda yegera imyaka y’ubusaza cyangwa ayitimo. Kugira ngo nibura izi ngingo zivuzwe zibashe kudateza ibibazo cyane bisaba guhora umuntu akora imyitozo ngororamubiri ndetse no koga amazi asukuye kandi ashyushye.

Izi ngingo zose zivuzweho mu kwerekana ko byakabaye byiza abantu batagombye gutegereza igihe bageze mu myaka y’ubusaza ngo babone gutekereza gushinga ingo zabo nkuko muri iyi nkuru hibazwaga niba gushaka urugo hari ikigero cy’imyaka bisaba kugira ngo umuntu ashinge urugo.

Bityo rero nkuko izi ngingo zibisobanura, byaba byiza umuntu ashinze urugo munsi y’imyaka 35 y’amavuko kuko twabonye ko guhera kuri iyi myaka ujya hejuru ari bwo umubiri utangira gucika intege.

Birashoboka ko nawe hari ukundi wabyumva, gusa ibi nibyo byagaragajwe n’ubushakashatsi ari yo mpamvu nawe icyo igitekerezo cyawe wagisangiza abandi ahabugenewe bityo nkuko Umubavu.com intego yacu ari ugukomeza kubaka umuryango nyarwanda mwiza uzira amakemwa, nawe ukaba utanze uwawe musanzu.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo