USA: Umwana yivuganye ababyeyi be bose na mushiki we, mukuru we ararutoroka

Ni muri Leta Zunze Ubumwe za Amerika muri Leta ya New Jersey, aho umwana w’imyaka 16 y’amavuko mu ijoro ry’umwaka mushya yafashe imbunda yica ababyeyi bombi, mushiki we hamwe n’inshuti y’umuryango mbere gato y’uko umwaka urangira.

Uyu muhungu yitwa Scott Kologi, yishe se w’imyaka 44, nyina 42 mushiki we 18 n’inshuti y’umuryango y’imyaka 70 yabanaga nabo. Byabaye hasigaye iminota micye ngo 2017 irangire.

Sekuru w’uyu musore ndetse na mukuru we witwa Steven Jnr barokotse ubu bwicanyi kuko babashije gucika nk’uko bitangazwa na NewYorkPost.

PNG - 895.4 kb
Mukuru w’uyu mwana yararusimbutse naho mushiki we ruramutwara


Abapolisi batabajwe humviswe amasasu mu rugo, basanze inzu yuzuye amaraso ahagana saa 11.43PM mu ijoro rishyira umwaka mushya.

Bamwe mu baturanyi ngo babanje gukeka ko ari bya bishashi by’ibyishimo (fireworks) biturikijwe mbere y’igihe kugeza ubwo bamenye ko ari ishyano ryaguye iwabo.
Kugeza ubu hari hataramenyekana icyateye uyu mwana w’umusore gukora iri bara.

Imbunda yakoresheje yica abe iwabo ngo bari bayitunze mu buryo bwemewe n’amategeko kandi iwabo hano nta makimbirane yari yakahazanye Police mbere yabwo.

PNG - 978.4 kb
Kologi yivuganye ababyeyi bari iburyo na mushiki we ubanza ibumoso


Umwe mu baturanyi we yabwiye New York Post ko Kologi ubusanzwe ari ‘umwana mwiza cyane ku isi wahoraga yisekera yishimana n’abandi.’

Yagize ati “Sinzi ibyabaye. Ntabwo yari umwana w’amahane. Yahoraga aseka.”

Se w’uyu mwana yari bafite abana bane, barimo umwe yabyayeho mbere yo gushaka n’uyu wishwe n’umwana we bakabyarana abana batatu.

Hari amakuru avuga ko uyu mwaka yagiraga uburwayi bwa ‘Autisme’ ndetse ngo ntiyize amashuri abanza mu buryo bumwe n’abavandimwe be.

Mushiki we Brittany nawe yishe yari umunyeshuri mu mwaka wa mbere wa Kaminuza muri siyansi y’ubuvuzi.

Uyu musore ubu yatawe muri yombi ashinjwa ubwicanyi.

Daniel MUKESHIMANA/Umubavu.com





Tanga igitekerezo kuri iyi nkuru



Igitekerezo